Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 29: Musa Apa A’du E’yo Si’ari

A’diko 29: Musa Apa A’du E’yo Si’ari

MI NDRE Musa ni aparia Misiria risi. Mi ndre ’ba eri edro’ba ’diyi ra ya? Mi ni ’ba le Musa ni ’di ra a’du e’yo si’ari ra ya? Ama ma ndre ki nga asisile ni.

Musa ni apa Misiria risi

Musa zo, ’ba angu Misirini ma dricepi Farau vile akua. Nga eca ’ba onduaru tu ni azini ’ba angiri ru. Musa ni ra kini i ovuni ’ba Misiria ni ku, te tipika eyi ’ba Israelini ati’ba ru ’diyi.

O’du alu, eri ma eli ni cazu 40 ’bo ria, Musa nga mu ’ba ivile ki andri. Esu geri ’bani eyi ecandizu ’da ewaru. Ndre ’ba azi Misiria ni ati’bo Israelini coria. Musa ondre angu araa, erini ’ba azini ndrezu ku ri si, nga ’ba Misirini ri gba, coti ’ba Misirini ri nga dra ra. Musa nga di avuni zi cinya ma alia.

Drusi ’dini Musa nga mu ’ba ivile ’diyi andri ’dika. Eri ni ega ri si i eco eyi ma aza ko ra, ani eyi econi nga ovu ati’boru dika ku. Te nga ndre ’ba Israelini iri ki eyi co ria, musa nga ’yo azi e’yo onzi ’yepi ri ni kini: ‘Mi mi adripini co a’du e’yo si ya?’

Agu nde omvi kini: ‘Adi ’ba mi ama drile ru azini ’ba e’yo lipi ri ru ni ya? Mi le ma fu ra mini ’ba Misirini fule rile ya?’

Musa nga eca urisi. Nga ni ra kini ’ba isu e’yo ini ’ye ’ba Misirini ’di ma rua ri ’bo. Esu dere Farau eri vini e’yo drinia ’bo indi, ani nga ‘ba yi ’ba Musa ni ’dizu ra. E’yo ’disi Musa nga di apa Misiria ri si ra.

Musa ni Misirini kuria ’bo, nga mu re ’dale angu Midia nia. Eri nga ’ba Yetero vile akua ’diyi isu, nga zamva erini alu ni omvele Zipora i ri’du oku ru. Musa nga eca ’ba Yetero ma kabilo ocepi ageyi tepi ri ru. Eli 40, nga o’a angu Midia ni ma alia. Eri ma eli ca di sawa disi 80. O’du alu Musa ni Yetero ma kabilo oceria, e’yo azi eri ma idri ojapi rani nga i ’ye. Ama ma neki nga afa e’yo ’di a’du afani’ari

Efuza 2:11-25; ’Yeta 7:22-29.



Zita ki

  • Musa zo de ngoa ya, te afa eri ni nile ima tipika pi ma dria ri a’du ni ?
  • Musa ’ye a’du afa ni eri ma eli ni cazu 40 ’bo ria?
  • Musa ’yo agu ’ba Israelio ru ri copi ri ni ngoni, azini agu nde nga omvi eri ni ngoni ya?
  • Musa apa Misiria ri si te a’du e’yo si ya?
  • Musa nga apa ngoa, azini nga a’dini isu ’daa ya?
  • Musa ’ye a’du afa eli 40 eri ni apazu Misiria ’bo ri ma vutia?

Zita o’bazaru ’diyi ki

  • Mi la Efuza 2:​11-​25.

    Eri ni tro onita onizu ondoa ’ba Misiri ni ’diyi vu ra ti, Musa nga a’ita Yehova vu azini ’ba eri dri ’diyi vu ngoni ngoni? (Efu. 2:​11, 12; Ebr. 11:24)

  • Mi la ’Yeta 7:​22-​29.

    Musa ni lezu ’ba Israeli ni ’diyi opazu engazu ’ba Misiri ni ma driasi ima ngulupi si ri imba ama ngoni ya? (’Yeta 7:​23-​25; 1 Pet. 5:​6, 10)