OLINAYO omuntu gw’omanyi nga buli kiseera y’ayagala okusooka banne?— Ayinza okusindika abalala asobole okukulembera mu layini. Ekyo wali okirabyeko?— Omuyigiriza Omukulu yalaba n’abantu abakulu nga baagala okwesooka ebifo eby’omu maaso oba eby’ekitiibwa. Era ekyo tekyamusanyusa. Ka tulabe ekyaliwo.

Wali olabye abantu abaagala okusooka bannaabwe?

Bayibuli etutegeeza nti Yesu yayitibwa ku kijjulo mu maka g’omusajja Omufalisaayo, eyali omukulembeze w’eddiini. Yesu bwe yatuukayo, yalaba abagenyi abalala nga bayingira era nga beeroboza ebifo ebisooka mu maaso. N’olwekyo abo abaali bayitiddwa ku kijjulo yabawa ekyokulabirako. Wandyagadde okukimanya?—

 Yesu yagamba nti: ‘Omuntu bw’akuyitanga ku kijjulo, totuulanga mu kifo ekisooka oba ekyo ekisinga okuba eky’ekitiibwa.’ Omanyi lwaki Yesu yagamba bw’atyo?— Yagamba bw’atyo, olw’okuba wayinza okubaawo omuntu akusinga ekitiibwa eyayitiddwa. N’olwekyo, nga bw’olaba mu kifaananyi kino, oyo agabula ekijjulo ajja n’agamba nti: ‘Leka ono atuule wano, ggwe genda otuule eri.’ Omugenyi oyo awulira atya?— Ajja kuswala kubanga abagenyi abalala bajja kumulaba ng’agenda okutuula mu kifo ekisembayo.

Yesu yali alaga nti tekiba kirungi okweyagaliza ekifo ekisingayo obulungi. N’olwekyo yagamba nti: ‘Bw’oyitibwanga ku kijjulo, ogendanga n’otuula mu kifo ekisembayo emabega. Oyo akuyise ayinza okujja n’akugamba nti, “Mukwano gwange, weeyongere eno awasooka.” Awo ojja kuba n’ekitiibwa mu maaso g’abagenyi abalala ng’ogenda okutuula mu kifo ekisingako obulungi.’Lukka 14:1, 7-11.

Kiki Yesu kye yali ayigiriza bwe yawa ekyokulabirako ekikwata ku abo abaagala okutuula mu bifo ebisingayo okuba eby’ekitiibwa, oba ebisooka?

Otegedde ensonga enkulu eyali mu ekyo Yesu kye yayogera?— Ka tuweeyo ekyokulabirako tulabe obanga otegedde ensonga eyo. Kuba akafaananyi ng’olinnya bbaasi erimu abantu abangi. Wandyanguye okufuna aw’okutuula n’oleka abantu abakulu okuyimirira?— Yesu yandisanyuse singa okola bw’otyo?—

Abamu bayinza okugamba nti Yesu teyeefiirayo n’akamu ku ebyo bye tukola. Naye ekyo okikkiriza?— Yesu bwe yali ku kijjulo ekyali mu maka g’Omufalisaayo, yeetegereza abantu nga beeroboza ebifo eby’okutuulamu. Ne leero olowooza teyeetegereza ebyo bye tukola?— Olw’okuba kati Yesu ali mu ggulu, asobola bulungi okulaba ebyo bye tukola.

 Omuntu bw’ayagala okusooka banne, kisobola okuvaamu ebizibu. Wayinza okubaawo okukaayana, abamu ne banyiigira bannaabwe. Oluusi ekyo kibaawo ng’abaana bagenda kutambulira wamu mu bbaasi. Amangu ddala ng’enzigi za bbaasi zigguddwaawo, abaana badduka basooke bannaabwe okuyingira. Baba baagala beesooke ebifo ebisingayo obulungi ebiri okumpi n’amadirisa. Kiki ekiyinza okubaawo?— Yee, abamu bayinza okunyiigira bannaabwe.

