Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 9: Noa ni Maburu Edezuri

A’diko 9: Noa ni Maburu Edezuri
’Ba ki ogu Nao si

NOA ovu ndra oku be azini agupi anzi na be. Eyi ma ru ndra Semi ’i, Hamu ’i azini Yafeti ’i. Agupi anzi ’diyi ma oku ndra vini dria ci. Asisile ’disi, Noa vile akua, ’ba ndra aro.

Mungu fe di ndra Noa ni afa ’bani ndra nga ’yeku ’dinile ni ’ye. ’Yo ndra ma ede maburu amboni. Maburu ’di e’da ndra oguru amboni le, te eji ndra ’i ndeni ria bokisi azi ambo izu ’dinile ri be. ‘Mi ede aleni ma ovu na orualeri’ Mungu ’yo ndra erima tia, ‘azini mi ali aleni ki ci.’ Aleni aliza ’diyi ndra Noa pini ’ba eri vile akua ’diyi pie, anyapa azini nyaka yini ’diyi o’bazu.

Mungu ’yo ndra vini Noa ni kini ma ede Maburu ’da ’i yi ni ecozu fizu aleniasi ku ru. Mungu ’yo di ndra ani: ‘Ma mu yi tiza ambo ni ma ti epe wundrikuru ma dri jazu dria. ’Ba ovupi maburu ma alea ku ’diyi nga odra dria ra.’

Noa pi eriki ndra Yehova ma ti agupi anzi ivile ’diyi pie ra e’doki di ani maburu ede ra. Te ’ba azi ’diyi riki lu ogu ogu. Muki ndra drile e’yo onzi ma ’yeza be. Noa ni afa Munguni le ’ye ’di ecezu ria ’ba azini e’yo ’di a’ipi ni yo.

’Ba Noa vile akua ’diyi ki anyapa ki ofi maburu ma alea nyaka pie

Maburu ma edeza ’du ndra sawa angiri a’dusikuni eri ndra amboru tu. Asizu, eli angiri ma vutia, deki di ndra azi ni ra. Mungu ’yo di ndra Noa ni ma iji anyapa yi maburu ma alea. Mungu yo ndra Noa ma eji anyapa suruti azi ’diyi iri iri, agori pi aroni ri be. Te Mungu ’yo ndra Noa ma eji anyapa suruti azi ’diyi aziri aziri. Mungu ’yo vini Noa ma iji aria suruti ndu ndu ’diyi dria maburu ma alea indi. Noa ’ye ndra ekile Munguni ’yole erini rile.

’Da ma vutia, Noa pi fiki di ndra maburu ma alea ’ba ivile akua ’diyi pie. Mungu nga di kati opi ra. Maburu ma alea ria, Noa pi ngaki di ote ’ba ivile akua ’diyi pie. Mi o’bi nga ega kini mi vini ote eyi be maburu ma alea indi ’dini. Yi tiza amboni nga eca Munguni ’yole rile ra ya?

E’doza 6:9-22; 7:1-9.



Zita ki

  • ’Ba ndra Noa vile akua si, dika agupianzi eri vile na ’diyi pi ma ru a’dipi ya?
  • Azi azi osutaa ru Yehova ni fe Noa ma nga ri ngo i, dika a’du ma e’yo si ya?
  • Noa ni e’yo nzezu ’ba ima ageyia ’diyi pini maburu ma dria ria ngaki a’du ma e’yo ’ye ya?
  • Mungu lu Noa ni ma ’ye a’du afa ni anyapa be ya?
  • Yehova ni katile maburu ni ri opizu ’bo ria le di Noa pi ’ba eri vile akua ’diyi pie ma ’yeki a’du afa ni ya?

Zita o’bazaru ’diyi ki

  • Mi la E’doza 6:​9-​22.

    A’du afa fe Noa ni ecazu ’ba Mungu adari inzipi ni ru ni ya? (E’do. 6:​9, 22)

    Yehova ma egata adra ma dria ri ngoni, ani ’di ama aza ko mile tiza kilili ru ’diyi opezu i ngoni ngoni ya? (E’do. 6:​11, 12; Zab. 11:5)

    Le ama ma o’biki Noa ni ngoni ngoni akaki otuta dri ceza ni ri isu otuta Yehova ni ri ma alea ria? (E’do. 6:​22; 1 Yoh. 5:3)

  • Mi la E’doza 7:​1-9.

    E’yo ada Yehova ni ’ba ezata be Noa ni nezu ’ba muke ni ru ri okpo fe ama ni andrusi ngoni ngoni ya? (E’do. 7:1; O’be. 10:16; Isa. 26:7)