Buuka ogende ku bubaka obulimu

Buuka ogende awalagibwa ebirimu

Abajulirwa ba Yakuwa

Londa olulimi Luganda

Essanyu—Ngeri Gye Tufuna Okuva eri Katonda

Essanyu—Ngeri Gye Tufuna Okuva eri Katonda

ABANTU bonna baagala okuba abasanyufu. Naye mu nnaku zino ez’enkomerero ffenna twolekagana n’embeera enzibu ennyo. (2 Tim. 3:1) Obutali bwenkanya, endwadde, ebbula ly’emirimu, okufiirwa, n’ebirala ebiringa ebyo bisobola okuleetera abamu okuggweebwako essanyu. N’abaweereza ba Katonda bayinza okuggwaamu amaanyi ne kibaviirako okuggweebwako essanyu. Bw’oba oli mu mbeera ng’eyo, oyinza otya okuddamu okufuna essanyu?

Okusobola okuddamu ekibuuzo ekyo, tugenda kusooka tulabe essanyu erya nnamaddala kye ki, n’engeri abamu gye basobodde okusigala nga basanyufu wadde nga boolekagana n’ebizibu eby’amaanyi. Era tugenda kulaba bye tuyinza okukola okusobola okusigala nga tuli basanyufu n’engeri gye tusobola okwongera ku ssanyu lye tulina.

ESSANYU KYE KI?

Omuntu okubeera awo ng’acaamuukiridde oba ng’aseka si kye kiraga nti musanyufu. Ng’ekyokulabirako: Omuntu bw’amala okunywa omwenge n’atamiira, ayinza okutandika okusekaaseka. Naye omwenge bwe gumuggwaako, alekera awo okuseka, era ayinza okuddamu okunakuwala olw’ebizibu by’aba alina. Okuba nti abadde aseka kibadde tekiraga nti abadde n’essanyu erya nnamaddala.​—Nge. 14:13.

Essanyu ngeri eviira ddala ku mutima. “Nneewulira omuntu gy’aba nayo ng’afunye oba ng’asuubira ekintu ekirungi.” Essanyu nneewulira omuntu gy’aba nayo k’abe mu mbeera nnungi oba mbi. (1 Bas. 1:6) Mu butuufu omuntu ayinza okuba n’ekizibu ekimutawaanya naye n’asigala ng’alina essanyu ku mutima. Ng’ekyokulabirako, abatume baabakuba emiggo olw’okwogera ku Kristo. Naye baava “mu maaso g’Olukiiko Olukulu olw’Abayudaaya nga basanyuka olw’okuba Katonda yali abawadde enkizo okuweebuulwa olw’erinnya lya Yesu.” (Bik. 5:41) Kya lwatu nti baali tebasanyuka olw’emiggo gye baali babakubye. Naye baasanyuka olw’okuba baali basigadde nga beesigwa eri Katonda.

Essanyu ng’eryo tetuzaalibwa nalyo, era terijja lyokka. Lwaki? Kubanga essanyu erya nnamaddala y’emu ku ngeri eziri mu kibala ky’omwoyo omutukuvu. Omwoyo gwa Katonda gutuyamba okwambala “omuntu omuggya” era ng’ezimu ku ngeri z’omuntu omuggya ly’essanyu. (Bef. 4:24; Bag. 5:22) Bwe tuba n’essanyu, kituyamba okwaŋŋanga ebizibu bye tufuna mu bulamu.

EBYOKULABIRAKO EBIRUNGI

Yakuwa yayagala ensi ebeemu ebintu ebirungi so si ebintu ebibi bye tulaba leero. Kyokka ebintu ebibi ababi bye bakola tebimalaako Yakuwa ssanyu. Ekigambo kya Katonda kigamba nti: “Amaanyi n’essanyu biri w’abeera.” (1 Byom. 16:27) Ate era ebintu ebirungi abaweereza ba Yakuwa bye bakola ‘bisanyusa omutima gwe.’​—Nge. 27:11.

Naffe tusobola okukoppa Yakuwa nga tetumalira birowoozo byaffe ku bintu ebiba bitagenze nga bwe tubadde tusuubira. Mu kifo ky’okuleka ebintu ebyo okutumalako essanyu, tusaanidde okumalira ebirowoozo byaffe ku bintu ebirungi bye tulina kati era nga bwe tulindirira n’obugumiikiriza ebintu ebirungi ebigenda okujja. *

 Mu Bayibuli mulimu ebyokulabirako bingi eby’abantu abaasigala nga basanyufu wadde nga baali boolekagana n’embeera enzibu. Ibulayimu y’omu ku bantu abaagumiikiriza embeera enzibu ezaaleetebwawo abantu abalala. (Lub. 12:10-20; 14:8-16; 16:4, 5; 20:1-18; 21:8, 9) Wadde nga yayolekagana n’embeera ezo enzibu, Ibulayimu yasigala alina essanyu ku mutima. Kiki ekyamuyamba? Yakuumira ebirowoozo bye ku ssuubi ery’okubeera mu nsi empya efugibwa Masiya. (Lub. 22:15-18; Beb. 11:10) Yesu yagamba nti: “Ibulayimu kitammwe yasanyuka nnyo olw’essuubi ery’okulaba olunaku lwange.” (Yok. 8:56) Tusobola okukoppa Ibulayimu nga tufumiitiriza ku bintu ebirungi ebigenda okubaawo mu biseera eby’omu maaso.​—Bar. 8:21.

