Buuka ogende ku bubaka obulimu

Buuka ogende awali menu entono

Buuka ogende awalagibwa ebirimu

Abajulirwa ba Yakuwa

Luganda

Omunaala gw'Omukuumi—Ogw'Okusoma mu Kibiina  |  Jjulaayi 2017

Ebibuuzo Ebiva mu Basomi

Ebibuuzo Ebiva mu Basomi

Kiba kituufu Omukristaayo okuba n’emmundu asobole okugikozesa ng’alumbiddwa abantu abaagala okumutuusaako obulabe?

Wadde ng’Abakristaayo bafuba okwekuuma baleme kutuusibwako bulabe, ekyo bakikola nga bakolera ku misingi egiri mu Bayibuli. Okusinziira ku Bayibuli, Abakristaayo tebasaanidde kukozesa bya kulwanyisa gamba ng’emmundu, bbasitoola, n’ebirala, okwekuuma abantu ababa baagala okubatuusaako obulabe. Lowooza ku misingi gino wammanga:

Mu maaso ga Yakuwa, obulamu, naddala obw’abantu, butukuvu. Bayibuli egamba nti Yakuwa ye “nsibuko y’obulamu.” (Zab. 36:9) N’olwekyo, Omukristaayo bw’aba asalawo ebintu by’anaakola okwekuuma oba okukuuma ebintu bye, afuba okulaba nti ebyo by’asalawo tebiimuviireko kutta muntu n’abaako omusango gw’okuyiwa omusaayi.Ma. 22:8; Zab. 51:14.

Wadde ng’ebintu ebitali bimu omuntu by’ayinza okukozesa okwekuuma biyinza okumuviirako okuyiwa omusaayi, emmundu ekifuula kyangu nnyo okutta omuntu mu butanwa oba mu bugenderevu. * Ate era olw’okuba omuntu akulumbye aba ku bunkenke, bw’akulaba ng’olina emmundu embeera eyinza okwongera okwonooneka ne kiviirako okuyiwa omusaayi.

Mu kiro ekyasembayo Yesu amale attibwe, yagamba abagoberezi be okuba n’ebitala, naye yali tabagamba kuba na bitala bya kwekuumisa. (Luk. 22:36, 38) Yesu yabagamba okuleeta ebitala asobole okubayigiriza nti baali tebasaanidde kukozesa bya kulwanyisa kwerwanako ne bwe kiba nti abo ababa babalumbye balina eby’okulwanyisa. (Luk. 22:52) Peetero bwe  yakozesa ekimu ku bitala n’asalako okutu kw’omuddu wa kabona asinga obukulu, Yesu yamugamba nti: “Zzaayo ekitala kyo mu kifo kyakyo.” Oluvannyuma Yesu yayogera omusingi Abakristaayo gwe bakolerako n’okutuusa leero. Yagamba nti: “Abo bonna abakwata ekitala balittibwa na kitala.”Mat. 26:51, 52.

Okusinziira ku Mikka 4:3, abantu ba Katonda ‘ebitala byabwe babikolamu enkumbi, n’amafumu gaabwe bagakolamu ebiwabyo.’ Ekyo kye bakola kituukagana n’ebigambo bya Pawulo bino: “Temukolanga muntu n’omu kibi olw’okuba abakoze ekibi. . . . Mukolenga kyonna kye musobola okuba mu mirembe n’abantu bonna.” (Bar. 12:17, 18) Pawulo yakolera ku bigambo ebyo wadde nga yayolekagana n’ebizibu gamba ng’okulumbibwa ‘abanyazi.’ Wadde yali tayagala kutuusibwako kabi, ekyo teyakikkiriza kumuleetera kumenya misingi gya Byawandiikibwa. (2 Kol. 11:26) Mu kifo ky’ekyo, yeesiga Katonda n’amagezi agali mu Kigambo kye, amagezi ‘agasinga eby’okulwanyisa.’Mub. 9:18.

