Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 30: Ase Vepi Ri

A’diko 30: Ase Vepi Ri

MUSA nga emu kpere oni Horebu ma dria iribi ndazu kabilo yi ni. ’Dia nga ase ndre veria acisi, te aci veni eriku!

Musa ni ase vepi ri ma agyei

Musa nga asisile dro: ‘’Diri osuta ru tu, ma nga ma se inyia drezu kilili.’ Erini i seria nyia, o’duko nga nga iku ase vu kini: ‘Mi esi mi ’doa ogogo ku. Mi tru afa mi paa ’diyi va, a’dusiku mi so pa angu alatararu ri ma dria.’ Mungu ni e’yo nze ni geriko malaika vu risi, ani Musa nga ’di ima mile aku ci.

Mungu nga ’yo kini: ‘Andre driciza ’ba mani ’diyi ni Misiria ri ’bo. Ma nga mu eyi ofu ra, te mi i ma nga mi ti pe eyi ma dri cezu eyi ofuzu Misiria ri si amve.’ Yehova ni nga ’ba ivile ’diyi ji angu ndrizaru tu omvele Kanania ria.

Te Musa nga ’yo kini: ‘Ma ’ba orodri koko ni. Ma eco ’diri ye ngoni ngoni ya? Te aka nga mura, ’ba Israelini ka nga ma zi, “Adi epi mi ti ni ya?” Ma nga omvi ngoni?’

Mungu nga omvi: ‘Mi ’yo dini, “YEHOVA Mungu Iburahimu ni, Mungu Isaka ni, Mungu Yakoboni ipe ma ti emi vu ni.”’ Yehova nga e’yo ’dika kini: ‘’Di ma ru ni ’dani ’dani.’

Musa omvi: ‘Te ka ki nga a’i mi epe ma ti ni ku ria.’

Mungu zi: ‘Mi dria ’di a’du afa ni ya?’

Musa omvi: ‘Kali ni.’

Mungu ’yo ’dini: ‘Mi ’be eri nyakua.’ Musa ni kali ’bezu ­nyakua ’bo ria, kali nga i oja ori ru. Yehova nga Musa ni tali azini e’da. Nga ’yo kini: ‘Mi su mi dri mi agatia.’ Musa nga ’ye ra, te erini i ma dri enzeria amve, eri ma dri eca emve foroto ru ofuta le! Eri ma dri ena dria azo onzi omvele ofu ru ri beni le. ’Da ma vutia Yehova fe Musa ni okpo tali na zuri ’yezu. Asizu ’yo ’dini: ‘Mi ka nga tali ’diri ’ye ’ba Israelini dri ’bo, eyi nga a’i ra ada ma epe mi ti ni.’

’Di ma vutia Musa nga di mu Yetero vu akua ’yo erini kini: ‘Kiri kiri mi ku ma ma mvi adripika mani angu Misiria ’diyi ndre eyi ’dale ngonia ri.’ Yetero nga di ’yo Musa ni muke, coti Musa nga di aci edo mvizu Misiria.

Efuza 3:1-22; 4:1-20.



Zita ki

  • Oni eda di ma elea ri ma ru ngoni?
  • Mi ece afa Musa ni ndre osuta ru eri ni tuzu oni dria kabilo pie ria ri.
  • O’duko ase vepi ria ri ’yo ngoni, azini o’duko ’diri a’di ni ya?
  • Musa nga omvi ngoni Munguni ’yozu eri ni eri nga ’ba Munguni ’diyi ma dri ce Misiria ri si amve ria?
  • Mungu nga ’yo Musa ni ngoni ’ba ka nga eri zi a’di epe eri ma ti ni ria?
  • Musa ni nga ece Mungu epe ima ti ni geri ngoni le ri si ya?

Zita o’bazaru ’diyi ki

  • Mi la Efuza 3:​1-​22.

    ’Yeta Musa ni ’yele ’diri fe amani okpo vazu ra ada Yehova ni nga ama ati ra akaki ama ama orodri yo azi Munguni ngazu ria? (Efu. 3:​11, 13; 2 Kor. 3:​5, 6)

  • Mi la Efuza 4:​1-​20.

    Musa ma egata oja i ngoni ru eli 40 eri ni o’azu angu Midia nia ’dale ria, azini e’yo’ba lepi ecapi azi ma aza kozu kanisani ’diyi ni oni dia ri ngoni? (Efu. 2:​11, 12; 4:​10, 13; Mika 6:8; 1 Tim. 3:​1, 6, 10)

    Aka ki imbata isu geri Yehova vile otuta ri ma alea si, eceta Musa vile ri ama dri asi okpo ngole ri fe ya? (Efu. 4:​12-​14; Zab. 103:14; Ebr. 12:​4-​11)