Okufaananako Ibulayimu, omutume Pawulo ne Siira baakuumira ebirowoozo byabwe ku bisuubizo bya Katonda. Baalina okukkiriza okunywevu, era baasigala nga basanyufu wadde nga baayolekagana n’embeera enzibu. Ng’ekyokulabirako, oluvannyuma lw’okukubibwa ennyo era ne basibibwa mu kkomera, ‘ekiro mu ttumbi, Pawulo ne Siira baasaba era ne bayimba ennyimba ezitendereza Katonda.’ (Bik. 16:23-25) Ng’oggyeeko okuba nti essuubi lyabwe lyabanyweza, Pawulo ne Siira baasanyuka kubanga baali babonaabona olw’erinnya lya Kristo. Okufaananako Pawulo ne Siira, naffe tusaanidde okussa ebirowoozo byaffe ku bintu ebirungi ebiva mu kuweereza Katonda n’obwesigwa.​—Baf. 1:12-14.

Leero bakkiriza bannaffe bangi abasigadde nga basanyufu wadde nga boolekaganye n’ebizibu eby’amaanyi. Ng’ekyokulabirako, mu Noovemba 2013, omuyaga ogw’amaanyi oguyitibwa Haiyan gwayita mu kitundu eky’omu masekkati ga Philippines, ne gwonoona amayumba g’Abajulirwa ba Yakuwa abasukka mu 1,000. Ow’oluganda George, eyalina ennyumba mu kibuga Tacloban eyasaanawo yagamba nti: “Wadde ng’ekizibu kino kya maanyi nnyo, ab’oluganda basanyufu. Sisobola kunnyonnyola ssanyu lye tulina.” Bwe tufuna ebizibu, tusobola okusigala nga tuli basanyufu singa tufumiitiriza ku birungi Yakuwa by’aba atukoledde. Bintu ki ebirala Yakuwa by’atuwadde ebituleetera essanyu?

EBITULEETERA ESSANYU

Ekintu ekisinga okutuleetera essanyu ye nkolagana yaffe ne Katonda. Lowooza ku kino: Tumanyi Omufuzi w’Obutonde Bwonna. Ye Katonda waffe, Kitaffe, era Mukwano gwaffe!​—Zab. 71:17, 18.

Ate era tusiima nnyo ekirabo eky’obulamu Yakuwa kye yatuwa n’obusobozi bwe yatuwa obw’okukinyumirwa. (Mub. 3:12, 13) Olw’okuba Yakuwa yatusembeza gy’ali, tumanyi ebyo by’atwagaliza n’engeri gy’ayagala tweyiseemu. (Bak. 1:9, 10) Ekyo kituyambye okuba n’obulamu obw’amakulu. Abantu abasinga obungi tebamanyi kigendererwa kya bulamu. Ng’alaga enjawulo eriwo wakati w’abo abamanyi Yakuwa n’abo abatamumanyi, Pawulo yagamba nti: “‘Eriiso terirabye, n’okutu tekuwulidde, n’omutima gw’omuntu tegulowoozezza ku bintu Katonda by’ategekedde abo abamwagala.’ Ffe Katonda abitubikkulidde okuyitira mu mwoyo gwe.” (1 Kol. 2:9, 10) Mu butuufu, kitusanyusa nnyo okumanya ebyo Yakuwa by’ayagala n’ekigendererwa kye.

Ate era lowooza ku bintu ebirala Yakuwa by’atukoledde. Yakuwa atusonyiwa ebibi byaffe era ekyo kituleetera essanyu. (1 Yok. 2:12) Olw’okuba Yakuwa atulaze obusaasizi, tulina essuubi ery’okubeera mu nsi ye empya eneetera okutuuka. (Bar. 12:12) Ate era Yakuwa atuwadde ne bakkiriza bannaffe abatwagala ennyo. (Zab. 133:1) Ekigambo kya Katonda era kiraga nti Yakuwa akuuma abantu be Sitaani ne badayimooni ne batabakolako kabi. (Zab. 91:11) Bwe tufumiitiriza ku birungi ebyo byonna Katonda by’atukolera, essanyu lyaffe lijja kweyongera.​—Baf. 4:4.

