OYINZA okuba ng’okimanyi nti leero abantu bakaddiwa, balwala, era bafa. N’abaana bafa. Wanditidde okufa oba omuntu yenna afudde?— Omanyi ekitutuukako bwe tufa?—

Mu kiseera kyaffe, tewali muntu n’omu eyali afudde n’azuukira n’atubuulira ekyo ekibaawo ng’omuntu afudde. Naye Yesu, Omuyigiriza Omukulu we yabeerera ku nsi, waaliwo omusajja eyali afudde n’azuukira. Bwe tusoma ebikwata ku musajja oyo, tusobola okumanya ekituuka ku bafu. Omusajja oyo yali mukwano gwa Yesu era yali abeera mu Bessaniya, akabuga akaali okumpi ne Yerusaalemi. Yali ayitibwa Lazaalo, era yalina bannyina ng’omu bamuyita Maliza ate ng’omulala ye Maliyamu. Ka tulabe Bayibuli ky’eyogera ku ekyo ekyaliwo.

Lumu Lazaalo yalwala nnyo. Mu kiseera ekyo, Yesu yali wala nnyo. N’olwekyo, Maliyamu ne Maliza baatuma omubaka okugamba Yesu nti Mwannyinaabwe Lazaalo, mulwadde. Ekyo baakikola kubanga baali bamanyi nti Yesu asobola okujja n’awonya mwannyinaabwe. Yesu teyali musawo, naye yalina amaanyi okuva eri Katonda agaamusobozesanga okuwonya endwadde eza buli ngeri.Matayo 15:30, 31.

Kyokka, Yesu bwe yali nga tannagenda kulaba Lazaalo, obulwadde bweyongera okuluma Lazaalo era n’afa. Naye Yesu yagamba abayigirizwa be nti Lazaalo yeebase era nti yali agenda kugendayo amuzuukuse. Naye abayigirizwa tebaategeera ekyo Yesu kye yali abagamba. N’olwekyo Yesu yabagamba kaati nti: “Lazaalo afudde.”  Kino kituyamba kutegeera ki ku kufa?— Yee, kituyamba okutegeera nti okufa kulinga okwebaka otulo otw’amaanyi. Otulo otwo tuba tw’amaanyi nnyo nga n’okuloota toloota.

Oluvannyuma Yesu yagenda okukyalira Maliza ne Maliyamu. Bangi ku mikwano gyabwe baali bamaze okutuuka. Baali bazze okukubagiza Maliyamu ne Maliza olw’okufiirwa mwannyinaabwe. Maliza bwe yawulira nti Yesu ajja, yagenda n’amusisinkana. Oluvannyuma lw’akaseera katono, ne Maliyamu yagenda okusisinkana Yesu. Yali munakuwavu nnyo era ng’akaaba era yagwa ku bigere bya Yesu. Ne mikwano gya Maliyamu abaali bamugoberera nabo baali bakaaba.

Omuyigiriza omukulu yabuuza gye baali baziise Lazaalo. Awo, abantu baatwala Yesu ku mpuku gye baali baziise Lazaalo. Yesu bwe yalaba abantu bonna nga bakaaba, naye n’atandika okukaaba. Yali akimanyi nti kiruma nnyo okufiirwa omuntu gw’oyagala.

Ku mulyango gw’empuku waaliwo ejjinja, n’olwekyo Yesu yagamba nti: “Muggyewo ejjinja.” Naye kyali kyetaagisa okuliggyawo?— Maliza yali alowooza nti tekyetaagisa. Yagamba nti: “Mukama wange, kati ateekwa okuba ng’awunya, kubanga yaakamala ennaku nnya.”

Naye Yesu yamugamba nti: “Saakugambye nti bw’onokkiriza ojja kulaba ekitiibwa kya Katonda?” Yesu yali ategeeza nti Maliza yali agenda okulaba ekintu ekyandireetedde Katonda okuweebwa ekitiibwa. Kiki Yesu kye yali agenda okukola? Ejjinja bwe lyaggibwawo, Yesu yasaba Yakuwa mu ddoboozi ery’omwanguka. Bwe yamala okusaba, n’ayogera mu ddoboozi ery’omwanguka nti: “Lazaalo, fuluma oggye!” Ddala yandisobodde okufuluma?—

Osobola okuzuukusa omuntu eyeebase?— Yee, singa omuyita mu ddoboozi ery’omwanguka, asobola okuzuukuka. Naye osobola okuzuukusa  omuntu afudde?— Nedda. Ne bw’omuyita mu ddoboozi ery’omwanguka, tayinza kuwulira. Tewali muntu yenna ku nsi k’abe ggwe oba nze, ayinza okuzuukusa omuntu afudde.

