Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 1: Mungu E’do Afa yi O’ba

A’diko 1: Mungu E’do Afa yi O’ba

AFA dria onyiru amani ovuzu yibe ’diyi enga Mungu vu. Ede ndra etu diza fezu amani etusi, azini imba pi ’bi’bio pie amani diza fezu inisi. Azini Mungu ede ndra nyaku amani ecozu o’azu alenia.

Te etu pi imba pie, ’bi’bio pie azini nyaku pie ovuni ndra afa Munguni o’ba okokele ’diyi ku. Mini afa ndra erini o’ba okokele ri ra ya? Mungu o’ba ndra okorisi ’ba eyi ejipi eribe eji eji ’diyi. Ama econi ’ba ’diyi ne ku, amani ecozu Munguni nezu kurile. Biblia ma alea ’ba ’ba ’diyi omve malaika yi. Mungu o’ba ndra malaika yi o’azu ’i be ’bua.

Malaika ndra Munguni o’ba okokele ri aga ndra azi ’diyi ra. Eri ndra Mungu ma Mva okokeleri ’i, ani nga ndra azi ima Ati be. Ko ndra Mungu ma aza afa azi dria ’diyi o’bazu. Ko ndra Mungu ma aza etu o’bazu, imba o’bazu, ’bi’bio yi o’bazu azini vini nyaku amavu ’di o’bazu.

Nyaku e’da ndra ngoni ya? Okokelerisi ’ba azini eco ndra o’a nyakua ku. Afa ndra nyaku ma dria ri ndra miri ombizoku ruri nyaku ma dria dria. Te Mungu le ndra ’ba ada ma o’aki nyaku ma dria. Asisile ’disi, e’do di ndra afa yi otu amani gonde. ’Ye ndra di a’duni ya?

Okorisi nyaku le ndra diza ni. Ani Mungu fe di ndra diza engapi etu vu rini ecazu kpere nyaku ma dria. Fe ndra eri ’bani ecozu ovuzu etu be azini ini be iritro. ’Da ma vutia, Mungu fe di ndra angu a’wi rini ecozu etuzu miri ombizoku ruri ma dria oru.

Ndra okorisi, afa azi ndra nyaku ma dria yo. Eri ndra trotro e’da mini ne ’dile. Afa azi mawua le, pati le azini anyapa le ’diyi ndra yo. E’bi ndra vini miri ma alea yo. Azi asi ndra Mu ngu ma dria angiri erini ecozu nyaku ’bazu muke ­anyapani azini ’ba adani ­ecozu o’azu drinia beni.

Yeremia 10:12; ’Ba Kolosaia ’Diyi 1:15-17; E’doza 1:1-10.

Nyaku ondo ruri


Zita ki

  • Afa onyiru ’diyi engaki dria ngoa, mi eco eceta alu ni fe ra ya?
  • Afa ndra Munguni o’ba okokele ri a’duni ya?
  • Malaika okokeleri aga ndra azi ’diyi dria ra asisile ngosi ya?
  • Mi o’bi nga nyaku ndra okokele risi ngoni yari ece. (Mi ne i’da.)
  • Mungu e’do ndra nyaku ede gonde anyapa yini ’ba ada pie ngoni ngoni ya?

Zita o’bazaru ’diyi ki

  • Mi la Yeremia 10:12.

    E’yo Munguni ’bani eco nele ku eyi e’dapi o’bataa ma alea ’diyi ngoki ya? (Isa. 40:26; Rum. 11:33)

  • Mi la ’Ba Kolosaia ’Diyi 1:​15-​17.

    Sawa o’bataa vurisi Yesu ’ye ndra a’du afa ni, ani le di ama ma ne eri ngoni ya? (Kol. 1:​15-​17)

  • Mi la E’doza 1:​1-​10.

    Nyaku enga ndra ngoa ya? (E’do. 1:1)

    A’du afa ’ye ndra ’i o’du o’bataa vu okorisi ni ya? (E’do. 1:​3-5)

    Mi ece nga afa ndra ’i yepi o’du irizu o’bataa vurisi ri. (E’do. 1:​7, 8)