Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Aku Mini Eco Ovu Ayikoru Ra

 ESELE 7

Geri Mini Mva Mini Imbazu Ri

Geri Mini Mva Mini Imbazu Ri

“E’yo mani azile mi tia o’du andru ’dorisi ’diyi ma ovu mi asia; mi ma imba yi asi alusi anzi mini dri.”Azita Amvizu 6:6, 7

Yehova ni otuta aku ni e’doria, ’ba ndra tipika yi anzi yini ma drilea. (’Ba Kolosaia ’Diyi 3:20) Eri azi emini tipika ru anzi emini imbazu Yehova ni lezu azini ecozu zozu ’ba kililiri ru. (2 Timoteo 1:5; 3:15) Le vini mi ma ni e’yo mi mvi kaniku zi ma asia ri indi. Adaru, eceta mini e’dale ri orodriru tu. Mi eco e’yo Yehova niri imba mi mva ni kililiru mini eri ’bazu mi asia risi.Zaburi 40:8.

 1 MI MA FE MA OVU EWA KOKORU ANZI MINI NI E’YO NZEZU MI BE

E’YO BIBLIA NI ’YORI: Mi “ma ovu e’yo erizu mbele, e’yo ’yozu e’yere.” (Yakobo 1:19) Mi le fe anzi mini ma ni kini eyi eco e’yo nze mi be ewa kokoru ra. Le eyi ma ni kini mi ngonde e’yo erizu sa eyini lezu e’yo nzezu mi be risi. Mi ma fe aku ma ovu pari asianzu be eyini ecozu e’yo nzezu ewa kokori ru. (Yakobo 3:18) Yi ka ega kini mi nga eca aokosi kaniku yi ma e’yo li, econi nga e’yo eyi ma asia ri ece mini ku. Mi ma ovu asi teza si anzi mini be, azini mi ece yini mi leta asi dria si.Matayo 3:17; 1 ’Ba Korintoa ’Diyi 8:1.

AFA MINI ECO ’YERI:

  • Sa anzi mini ni lezu e’yo nzezu mi be ria, le mi ma co bile yi erizu

  • Mi ma nze e’yo anzi mini be sa driasi, ovuni lu sa e’yo ewaru ni ovuzu eyi be ci risi ku

2 MI O’BI E’YO YINI MA IFI ADARI VA

E’YO BIBLIA NI ’YORI: “’Ba e’yo eripiri nga onyi isu ra.” (E’yo O’beza 16:20) Sa azini si, le mi ma ne angu aga e’yo mi anzi ni nze ’diyi ra ecozu trumu yini ada ’diyi vazu. Tutuni ’ba ode ’diyi fe e’yo were ri ni e’dazu ambo kaniku eri e’yo ndu nze ’i. “’Ba ka e’yo omvi de nga erini e’yoni ku, eri onduaakoru.” (E’yo O’beza 18:13) Le mi ma ’ba aoko mbele mbele ku.E’yo O’beza 19:11.

AFA MINI ECO ’YERI:

  • Anzi mini ’diyi ka tro e’yo ngole ri nze ti, le mi ma ’ba mi asia eyi atrizu kaniku ecazu aoko si ku

  • Mi o’bi mi ma trumu ndra mini ovuzu eyi ma elia ri ega azini afa ndra e’dapi mini orodriru ri a’duni’ari

 3 EMI MA E’DA TI ECITA TUALU RI

E’YO BIBLIA NI ’YORI: “Mva mani, mi eri e’yo mi atini mi imbazuri, mi ga mi andri ma imbata si ku.” (E’yo O’beza 1:8) Yehova fe okpo ovuzu anzi ma drileari ata pi ma dria andre be iritro. Le mi ma imba anzi mini mi inzizu azini mi ti erizu. (’Ba Efesoa ’Diyi 6:1-3) Anzi eco tipika yini ovu ‘icizaru kilili asisile alusi’ ku ri ne ra. (1 ’Ba Korintoa ’Diyi 1:10) Emi ka erita ako isu, emi o’bi eri e’da anzi ma drilea ku, a’dusiku eri nga yi ma inzita emini tipikaru ri omvi.

AFA MINI ECO ’YE RI:

  • Emi ma otu azini emi ma a’i geri emini ngazu dririma fezu emi anzi ni ri

  • Emi ka ovu egaza ndu ndu be geri anzi imbazuri ma dria, le mi o’bi geri mi aje ma azi vuri ne indi

 4 EMI OVU OTUTA BE

E’YO BIBLIANI ’YORI: “Mi ezo mva, eri imbazu ofizu geri ’yekeria.” (E’yo O’beza 22:6) Anzi mini imbazu kililiri ngani i’ye isi ceni ku. Le mi ma ovu otuta imbatani, mini yini dririma fezu indi ri be. (Zaburi 127:4; E’yo O’beza 29:17) Dririma ma ifi ovuni lu panga fezani ku, te anzi mini ma aza kozu asisile azita ’diyi ’bazu ri vazu. (E’yo O’beza 28:7) Mi ma imba vini yi e’yo Yehovani ri lezu azini imbata alenia ’diyi vazu. (Zaburi 1:2) ’Di nga yi ma aza ko asisile kililiri sizu.’Ba Ebraniani 5:14.

AFA MINI ECO ’YERI:

  • Mi ma ’ba okpo nezu kini anzi mini ma ne munguni ’ba yini ecozu asi ’bazu drinia ra ri ru

  • Mi ma ko yima aza e’yo onzi ali ’baza ma dria, ekile isule indaneti ma alea azini pari azi ’diyi be ’diyi onizu azini onazu. Mi ma imba yi geri yini ecozu ’ba lepi ali ’bapi yisi ’diyi onazu risi

“Mi ezo mva, eri imbazu ofizu geri ’yekeria”