Musa n’omusota ogw’ekikomo

OGWO gulabika ng’omusota ogwa ddala ogwezingiridde ku mpagi? Si gwa ddala. Omusota ogwo gukoleddwa mu kikomo. Yakuwa yagamba Musa okuguwanika ku mpagi abantu basobole okugutunulako basigale nga balamu. Naye egyo emisota emirala egiri wansi, gya ddala. Gibozze abantu ne balwala. Omanyi lwaki?

Lwakuba Abaisiraeri boogedde bubi ku Katonda ne ku Musa. Beemulugunya: ‘Mwatuggira ki mu Misiri okutuleeta okufiira mu ddungu lino? Wano tewali kya kulya wadde amazzi. Era twetamiddwa okulya mmaanu.’

Naye mmaanu mmere nnungi. Yakuwa agibawadde mu ngeri ey’ekyamagero. Era abawadde amazzi mu ngeri y’ekyamagero. Naye abantu tebasiima ngeri Katonda gy’abalabiriddemu. N’olwekyo Yakuwa asindise emisota gino egy’obusagwa okubonereza Abaisiraeri. Emisota gibabojja era bangi ku bo bafa.

Emisota gibojja Abaisiraeri

Oluvannyuma abantu bajja eri Musa ne bagamba: ‘Twonoonye, kubanga twogedde bubi ku Yakuwa naawe. Kati saba Yakuwa aggyewo emisota gino.’

Awo Musa asabira abantu. Era Yakuwa agamba Musa okukola omusota guno ogw’ekikomo. Amugamba okuguwanika ku mpagi, era nti buli muntu aba abojjeddwa omusota agutunuleko. Musa akola Katonda ky’amugamba. Era abantu abaabojjebwa batunuulira omusota ogw’ekikomo ne bawona.

Waliwo kye tuyigira ku kino. Ffenna, mu ngeri emu, tulinga Abaisiraeri abo abaabojjebwa emisota egyo. Ffenna tuli mu mbeera ey’okufa. Weetegereze ebikwetoolodde, era ojja kulaba nti abantu bakula ne bakaddiwa, balwala era ne bafa. Kino kiri kityo kubanga omusajja n’omukazi abaasooka, Adamu ne Kaawa, baajeemera Yakuwa, ate ffenna tuli baana baabwe. Naye Yakuwa atukoledde enteekateeka tusobole okuba abalamu emirembe gyonna.

Yakuwa yatuma Omwana we, Yesu Kristo, ku nsi. Yesu yawanikibwa ku muti, kubanga abantu bangi baalowooza nti yali mubi. Naye Yakuwa yatuwa Yesu okutulokola. Singa tumwesiga, ne tumugoberera, tujja kufuna obulamu obutaggwaawo. Naye kino tujja kukiyigako oluvannyuma.

Okubala 21:4-9; Yokaana 3:14, 15.



Ebibuuzo

  • Mu kifaananyi, kiki ekizingiriddwa ku mpagi, era lwaki Yakuwa agamba Musa okukissaawo?
  • Abantu balaga batya nti tebasiimye ebyo byonna Yakuwa by’abakoledde?
  • Kiki abantu kye basaba Musa okukola oluvannyuma lwa Yakuwa okubabonereza ng’abasindikira emisota?
  • Lwaki Yakuwa agamba Musa okukola omusota ogw’ekikomo?
  • Kya kuyiga ki kye tufuna mu lugero luno?

Ebibuuzo ebyongerezeddwako

  • Soma Okubala 21:4-9.

    Kulabula ki kwe tufuna bwe tumanya nti Abaisiraeri beemulugunyiza enteekateeka za Yakuwa? (Kubal. 21:5, 6; Bar. 2:4)

    Mu byasa ebyaddirira, Abaisiraeri baakozesa batya omusota ogw’ekikomo, era kiki Kabaka Keezeekiya kye yakolawo? (Kubal. 21:9; 2 Bassek. 18:1-4)

  • Soma Yokaana 3:14, 15.

    Okussa omusota ogw’ekikomo ku mpagi, kyali kisonga kitya ku kuwanikibwa kwa Yesu Kristo? (Bag. 3:13; 1 Peet. 2:24)