Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 32: Candi Kaniku Dra Matu ru 10 ’Diyi

A’diko 32: Candi Kaniku Dra Matu ru 10 ’Diyi

MI MA ndre nga e’da ’diyi. Alu alu ni ece candi kaniku dra matu ru, Yehova mi fele Misiria ’diyi. E’da okori ma alia mi eco ndre Aroni gba yi kali si. Eri ni gbazu ’bo ri ma vutia, yi a’bua ri nga i oja ari ru. E’bi nga odra dria, azini yi nga ngu onzikanya ru.

Dra ndundu ’diyi ’ba Misiri ni ma dria

’Di ma vutia Yehova nga fe odrukodru ni efuzu Yi Nili ma alia risi amve. Ereki eyi pari dria ma alia​—​atiliku ma driasi, sofuria ma aliasi, pari lazu ri ma dria si​—​dika pari woro ma alia. Odrukodru ’diyi ni odrazu ’bori ma vutia, ’ba Misiri ni ’diyi nga eyi tra angiri angiri tualu pari ndu ndu ma alea ani angu ’da nga ngu woro onzi.

Aroni nga Nyaku gba kali si, irifura nga i oja ogaliri ru. Ogaliri ndra candi pale nazu angu Misiri nia ri.

Candi asipi ’diyi obi lu ’ba Misirini ’diyi ki a’dule, obini ’ba Isrelini ’diyi ki ku. Candi pale su ri ovu onyukunyu amboru ’diyi onga jo ’ba Misiri nia ’di ma alia si dria. Candi kaniku dra matu ru, towi ri ovu anyapa ma rua a’dule. Ti kakau, azini kabilo pie ndri pie ovupi ’ba Misiria ’diyi niri nga odra ra.

’Da ma vutia, Musa pi Aroni be nga ofutaku yi oru oli alia. Nga eca opipia ru ’ba ma rua azini anyapa ma rua indi. ’Di candi kaniku dra matu ru, azia zo ri i.

’Da ma vutia, Musa nga ima dri su uru bua, Yehova nga ovi efe si pie. ’Diri ozoo si pie onzikanyaru ndepi ni angu Misiri nia ri i.

Candi, kaniku dra matu ru arori ombi ni ’dezu ri. Engazu drio kpere sawa ’disi ombi kalafe ’dile ni yo. Nga afa dria si ni kule ja ’diyi nya teke teke.

Candi kaniku dra matu ru oromi ri angu bizani. O’du pi pi na angu biza nga nyaku ma dri abu ci, te ’ba Israelini eyi diza ma alia pari eyini ovuzu ria.

Asizu Mungu nga ’yo ’ba i vule ’diyi ni kini ma oya ari ndri werea ’dini ri kaniku kabilo werea ’dini ri jo tile eyi nia dria ci. ’Di ma vutia malaika Munguni ri nga aga angu Misiri ni ma dria si. Malaika ka ari ndre jo tilia ci, cani ’ba aluni ’di jo ’diri ma alia ku. Te jo dria ari ni ovuzu tile nia yo ’diyi ma alia, malaika Munguni ri nga mva osipi oko ’diyi o’di dria tro ’bani kaniku anyapa ni. ’Diri candi kaniku dra matu ru 10 zori.

Dra matu ru asizu ’di ma vutia, Farau nga ’yo ’ba Israelini ’diyi ma mvi ki di. Esu derisi ’ba Munguni ’diyi gonde muzu, coti ini ’dasi nga aci fuzu Misiria risi ri e’do ra.

Efuza caputa 7 kpere 12.



Zita ki

  • Mi ayu e’da ’diri candi kaniku dra maturu oko na ndra Yehova ni iji Misiria diyi ecezu.
  • Esele coza candi oko na ri pi ma eselea candi azi ’diyi pie ri ngoni ya?
  • Candi su, towi azini azia ’diyi ndra ngoki ya?
  • Mi ece candi aziri, aro azini oromi ri.
  • De nga candi mudri ri e’doni i ku Yehova ’yo ’ba Israeli ru ’diyi ni ngoni ya?
  • Candi mudri ri ndra ngo i, azini a’du afa ’ye ’da ma vutia ni ya?

Zita o’bazaru ’diyi ki

  • Mi la Efuza 7:​19- 8:​23.

    ’Ba ondua ru Misiria ’diyi ni tro tali ’yezu candi iri Yehovani fele ’diyi si ra ti, eyo eyini a’i candi nazu ri ma vutia vutia ri ngoni? (Efu. 8:​18, 19; Mat. 12:24-​28)

    Candi su ri ece geri Yehova ni ’ba ivile ’diyi pazuri ngoni ru, azini ’diyi nga ’ba Yehovani andrusi ’diyi ma aza ko ‘inzamatara amboru’ oyo ni sole ’bori ma ti tazu ngoni ngoni ya? (Efu. 8:​22, 23; Ece. 7:​13, 14; 2 Sur. 16:9)

  • Mi la Efuza 8:​24; 9:​3, 6, 10, 11, 14, 16, 23-​25; azini 10:​13-​15, 21-​23.

    ’Esele coza ’ba ada ni iri Candi Mudri ’diyi co ri ngoki, dika esele coza nde ’diyi obiki idri amani andrusi ngoni ru ya? (Efu. 8:​10, 18, 19; 9:​14)

    E’yo siza Efuza 9:​16 ri ko ama aza asisile Yehova ni fezu Satani ni o’azu kpere curu’do ri vazu ngoni ngoni ya? (Rum. 9:​21, 22)

  • Mi la Efuza 12:​21-​32.

    Omu Agazu ’ba drilesiri nga pata eji ’ba kakau dri ngoni ru, azini Omu Agazu ’diri ece a’du afa ni ya? (Efu. 12:21-​23; Yoh. 1:​29; Rum. 5:​18, 19, 21; 1 Kor. 5:7)