Okwagala okuba nga gwe asooka kiyinza okuvaamu ebizibu bingi. Kyaleetera n’abatume ba Yesu okukaayana. Nga bwe twayiga mu Ssuula 6 mu kitabo kino, baakaayana bokka na bokka ani ku bo asinga obukulu. Kiki Yesu kye yakola?— Yee, yababuulirira. Naye oluvannyuma baddamu okukaayana. Ka tulabe engeri gye kwatandikamu.

Abatume n’abantu abalala baali batambulira wamu ne Yesu omulundi ogwasembayo  ng’agenda mu kibuga ky’e Yerusaalemi. Yesu yali ababuulidde ebikwata ku Bwakabaka bwe, n’olwekyo Yakobo ne Yokaana baali balowooza ku ky’okufugira awamu naye nga bakabaka. Era kino baali bakibuuliddeko ne maama waabwe Saalome. (Matayo 27:56; Makko 15:40) N’olwekyo bwe baali bagenda e Yerusaalemi, Saalome yajja eri Yesu, n’avunnama mu maaso ge ng’ayagala Yesu abeeko ky’amukolera.

Yesu yamubuuza nti: “Kiki ky’oyagala?” Yamuddamu nti yandyagadde Yesu akkirize abaana be bombi batuule okumpi naye mu Bwakabaka bwe, omu ku mukono gwe ogwa ddyo ate omulala ku mukono gwe ogwa kkono. Olowooza Abatume abalala ekkumi baawulira batya bwe baamanya ekyo Yakobo ne Yokaana kye baali batumye maama waabwe okusaba Yesu?—

Kiki Saalome ky’asaba Yesu, era kiki ekyadirira?

Yee, baanyiigira nnyo Yakobo ne Yokaana. Ekyo kyaleetera Yesu okubuulirira abayigirizwa be bonna. Yabagamba nti abafuzi b’ensi  baagala nnyo ekitiibwa. Baagala nnyo ebifo ebya waggulu nga buli omu abagondera. Naye Yesu yagamba abagoberezi be nti tebasaanidde kuba ng’abafuzi b’ensi. Yabagamba nti: “Buli ayagala okubeera ow’olubereberye mu mmwe ateekeddwa okubeera omuddu wammwe.” Ebigambo ebyo birowoozeeko!Matayo 20:20-28.

Omanyi ekyo omuddu ky’akola?— Aweereza abantu abalala nga tasuubira kuweerezebwa. Atuula mu kifo ekisembayo so si ekisooka. Yeeyisa ng’omuntu asembayo okuba owa wansi so si oyo asingayo okuba ow’ekitiibwa. Era jjukira nti Yesu yagamba nti oyo ayagala okuba ow’olubereberye asaanidde okuweereza abalala ng’omuddu.

Olowooza ekyo kituyigiriza ki?— Omuddu asobola okukaayana ne mukama we ku ani asaanidde okutuula mu kifo ekisingayo obulungi? Oba ayinza okukaayana naye ku ani asaanidde okusooka okulya? Olowooza otya?— Yesu yagamba nti omuddu bulijjo akulembeza bya mukama we so si ebibyeLukka 17:7-10.

N’olwekyo mu kifo ky’okwagala okusooka abalala, kiki kye twandikoze?— Yee, tusaanidde okuba ng’abaddu nga tuweereza abalala. Tusaanidde okukulembeza eby’abalala so si ebyaffe. Era abalala tusaanidde okubatwala nga bakitiibwa okutusinga. Osobola okulowooza ku ngeri gy’oyinza okukulembezaamu eby’abalala?— Lwaki tobikkula ku lupapula olwa 40 ne 41 n’olaba engeri gy’oyinza okukulembezaamu eby’abalala ng’obakolera ebirungi.

Kijjukire nti n’Omuyigiriza Omukulu yakulembezanga eby’abalala ng’abakolera ebirungi. Mu kiro ekyasembayo ng’ali wamu n’abatume be, yafukamira n’anaaza ebigere byabwe. Naffe bwe tukulembeza eby’abalala nga tubakolera ebirungi, tujja kusanyusa Omuyigiriza Omukulu ne kitaawe, Yakuwa Katonda.

Ka tusome ebyawandiikibwa ebirala ebitukubiriza okukulembeza eby’abalala mu kifo ky’okukulembeza ebyaffe: Lukka 9:48; Abaruumi 12:3; ne Abafiripi 2:3, 4.