Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 10: Yi Tiza Ambori

A’diko 10: Yi Tiza Ambori

MABURU ma kala amve ria, ’ba riki mu drile afa yini ’ye ’diyi be ekile ndra okorile. A’i kini ndra kini Yi Tiza ni nga imu ra ’dini ri ku. Ecoki ndra ’dele mu oguta be drile drile. Te oguta eyini ri asi ndra mbelearu ra.

’Ba ada azini anyapa yi ni ce kurukuru ’diyi ’ye urisi

Ozoo e’do ndra ’di yini ni kokoru ra. Ri ndra e’de engazu ’bua ekile ’bani yi dazu engazu debe ma alea si rile. Noa nze ndra e’yo adani! Te eri di ndra vule ru tu ’ba azini ni fizu maburu ma alea. Yehova opi ndra kati ni mgbe mgbe ’bo.

Mbelearu angu ele ’diyi ma dria yi ara ’i dria ra. Yi ’da eca ekile yi arale. E’do pati yi oze vaa azini oni ambo ’diyi oli azini fe o’duko amboni ni ikuzu. ’Ba ovuki di ndra ani urisi. Tuki di ndra angu ngurua ria. E’doki di e’yo ega kini eyi kaki ndra Noa mati eri fizu maburu ma alea de nga kati awi nga yini mbgo ria fo! Te isu de eri di vule ru tu.

Yi mu di ndra drile ’i erezu oru. Ozoo ’di ndra engazu ’bua o’du 40 azini ini 40. Ca kpere oni ambo ’diyi ma ageiasi, azini a’bu oni izu izu ’diyi ma dri dria ra. ’Dinile, ndra Munguni ’yole rile, ’ba ada azini anyapa ndra maburu ma alea ku ’diyi odra dria ra. Te ’ba dria maburu ma alea ’diyi awi ndra idriru.

Noa pi ngaki ndra dere azi mukeni ima agupi anzi pie maburu edezu. Yi nga di maburu nderi ’du oru azini awi di yi ma dria oru ’daa. O’du azini alu, ozoo ’diza ni asizu ’bori ma vutia, etu nga e’do ka ra. Angu neza ’da fe ndra ’dele yini osuta ngoni le! Yi ombizokuru ri ndra wudrikuru ma dria dria. Afa ndra ’bani eco ne ra ri ’i lu maburu yi ma dria ’da ’i a’dule.

Maburu yi ma dria

’Ba izu ruabe azini okpobe tu ’diyi di ndra yo. Ecoki di ndra ’bani candi fezu dika ku. Odraki di ndra dria, eyima andripika pie ’ba azi onzi ’diyi pie dria ’bo. Te a’du afa ’ye ndra ’i yima tipika be ni ya?

’Ba izu ruabe azini okpobe tu ’diyi ma tipika ovukini ndra ’ba ada ama le ’diyi ku. Eyi ndra malaika engapi ’bua imupi o’api ’ba yi pie nyakua ’diyi. Ani yi tiza ambori ni imuria, awiki ni ndra odra ’ba azi ’diyi pie ku. Kuki di ndra rua ’ba adani yini ndra ede ’diyi ayuzu ja, daki ndra dri vule ’bua malaika ru. Te Mungu oga ndra di yini ovuzu malaika ini muke ’diyi ma aziru si. Ecaki di ndra ani malaika Satani ni ’diyi ru. Biblia ma alea ’ba yi omve orindi onzi yi.

Mungu fe di ndra oli ni lizu, yi tiza ambori e’do di ndra ani ’i omvi ele. Imba towi ma vutia maburu nga di ndra emu ri oni azini ma dria. O’du azi kakau aliki di vini dika, ’ba maburu ma alea ’diyi edoki di oni azi ’diyi ma dri ne. Yi mu di ndra drile ’i omvizu ele dika.

Noa pe di aria azi iniru ’bani omve kuruke ri ma ti maburu ma alearisi amve. Erini pari rizu mukeni isuzu kurisi, ri onga sawa were te imvi vule. Ri di ndra ’ye ’dile pale kakau erini dri idazu ria eri ndra ri ava li maburu ma dria.

A’balau

Noa le ndra yi nzu nyaku ma dria risi ’bo yari ne, ani nga di a’balau ma ti pe engazu maburu ma alea risi. Te a’balau imvi vini vule erini angu o’azu ni isuzu ku risi. Noa pe ndra vini eri ma ti pale irizurisi, nga di ani pati mizeitu ruri ma bi iji ima tia. Noa nga di ani ni ra kini yi omvi di ’i ele ’bo. Noa pe vini a’balau nderi ma ti pale nazu risi, pale ’disi isu di pari a’wi ini o’azu ni ra.

Mungu nga di e’yo nze Noa be. ’Yo kini: ‘Ifu di maburu ma alea risi amve. I’du ’ba mi vile akua ’diyi dria anyapa pie mi be indi.’ Isu deri ebiki ovu maburu ma alea eli alu ma drilea. Ama ecoki di ega ovuki ndra ayikosi ngoni le eyini ovuzu amve dika azini idriru risi’ari ne ra!

E’doza 7:10-24; 8:1-17; 1 Petero 3:19, 20.



Zita ki

  • Ozoo ni e’dozu ’bo ri ma vutia, ’ba azi aluni econi ndra fi maburu ma alea ku a’du e’yo si ya?
  • Yehova fe ozoo ’di o’du si dika efu si, azini yi ma ali eca di ndra ngopi ya?
  • Yi Tiza ni e’dozu angu ma dri a’buzu ria, a’du ma e’yo ’ye i maburu be ni ya?
  • ’Ba izu izu rua okpo be ’diyi opaki eyi Yi Tiza ma alea ri si ra ya, dika a’du ma e’yo ’ye i tipika eyini okpo be ’diyi pi ma rua ni?
  • Imba towi ma vutia a’du afa ’ye i maburu be ni ya?
  • Asisile Noa ni koreke ma ti pezu amve ri ngoni ya?
  • Noa nga ni yi tiza nzu angu ma dria risi ’bo ri ngoni ngoni ya?
  • Yehova ’yo Noa ni ’ba eri vile akua ’diyi pie ngoni eyi ni o’azu maburu ma alea ogogo eli alu ’bo ri ma vutia?

Zita o’bazaru ’diyi ki

  • Mi la E’doza 7:​10-​24.

    Afa idri be nyakua ’bani ndra dri ja ’diyi ma kalafe ngopi ya? (E’do. 7:​23)

    Yi Tiza ni nzuzu ’du ndra sawa ngopi ya? (E’do. 7:​24)

  • Mi la E’doza 8:​1-​17.

    E’doza 8:​17 e’da asisile Yehova ni okokele ri oja i ku ngoni ngoni ya? (E’do. 1:​22)

  • Mi la 1 Petero 3:​19, 20.

    Malaika ogburundua ru ’diyi ni dri dazu ’bua ’dale ria, ’ba li e’yo eyi ma dria ngoni ya? (Yuda 6)

    E’yo Noa ma dria ’ba eri vile akua ’diyi pie ri okpo fe asi ’baza ama ni oyo soza Yehova ni ngazu ’ba ini ’diyi opazu ri ma dria ngoni ngoni ya? (2 Pet. 2:9)