Buuka ogende ku bubaka obulimu

Buuka ogende awali menu entono

Buuka ogende awalagibwa ebirimu

Abajulirwa ba Yakuwa

Luganda

Bayibuli Eri ku Mukutu Gwaffe | ENKYUSA EY'ENSI EMPYA EY'EBYAWANDIIKIBWA EBITUKUVU

Yoswa 6:1-27

EBIRIMU

  • Bbugwe wa Yeriko agwa (1-21)

  • Lakabu n’ab’omu maka ge bawonawo (22-27)

6  Enzigi za Yeriko zaali zisibiddwa era nga zinywezeddwa bulungi olw’Abayisirayiri; tewaali n’omu afuluma wadde ayingira.+  Yakuwa n’agamba Yoswa nti: “Nkuwadde Yeriko ne kabaka waakyo, n’abalwanyi baamu ab’amaanyi.+  Abasajja abalwanyi mmwenna mujja kutambula nga mwetooloola ekibuga; mujja kukyetooloola omulundi gumu. Mujja kukola bwe mutyo okumala ennaku mukaaga.  Funa bakabona musanvu bakulemberemu Essanduuko, nga buli omu akutte eŋŋombe.* Naye ku lunaku olw’omusanvu mujja kutambula nga mwetooloola ekibuga emirundi musanvu era bakabona bajja kufuuwa eŋŋombe.+  Bwe banaafuuwa eŋŋombe, era bwe munaawulira eŋŋombe, ng’abantu bonna balaya enduulu z’olutalo. Awo bbugwe w’ekibuga ajja kugwa,+ era abantu bajja kuyingira butereevu mu kibuga.”  Awo Yoswa mutabani wa Nuuni n’ayita bakabona n’abagamba nti: “Musitule essanduuko y’endagaano era bakabona musanvu, nga buli omu akutte eŋŋombe, bakulemberemu Essanduuko ya Yakuwa.”+  Era n’agamba abantu nti: “Mutambule mwetooloole ekibuga, era abasajja abalina eby’okulwanyisa+ bakulembere Essanduuko ya Yakuwa.”  Awo ne kiba nga Yoswa bwe yagamba abantu; bakabona musanvu, nga buli omu akutte eŋŋombe mu maaso ga Yakuwa, ne batambula nga bafuuwa eŋŋombe, era essanduuko y’endagaano ya Yakuwa yali ebavaako emabega.  Abasajja abaalina eby’okulwanyisa ne bakulemberamu bakabona abaali bafuuwa eŋŋombe, era abalwanyi abaali emabega ne bagoberera Essanduuko ng’eno bakabona bwe bafuuwa eŋŋombe obutasalako. 10  Yoswa yali alagidde abantu nti: “Temuleekaana era amaloboozi gammwe tegawulirwa. Temwogera kigambo kyonna okutuusa ku lunaku lwe ndibalagira nti, ‘Muleekaane!’ olwo ne mulyoka muleekaana.” 11  Essanduuko ya Yakuwa baagyetoolooza ekibuga omulundi gumu, oluvannyuma ne baddayo mu lusiisira ne basula eyo. 12  Olunaku olwaddirira Yoswa n’agolokoka ku makya nnyo, era bakabona ne basitula Essanduuko+ ya Yakuwa; 13  bakabona omusanvu, nga buli omu akutte eŋŋombe, ne bakulembera Essanduuko ya Yakuwa nga bagenda bafuuwa eŋŋombe obutasalako. Abasajja abaalina eby’okulwanyisa baali babakulembeddemu, ng’abalwanyi abaali emabega bagoberera Essanduuko ya Yakuwa, era nga ne bakabona bagenda bafuuwa eŋŋombe obutasalako. 14  Ne ku lunaku olw’okubiri beetooloola ekibuga omulundi gumu, oluvannyuma ne baddayo mu lusiisira. Bwe batyo bwe baakola okumalira ddala ennaku mukaaga.+ 15  Awo ku lunaku olw’omusanvu ne bagolokoka ku makya nnyo ng’emmambya yaakasala, ne batambula nga beetooloola ekibuga mu ngeri y’emu emirundi musanvu. Olwo lwe lunaku lwokka lwe beetooloola ekibuga emirundi musanvu.+ 16  Ku mulundi ogw’omusanvu, bakabona baafuuwa eŋŋombe era Yoswa n’agamba abantu nti: “Muleekaane,+ kubanga Yakuwa abawadde ekibuga! 17  Ekibuga n’ebintu byonna ebikirimu bya kuzikirizibwa;+ byonna bya Yakuwa. Lakabu+ malaaya ye yekka anaasigala nga mulamu, ye n’abo bonna abali naye mu nnyumba, kubanga yakweka abakessi be twatuma.+ 18  Naye mwewalire ddala ekintu eky’okuzikirizibwa,+ muleme okwegomba ekintu eky’okuzikirizibwa ne mukitwala+ ne muviirako olusiisira lwa Isirayiri okuba eky’okuzikirizibwa ne mululeetera emitawaana.*+ 19  Kyokka ffeeza yenna ne zzaabu n’ebintu eby’ekikomo n’eby’ekyuma, bintu bitukuvu eri Yakuwa.+ Birina okutwalibwa mu ggwanika lya Yakuwa.”+ 20  Bakabona bwe baafuuwa eŋŋombe,+ abantu ne baleekaana. Era abantu olwawulira eŋŋombe ne balaya enduulu z’olutalo, bbugwe w’ekibuga n’agwa wansi,+ abantu ne bagenda butereevu mu kibuga ne bakiwamba. 21  Ne bakozesa ekitala okusaanyaawo byonna ebyali mu kibuga, abasajja n’abakazi, abato n’abakulu, awamu n’ente, n’endiga, n’endogoyi.+ 22  Yoswa n’agamba abasajja ababiri abaaketta ensi nti: “Mugende mu nnyumba y’omukazi malaaya, mumufulumye ye n’abantu be bonna, nga bwe mwamulayirira.”+ 23  Awo abasajja abaaketta ensi ne bagenda ne bafulumya Lakabu ne kitaawe ne nnyina ne bannyina n’abantu be bonna; baafulumya ab’eŋŋanda ze bonna+ ne babateeka ebweru w’olusiisira lwa Isirayiri. 24  Awo ne bookya ekibuga n’ebintu byonna ebyakirimu. Naye ffeeza ne zzaabu n’ebintu eby’ekikomo n’eby’ekyuma ne babitwala mu ggwanika ly’ennyumba ya Yakuwa.+ 25  Lakabu malaaya n’ab’ennyumba ya kitaawe n’abantu be bonna be bokka Yoswa be yataliza;+ era Lakabu abeera mu Isirayiri n’okutuusa leero,+ kubanga yakweka abakessi Yoswa be yatuma okuketta Yeriko.+ 26  Awo Yoswa n’alayira ekirayiro kino:* “Omuntu yenna aligezaako okuddamu okuzimba ekibuga kino Yeriko, akolimirwe mu maaso ga Yakuwa. Bw’alizimba omusingi gwakyo, alifiirwa omwana we omuggulanda, era bw’aliwangamu enzigi zaakyo, alifiirwa omwana we omuggalanda.”+ 27  Yakuwa yali ne Yoswa,+ era Yoswa yayatiikirira mu nsi yonna.+

Obugambo Obuli Wansi

Obut., “amayembe g’endiga ennume.”
Oba, “ebizibu; okuboolebwa.”
Era kiyinza okuvvuunulwa, “n’alayiza abantu ekirayiro kino.”