Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 5: Idri Ewaruri E’do ’I Ra

A’diko 5: Idri Ewaruri E’do ’I Ra

EYINI fuzu amvu Edeni ni ma alea risi amve ’bori ma vutia, Adamu pi Eva be ovu ndra e’yo ewaru kakau be. Le ndra ma ngaki azi okposi nyaka isuzu. Pati ndriza ’diyi ma paria, yi ndra oci azini pati bi be mbili mbili ’diyi ne eyi ma ageia ’i. ’Di afa ndra ’i ’yepi Adamu pini Eva be Mungu ma ti gazu erikosi azini eyini lezu ovuzu Eri ma agyiru kurisi ri ’i.

Adamu ni azi nga okposi ima mvi be

Te ’da agapi onzisi rari, Adamu pi e’doki di ndra Eva be ra. Mi eco ega ra kini, Mungu li ndra yi ma bilendu kini yi nga dra ra kaki pati ndra ini ogasi ’da ma efi nya ra ria. O’du yini nyazu ’dasi e’doki di odra coti. Yi ndra azazaru ngonile Mungu ma ti erizu ku!

Anzi Adamu pini Eva be ’diyi ’ba osi ndra yi dria Mungu ni yi ma tipika yi ofuzu amvu Edeni ni ma alearisi amve ’bori ma vutia. ’Di ece di kini anzi yini ’diyi ndra vini eca dezaru azini odra indi.

Adamu pi kaki ndra Eva be Jehovah ma ti eri ra, idrini ndra ovu yini ayikoru anzi yini ’diyi pie. Ecoki ndra o’a ’dani ’dani ayikosi nyaku dria ’dia. ’Ba azini econi ta de, eca azoru kaniku dra ’dini ku.

Mungu le ’ba ma o’aki ayikosi ’dani ’dani, azini so amani Oyo kini ’dini nga ’I ’ye ra. Nyaku dria ngani lu ovu ndrizaru a’duleku, te ’ba driani nga ovu rua muke be. Azini ’ba dria nyakua ’diyi nga ovu agyi ru eyima eselea azini Mungu be.

Eva ni ima anzipi be

Te Eva ovuni ndra di Mungu ma agyi ni ku. Ani anzi osiza ovuni ndra erini ewa kokoru ku. Eri ndra rua suza isu. Erini Yehova ma ti erizu ku ri eji ndra erini candi angiri, ’dini ku ya?

Adamu piki ndra Eva be agupianzi azini ezoanzi be kakau. Yini mva okori osizu ’boria, ’daki ndra erima ru Kaini ’i. Daki mva irizuri ma ru Habili ’i. A’du afa ’ye ndra ’i anzi ’diyi be niya? Mi ni ra ya?

E’doza 3:16-23; 4:1, 2; E’yo Eceza 21:3, 4.



Zita ki

  • Idri ndra Adamu pini o’azu Eva be eyini efuzu amvu Edeni ma alearisi ’bori ma vutia ri ndra ngole ya?
  • A’du afa e’do ndra i ’ye yi ma rua ni azini a’du e’yo si ya?
  • Anzi Adamu pini Eva be ’diyi ndra de azini odra a’du e’yo si ya?
  • Adamu pi kaki ndra Yehova ma ti eri Eva be ra, idri ndra ovu yini anzipika yini pie ngoni ya?
  • Bileako Eva niri eji ndra erini rua suza ngoni ni ru ya?
  • Agupianzi oko iri Adamu pini Eva be ’diyi ma ru ndra a’di pi ki ya?
  • Anzi azi e’da ma alea ’diyi a’di piki ya?

Zita o’bazaru ’diyi ki

  • Mi la E’doza 3:​16-​23 azini 4:​1, 2.

    Trita ’bani ndra nyaku trizuri bi ndra i Adamu ma idri be ngoni ngoni ya? (E’do. 3:​17-​19; Rum. 8:​20, 22)

    Ru Eva i ’di ma ifi “idriru i” ’yeke a’du e’yo si ya? (E’do. 3:​20)

    Yehova ega ndra e’yo Adamu pi ma aza kozu Eva be sawa eyini e’yo ezazu ’bori ma vutiarisi geri ngoni le risi ya? (E’do. 3:​7, 21)

  • Mi la E’yo Eceza 21:​3, 4.

    “E’yo oko” mini ta le ne ma deki eyi ra ’diyi ngoki yi ya?