Abakristaayo obulamu babutwala nga bwa muwendo nnyo okusinga ebintu. “Ebintu ebingi [omuntu] by’aba nabyo si bye bimuwa obulamu.” (Luk. 12:15) N’olwekyo, singa omuntu alina eky’okulwanyisa alumba Omukristaayo, Omukristaayo n’ayogera n’omuntu oyo mu ngeri ey’obukkakkamu naye omuntu oyo n’agaana okuwuliriza, Omukristaayo akolera ku bigambo bya Yesu bino: “Temulwanyisanga muntu mubi.” Bwe kiba kyetaagisa ayinza okuwa omuntu aba amulumbye ebintu byonna by’aba ayagala okutwala. (Mat. 5:39, 40; Luk. 6:29) * Naye ekisinga obulungi kwe kufuba okwewala okulumbibwa abantu ng’abo. Bwe twewala ‘okweraga olw’ebintu bye tulina mu bulamu’ era ne tufuba okubeera abantu ab’emirembe mu bitundu gye tubeera, kiyinza okutuyamba obutalumbibwa bantu ng’abo.1 Yok. 2:16; Nge. 18:10.

Abakristaayo bafaayo ku muntu ow’omunda ow’abalala. (Bar. 14:21) Singa kimanyibwa nti Omukristaayo alina emmundu gye yeekuumisa okusobola okulwanyisa abantu ababa bamulumbye, kiyinza okukanga oba okwesittaza abamu ku bakkiriza banne. Ne bwe kiba nti mu nsi gye tulimu tukkirizibwa okuba n’emmundu, okwagala kwe tulina eri bakkiriza bannaffe kutukubiriza okwewala okukola ekintu kyonna ekiyinza okubeesittaza.1 Kol. 10:32, 33; 13:4, 5.

Abakristaayo bafuba okuteekawo ekyokulabirako ekirungi. (2 Kol. 4:2; 1 Peet. 5:2, 3) Singa Omukristaayo alina emmundu gye yeekuumisa okulwanyisa abo ababa bamulumbye awabulwa naye n’agaana okugyeggyako, taba kyakulabirako kirungi. N’olwekyo aba talina kuweebwa nkizo yonna oba buvunaanyizibwa bwonna mu kibiina. Ekyo kye kirina n’okukolebwa Omukristaayo akola omulimu oguzingiramu okukwata emmundu. Kiba kirungi Omukristaayo oyo okunoonya omulimu omulala. *

Omukristaayo alina okwesalirawo engeri y’okwekuumamu, okukuuma ab’omu maka ge, n’okukuuma ebintu bye, era alina okwesalirawo mulimu ki gw’anaakola. Naye bw’aba asalawo ku nsonga ezo aba alina okukolera ku misingi gya Bayibuli. Olw’okuba bassa ekitiibwa mu misingi gya Bayibuli, Abakristaayo abakuze mu by’omwoyo beewala okuba n’emmundu ez’okukozesa nga balumbiddwa abantu abaagala okubatuusaako obulabe. Bakimanyi nti bwe beesiga Katonda era ne bakolera ku misingi gya Bayibuli, bajja kuba n’emirembe egya nnamaddala.Zab. 97:10; Nge. 1:33; 2:6, 7.

Mu kiseera ky’ekibonyoobonyo ekinene Abakristaayo tebajja kwerwanako wabula bajja kwesiga Yakuwa okubayamba

^ lup. 3 Omukristaayo ayinza okusalawo okuba n’emmundu ekozesebwa mu kuyigga ebisolo eby’okulya, oba ekozesebwa mu kwekuuma ebisolo eby’obulabe. Naye bwe kiba nti emmundu eyo tagikozesa, kiba kya magezi obutagiteekamu masasi oba okugipangulula n’agitereka wala. Bwe kiba nti ensi Omukristaayo gy’alimu tekikkirizibwa kuba na mmundu oba nga bantu bamu na bamu be bakkirizibwa okuba nazo, Omukristaayo alina okugondera amateeka ago.Bar. 13:1.

^ lup. 2 Okumanya ebyo by’oyinza okukola nga waliwo ayagala okukukwata, laba Awake! eya Maaki 8, 1993, lup. 6-8.

^ lup. 4 Okumanya ebisingawo ebikwata ku kukola emirimu egizingiramu okukwata emmundu, laba Watchtower eya Noovemba 1, 2005, lup. 31; n’eya Jjulaayi 15, 1983, lup. 25-26.