Kiki Yesu ky’akoledde Lazaalo?

Naye Yesu yali wa njawulo. Yalina amaanyi ag’enjawulo okuva eri Katonda. N’olwekyo Yesu bwe yayita Lazaalo, waliwo ekintu ekyewuunyisa ekyabaawo. Omusajja eyali amaze ennaku ennya nga mufu yava mu ntaana! Yaddamu okuba omulamu! Yaddamu okussa, okutambula, era n’okwogera! Mazima ddala Lazaalo yali azuukiziddwa okuva mu bafu.Yokaana 11:1-44.

Kati kirowoozeeko: Kiki ekyatuuka ku Lazaalo bwe yali ng’afudde? Waliwo ekintu ekyamuvaamu ne kisigala nga kiramu? Laazaalo yali agenze mu ggulu? Yali wamu ne Katonda mu ggulu ne bamalayika be okumala ennaku ezo ennya?—

 Nedda. Kijjukire, Yesu yagamba nti Lazaalo yali yeebase. Bw’oba weebase, obeera mu mbeera ki? Bw’oba ng’oli mu tulo otw’amaanyi, oba tomanyi kigenda mu maaso, si bwe kiri?— Era bw’ozuukuka, tomanya kiseera ky’oba omaze nga weebase okuggyako ng’okebedde ku ssaawa.

Bwe kityo bwe kiba ng’omuntu afudde. Aba taliiko ky’amanyi. Talina kintu kyonna ky’awulira. Era talina kintu kyonna ky’ayinza kukola. Lazaalo bw’atyo bwe yali ng’afudde. Okufa kufaananako omuntu okwebaka otulo otw’amaanyi nga talina kintu kyonna ky’ajjukira. Bayibuli egamba nti: “Abafu tebaliiko kye bamanyi.”Omubuulizi 9:5, 10.

Lazaalo yali mu mbeera ki ng’afudde?

Lowooza ne ku kino: Bwe kiba nti Lazaalo yali mu ggulu okumala ennaku ezo ennya, yandibadde tabaako ky’ayogera ku ekyo?— Era bwe kiba nti yali mu ggulu, Yesu yandimuggye mu kifo ekyo ekirungi n’amukomyawo ku nsi?— Kya lwatu nedda!

Naye abantu bangi bagamba nti omuntu bw’afa waliwo ekintu ekimuvaamu ne kisigala nga kiramu. Bagamba nti Lazaalo alina gye  yali nga mulamu. Naye Bayibuli tegamba bw’etyo, wabula egamba nti Adamu bwe yayonoona, yafa. Yali takyalina kintu kyonna ky’amanyi. Yadda mu ttaka mwe yava. Era Bayibuli egamba nti abaana n’abazzukulu ba Adamu bonna baasikira ekibi n’okufa.Olubereberye 3:17-19; Abaruumi 5:12.

Lwaki tetusaanidde kutya bafu?

Abantu abamu batya abafu. Batya okugenda awali amalaalo kubanga balowooza nti waliwo ekintu ekiwonawo ng’omuntu afudde ekisobola okubakolako akabi. Naye ddala omuntu afudde asobola okutuusa akabi ku muntu omulamu?— Nedda.

Abantu abamu balowooza nti abafu bafuuka emizimu ne bakomawo. Bwe kityo, babaako we babateera eby’okulya. Naye abantu abakola ekyo, baba tebakkiriza ekyo Katonda ky’ayogera ku bafu. Singa tukkiriza ekyo Katonda ky’agamba, tetujja kutya bafu. Era bwe tuba tusiima Katonda olw’obulamu bw’atuwa, tujja kukiraga nga tukola ebyo by’ayagala.

Naye oyinza okwebuuza nti: ‘Katonda alizuukiza abaana abaafa? Ddala ayagala okubazuukiza? Ekyo ka tukyogereko mu ssuula eddako.

Ka tusome ebyawandiikibwa ebirala ebyogera ku mbeera y’abafu, Zabbuli 115:17; 146:3, 4; ne Yeremiya 2:34.