ENGERI GYE TUYINZA OKWONGERA KU SSANYU LYAFFE

Omukristaayo omusanyufu asobola okwongera ku ssanyu lye? Yesu yagamba nti: “Mbabuulidde ebintu bino, essanyu lyange lisobole okubeera mu mmwe era essanyu lyammwe libeere lijjuvu.” (Yok. 15:11) Ebigambo ebyo biraga nti  tusobola okwongera ku ssanyu lye tulina. Ebyo by’okola okwongera ku ssanyu ly’olina bisobola okugeraageranyizibwa ku kuseesa mu muliro. Okusobola okwongera ku bungi bw’omuliro, oba olina okugwongeramu enku. Mu ngeri y’emu, okusobola okwongera ku ssanyu ly’olina olina okweriisa mu by’omwoyo. Kijjukire nti: Omwoyo gwa Yakuwa omutukuvu gwe guleetera omuntu okuba omusanyufu. N’olwekyo okusobola okwongera ku ssanyu ly’olina olina okusaba Yakuwa obutayosa akuwe omwoyo gwe era olina n’okufumiitiriza ku ebyo by’osoma mu Kigambo kye ekyaluŋŋamizibwa omwoyo omutukuvu.​—Zab. 1:1, 2; Luk. 11:13.

Era osobola okwongera ku ssanyu ly’olina nga weenyigira mu bujjuvu mu bintu ebisanyusa Yakuwa. (Zab. 35:27; 112:1) Lwaki? Kubanga twatondebwa nga tulina ‘okutyanga Katonda ow’amazima n’okukwatanga ebiragiro bye, kubanga ekyo omuntu ky’ateekeddwa okukola.’ (Mub. 12:13) Twatondebwa nga tulina okukola Katonda by’ayagala. N’olwekyo, bwe tuweereza Yakuwa tufuna essanyu erya nnamaddala mu bulamu. *

EBIRUNGI EBIVA MU SSANYU

Bwe tufuna essanyu eriva eri Katonda, tujja kufuna emiganyulo emirala mingi. Ng’ekyokulabirako, tujja kweyongera okusanyusa Kitaffe ali mu ggulu olw’okuba tujja kuba tumuweereza nga tuli basanyufu, ka tube nga tufunye kizibu kya ngeri ki. (Ma. 16:15; 1 Bas. 5:16-18) Ate era bwe tuba n’essanyu erya nnaddala, tujja kwewala omwoyo gw’okwagala ebintu era tujja kufuba okubaako bye twefiiriza okusobola okwemalira ku mirimu gy’Obwakabaka bwa Katonda. (Mat. 13:44) Era bwe tulaba ebirungi ebiva mu mwoyo ogw’okwefiiriza, essanyu lyaffe lijja kweyongera, tujja kuwulira bulungi, era tujja kuleetera n’abalala essanyu.​—Bik. 20:35; Baf. 1:3-5.

Omuyivu omu eyasomerera eby’obulamu ku yunivasite y’e Nebraska mu Amerika yagamba nti: “Bw’oba oli musanyufu kati era ng’oli mumativu, oba olina emikisa mingi egy’okuba n’obulamu obulungi mu biseera eby’omu maaso.” Ebigambo ebyo bikwatagana bulungi n’ekyo Bayibuli ky’egamba. Egamba nti: “Omutima omusanyufu ddagala ddungi.” (Nge. 17:22) Bw’oyongera ku ssanyu ly’olina, kisobola okukuyamba okuba n’obulamu obulungi.

N’olwekyo, wadde nga tuli mu biseera bizibu nnyo, tusobola okufuna essanyu erya nnamaddala bwe tufuna omwoyo omutukuvu okuyitira mu kusaba, okwesomesa, n’okufumiitiriza ku Kigambo kya Yakuwa. Era tusobola okwongera ku ssanyu lye tulina bwe tufumiitiriza ku mikisa gye tulina kati, bwe tukoppa okukkiriza kw’abalala, era bwe tufuba okukola Katonda by’ayagala. Bwe tukola tutyo, tujja kulaba obutuufu bw’ebigambo ebiri mu Zabbuli 64:10, awagamba nti: “Omutuukirivu ajja kusanyuka olw’ebyo Yakuwa by’amukoledde era ajja kuddukira gy’ali.”

^ lup. 10 Engeri ey’obugumiikiriza ejja kwogerwako mu kitundu ekimu ekijja okujja mu maaso awo.

^ lup. 20 Okumanya ebirala ebisobola okukuyamba okwongera ku ssanyu ly’olina laba akasanduuko “ Ebirala Ebisobola Okukuyamba Okwongera ku Ssanyu Lyo.”