Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 6: Mva Mukeri Piki Onziri Be

A’diko 6: Mva Mukeri Piki Onziri Be

MI NE nga Kaini piki Habili be sawa ’disi. Zoki di iritro ’bo. Kaini eca di ’ba amvu ’yapiri ru. Eri ase efi ’yapi ’diyi izo pati efi ’yapi ’diyi pie azini tibi ini ’diyi pie.

Kaini pi Habili be owita owi Munguni

Habili eca di ’ba kabilo ma ta mbapi ri ru. Le kabilo anzi ma agei teza saaru. Kabilo anzi ’diyi iki di zo ecazu kabilo ambo ’diyi ru, ani Habili isu di ’i kabilo kakau oceria.

O’du azini alu Kaini pi ijiki afa feza Habili be Munguni. Kaini iji nyaka ini izo ’diyi ma esele azi. Habili iji kabilo ini ndepi onyisi te ri ’i. Yehova ovu di ayikosi Habilini azini feta erini risi. Te ovuni ayikosi Kainini azini afa feza erivurisi ku. Mi ni a’dusi’ari ra ya?

Ovuni feta Habili ni aga onyisi feta Kainini ra ’dini ku. A’dusikuni Habili ni ’ba muke ni. Le Yehova piki ima adri be iritro. Te Kaini ni onzi; leni ima adri ni ku.

Ani Mungu ’yo di Kaini ni ma oja ima geri. Te Kaini erini ku. A’oko nya eri tu Mungu ni Habili ni lezu ndeni risi. Kaini ’yo di ani Habili ni, ‘Ama ma mu amvua ’dale.’ Dale eyini ovuzu a’duleria, Kaini gba ima adri Habili ni. Gba eri okposi tu ani ’di eri ra. Afa Kaini ni ’ye ’di ovuni ndra onzirikanya ru ku ya?

Kaini ni di apa erini Habili ni ’dizu ’bo ri ma vutia

Habili ni tro ndra drazu ra ti, Mungu ni nga kiri eri ma e’yo ega ra. Habili ni ndra ’ba muke ni, ani Yehova econi ’ba ’dileri ma e’yo avi ku. Asisile ’disi Mungu ni nga Habili ni enga idriru o’du azini si ra. Ewu ’dasi, Habili ngani di dra dika ku. Eri di nga o’a nyakua ’dia ’dani ’dani. Ovuni muke e’yo onizu ’ba Habili le ’diyi madria ku ya?

Te Mungu ovuni ayikosi ’ba Kaini le ’diyi si ku. Kaini ni ima adrini ’dizu ’bori ma vutia, Mungu fe erini panga eri drozu ani ’ba erivu akua ’diyi vurisi re. Kaini ni ndra muzu o’azu nyaku ma kala azi ma alea ria, ’du ndra ima amvi azi alu ni indi, eri ma amvi ’da nga di ndra eca eri ma oku ru.

Eli azi ma vutia, Kaini pi e’doki ndra anzi ti ima okuni be. Agupianzi azini ezoanzi Adamu pini Eva be ’diyi ’duki ndra vini yi eyima eselea azini isuki vini ndra anzi yi ra. Mbelearu ’ba ecaki di ndra nyaku ma dria kakau. Ama ma oni nga e’yo eyi ma azi ma dria.

E’doza 4:2-26; 1 Yohana 3:11, 12; Yohana 11:25.



Zita ki

  • Kaini pi Habili be azi a’duni nga ya?
  • Kaini pi ijiki Habili be Yehova ni afa feza ngoki ya?
  • Yehova o’a ayikosi feta Habili vuri si te o’ani ayikosi Kaini vuri si ku a’du e’yo si ya?
  • Kaini ni ’ba ngole ni azini Yehova o’bi eri otu ngoni ngoni ya?
  • Kaini ni ovuzu ima adripi be amvua ’dale a’dule ria, ’ye a’du afa ni ya?
  • Mi o’bi nga a’du afa ’ye i Kaini be ni erini ima adripi ni ’dizu ’bori ma vutia ri ece.

Zita o’bazaru ’diyi ki

  • Mi la E’doza 4:​2-​26.

    Yehova ece ndra Kaini ni eri pari onzi ’dinile ri ma aleari ngoni ru ya? (E’do. 4:7)

    Kaini e’da ndra e’yo ima asi ni le ’yeri ngoni ngoni ya? (E’do. 4:9)

    Yehova ne ari adaza ’ba e’yere e’yo kokoru ’diyi niri ngoni ya? (E’do. 4:​10; Isa. 26:21)

  • Mi la 1 Yohana 3:​11, 12.

    Kaini eca ndra aokosi tu a’du e’yo si, azini ’di eco ovu amani bilenduliza ru andrusi ngoni ngoni ya? (E’do. 4:​4, 5; O’be. 14:30; 28:22)

    Biblia ece kini ’ba amavu akua ’diyi kaki tro Yehovani ga dria si ti, ama ecoki awi a’ita si ngoni ngoni ya? (Zab. 27:10; Mat. 10:21, 22)

  • Mi la Yohana 11:25.

    Asi omiza Yehovani fe ’ba dria odrapi e’yo kilili ma yeza si ’diyi ni ri ngoni ya? (Yoh. 5:​24)