Buuka ogende ku bubaka obulimu

Buuka ogende awali menu entono

Buuka ogende awalagibwa ebirimu

Abajulirwa ba Yakuwa

Luganda

Yigira ku Muyigiriza Omukulu

 ESSUULA 42

Ensonga Lwaki Tusaanidde Okukola

Ensonga Lwaki Tusaanidde Okukola

KIKI ky’osinga okwagala, kukola oba kuzannya?— Mu butuufu, si kibi okuzannya. Bayibuli yagamba nti Yerusaalemi ‘yalimu abalenzi n’abawala nga bazannyira mu nguudo zaakyo.’Zekkaliya 8:5.

Omuyigiriza Omukulu yanyumirwanga nnyo okulaba abaana nga bazannya. Bwe yali nga tannajja ku nsi, yagamba nti: ‘Nnali kumpi ne Katonda ng’omukozi omukugu nga bulijjo nsanyukira mu maaso ge.’ Weetegereze nti Yesu yali akolera wamu ne Yakuwa mu ggulu. Era bwe yali mu ggulu, yagamba nti: ‘Nnayagalanga nnyo abaana b’abantu.’ Yee, nga bwe twayiga emabegako mu kitabo kino, Omuyigiriza Omukulu yayagalanga nnyo abantu, nga  mw’otwalidde n’abaana abato.Engero 8:30, 31.

Kiki Omuyigiriza Omukulu kye yanyumirwanga nga tannajja ku nsi?

Olowooza Yesu bwe yali omuto yazannyanga?— Kiyinzika okuba nga yazannyanga. Naye bwe kiba nti yali ‘mukozi mukugu’ ng’ali mu ggulu, olowooza ne ku nsi yakolanga?— Yesu yali ayitibwa “mwana w’omubazzi.” Era yali ayitibwa “mubazzi.” Kino kiraga ki?— Kiraga nti Yusufu, eyakuza Yesu, ateekwa okuba nga yamuyigiriza omulimu ogwo. Bwe kityo ne Yesu yafuuka mubazzi.Matayo 13:55; Makko 6:3.

Yesu yali mubazzi wa ngeri ki?— Bwe kiba nti yali mukozi mukugu ng’ali mu ggulu, olowooza ne ku nsi teyali mubazzi mukugu?— Lowooza ku buzibu obwali mu kukola omulimu gw’obubazzi mu kiseera ekyo. Yesu ayinza  okuba nga yagendanga n’atema emiti, n’agisalamu embaawo, n’azireeta awaka, oluvannyuma n’azibajjamu emmeeza, entebe, n’ebintu ebirala.

Olowooza omulimu guno gwasanyusa Yesu?— Kyandikusanyusizza singa okolera abantu emmeeza n’entebe ennungi n’ebintu ebirala eby’okukozesa?— Bayibuli egamba nti kirungi omuntu “okusanyukiranga emirimu gye.” Okukola kutusobozesa okufuna essanyu lye tutayinza kufuna mu kuzannya.Omubuulizi 3:22.

Mu butuufu, okukola kwa muganyulo eri emibiri gyaffe n’ebirowoozo byaffe. Abaana bangi bazannya buzannyi ne mikwano gyabwe, n’ekivaamu bafuuka bagayaavu, ba ddalu, era tebaba basanyufu. Era tebaleetera n’abalala ssanyu. Kiki kye twetaaga okukola okusobola okuba abasanyufu?—

Mu Ssuula 17 ey’ekitabo kino, twayiga nti okugaba n’okuyamba abalala bireeta essanyu. (Ebikolwa 20:35) Bayibuli eyita Yakuwa “Katonda omusanyufu.” (1 Timoseewo 1:11) Era nga bwe twasomye mu Engero, bulijjo Yesu ‘yasanyukiranga mu maaso ga Yakuwa.’ Lwaki Yesu yali musanyufu?— Yesu yawa emu ku nsonga bwe yagamba nti: “N’okutuusa kaakano Kitange akola, era nange nkola.”Yokaana 5:17.

Yesu bwe yali ku nsi, teyakola mulimu gwa bubazzi obulamu bwe bwonna. Yakuwa Katonda yali amutegekedde omulimu omukulu ennyo ogw’okukola ku nsi. Omulimu ogwo ogumanyi?— Yesu yagamba nti: “Nnina okubuulira amawulire amalungi ag’obwakabaka bwa Katonda ne mu bibuga ebirala, kubanga nnatumibwa lwa nsonga eyo.” (Lukka 4:43) Emirundi egimu Yesu bwe yabuuliranga abantu, bakkirizanga ebyo bye yayogera era ne babibuulirako n’abalala, ng’omukazi Omusamaliya ali mu kifaananyi kino bwe yakola.Yokaana 4:7-15, 27-30.

