Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 17: Iju Ndra Ndu Ndu ’Diyi

A’diko 17: Iju Ndra Ndu Ndu ’Diyi
Esau

AGUPI anzi iri ’diyi ndu ndu, ’dini ku ya? Mi ni yi ma ru ra ya? Anyapa asea ri odropi ri Esau’i, azini agupiamva kabilo ma agei tepi ’di Yakobo ’i.

Esau pi Yakobo be ndra anzi iju ru Isaka pini Rebeka be ’diyi. Eyima ati Isaka, le ndra Esau ni tu erini ndra ovuzu ’ba anyapa ogbipi muke ni risi azini eri ni ndra nyaka e’ji yini akua nyazaru risi. Te Rebeka le ndra Yakobo ni ndeni erini ndra ovuzu agupiamva e’yere ni azini asi anzu be risi.

Eyima a’bi Iburahimuni ndra kiri idriru, ama ecoki di Yakobo le ndra e’yo Iburahimu ni nze Yehova ma dria ri ngoni’a ri egara. Iburahimu dra di ndra isu erima eli 175, isu de anzi ijuri ’diyi ma eli di 15.

Esau ma eli kamu ca 40 ’bo, ’du oku iri engazu angu Kanani nia ’diyi ima okuru. Disi Isaka pi o’aki ndra ani Rebeka be candisitu, adusiku oku ’diyi inzikini ndra Yehova ni ku.

O’du azini alu e’yo azi ’ye ’i fe ani a’oko nya Esau ni ima adripi Yakobo ni. Sawa eca di ndra Isaka ni asi ndriza fezu mva ivile okori ni. Esau ni ndra ovuzu Yakoboni okorisi, Esau ega ndra i nga mu asi ndriza ’di isu ni. Te isu de Esau ozi ndra okpo asi ndriza isuzuri Yakoboni ’bo. Azini, ’bani ndra agupi anzi iri ’diyi osiria, Mungu ’yo ndra Yakoboni nga asi ndriza ’di isu ni. ’Ye di ndra ’i ’dinile. Isaka fe ndra asi ndriza ima mvi Yakoboni.

Yakobo

’Da ma vutia, Esau ni e’yo, ’di onizu ’borisi, a’oko nya eri Yakobo ni tu. A’oko nya eri tu kpere erini ’yozu ’i nga Yakobo ni ’di te. Rebekani e’yo ’di onizu ’boria, eca urisi tu. Ani ’yo di ima agupi Isaka ni ’dini: ‘Eri vini nga ovu onzikanya ru Yakobo ka oku Kanania ’diyi ma azi ’du ima okuru ria.’

Ani Isaka omve ima mvi Yakoboni azini ’yo erini: ‘I’du oku Kanania ni mi okuru ku. Dari ma paria, imu mi a’bi Betueli vile joa Harania. I’du erima mvi Labani ma ezoanzi ma azi mini okuru ’i.’

Yakobo eri ndra ’i ati ma ti ra, e’do ani aci muzu pari ima ori’bani o’azu Harania ria coti coti.

E’doza 25:5-11, 20-34; 26:34, 35; 27:1-46; 28:1-5; ’Ba Ebraniani 12:16, 17.



Zita ki

  • Esau pi Yakobo be a’di piki, azini eyi ndra ndu ndu geri ngoni le ri si ya?
  • Esau pi Yakobo be eyi ma eli si sawa eyi ma a’bi Iburahimu ni drazu ri si?
  • Esau ’ye a’du afani erini fezu i ma andri pini o’azu ati be candi si tu?
  • Esau o’a a’oko si tu ima adripi Yakobo ni, a’du e’yo si ya?
  • Isaka fe e’yo aziza ngoni le ni ima mvi Yakobo dri?

Zita o’bazaru ’diyi ki

  • Mi la E’doza 25:​5-​11, 20-​34.

    E’yo Yehova ni ondrile Rebeka vile anzi iri ’diyi ma dria ri ngoni ya? (E’do. 25:23)

    Esele coza Yakobo pini Esau be Drileba isuza mva okori ni ma dria ri ngoni ya? (E’do. 25:31-​34)

  • Mi la E’doza 26:34, 35; 27:​1-​46; azini 28:​1-5.

    Ama eco ne Esau o’a e’yo orindi ni si ayiko si ku ngoni ngoni? (E’do. 26:34, 35; 27:46)

    Yakabo ni ecozu tusu coza Munguni isuzu, Isaka ’yo erini ma ’ye a’du afa ni ya? (E’do. 28:​1-4)

  • Mi la ’Ba Ebraniani 12:16, 17.

    Eceta Esau niri i’da amani a’du e’yo ni ’ba afa onyiru gapi si ’diyi ma dria