Mirimu ki ebiri Yesu gye yakola ng’ali ku nsi?

Olowooza Yesu yali ayagala okukola omulimu ogwo?— Yesu yagamba nti: “Emmere yange kwe kukola oyo eyantuma by’ayagala  n’okumaliriza omulimu gwe.” (Yokaana 4:34) Oyagala nnyo okulya emmere ekuwoomera?— Kino kiraga engeri Yesu gye yali ayagala ennyo okukola omulimu Katonda gwe yali amuwadde.

Katonda yatutonda nga tusobola okufuna essanyu mu kukola. Agamba nti ekirabo kye yawa omuntu kwe ‘kusanyukira by’ateganidde.’ N’olwekyo, bw’oyiga okukola ng’okyali mwana muto, ojja kufuna essanyu lingi mu bulamu bwo.Omubuulizi 5:19.

Ekyo tekitegeeza nti abaana abato basaanidde okukola emirimu egikolebwa abantu abakulu, wabula kiraga nti ffenna tusobola okubaako emirimu gye tukola. Bazadde bo bayinza okuba nga bakola buli lunaku okusobola okubafunira emmere ey’okulya n’aw’okusula. Era nga bw’omanyi, waliwo emirimu mingi egiyinza okukolebwa awaka ne waba wayonjo era ne walabika bulungi.

Mulimu ki gw’oyinza okukola ne guganyula ab’omu maka gammwe bonna?— Osobola okutegeka emmeeza kwe muliira emmere, okwoza ebintu, okusuulayo kasasiro, okuyonja ekisenge kyo, era n’okuzzaayo ebintu byo ng’omaze okubizannyisa. Oyinza n’okuba ng’ebimu ku bintu ebyo obikola. Mu butuufu ekyo kiganyula nnyo bonna abali awaka.

Lwaki kikulu okuzzaayo ebintu byo by’ozannyisa ng’omaze okuzannya?

Ka tulabe engeri gye kiri eky’omuganyulo okukola emirimu ng’egyo. Ebyo by’ozannyisa osaanidde okubizzaayo gy’obitereka ng’omaze okuzannya. Olowooza lwaki ekyo kikulu?— Kisobozesa awaka okuba awayonjo, era n’okwewala obubenje. Singa tozzaayo bintu byo ng’omaze okubizannyisa, lumu maama wo ayinza okujja n’abirinnyako. Ayinza okuseerera n’agwa wansi n’afuna obuvune. Kiyinza n’okumwetaagisa okugenda mu ddwaliro. Ekyo si kya kabi nnyo?— N’olwekyo, bw’ozzaayo ebintu byo ng’omaze okubizannyisa, kiganyula bonna.

Waliwo emirimu emirala abaana gye balina okukola. Ng’ekyokulabirako, emirimu gye babawa ku ssomero. Bw’ogenda ku ssomero, osobola okuyiga okusoma. Abaana abamu banyumirwa okusoma, ate  abalala bagamba nti kuzibu. Ne bwe kiba nti mu kusooka kukuzibuwalira, bw’onooyiga okusoma obulungi ojja kusanyuka nnyo. Bw’oba omanyi okusoma, waliwo ebintu ebirungi bingi by’osobola okuyiga. Ojja kuba osobola n’okwesomera Ekigambo kya Katonda, Bayibuli. N’olwekyo bw’okola obulungi emirimu egikuweebwa ku ssomero, oganyulwa nnyo, si bwe kiri?—

Waliwo abantu abamu abatayagala kukola. Oboolyawo waliwo b’omanyi abali bwe batyo. Naye okuva bwe kiri nti Katonda yatutonda nga tulina okukola, tusaanidde okuyiga okwagala okukola. Omuyigiriza Omukulu, omulimu gwe yali agwagala kwenkana wa?— Gwali ng’okulya emmere gy’asinga okuwoomerwa. Mulimu ki ogwo gwe yali ayogerako?— Okubuulira abalala ebikwata ku Yakuwa Katonda era n’engeri gye basobola okufuna obulamu obutaggwaawo.

N’olwekyo, bw’oba ng’oyagala okunyumirwa omulimu gw’okola, weebuuze nti, ‘Lwaki omulimu guno gusaanidde okukolebwa?’ Bw’omanya nti omulimu gw’olina okukola mukulu nnyo, kiba kyangu okugukola. Era omulimu ne bwe guba munene oba mutono, gukole bulungi. Ekyo bw’onookikola, ojja kufuna essanyu mu kukola omulimu gwo, nga bwe kyali eri Omuyigiriza Omukulu.

Bayibuli esobola okuyamba omuntu okufuuka omukozi omulungi. Soma ebyo ebiri mu Engero 10:4; 22:29; Omubuulizi 3:12, 13; ne Abakkolosaayi 3:23.