Buuka ogende ku bubaka obulimu

Buuka ogende awalagibwa ebirimu

Abajulirwa ba Yakuwa

Londa olulimi Luganda

2 Peetero 3:1-18

EBIRIMU

  • Abasekerezi tebakkiriza nti wajja kubaawo okuzikirizibwa (1-7)

  • Yakuwa talwisa kye yasuubiza (8-10)

  • Mulowooze ku ekyo kye musaanidde okubeera (11-16)

    • Eggulu eriggya n’ensi empya (13)

  • Mwekuume muleme kutwalirizibwa (17, 18)

3  Abaagalwa, eno kati ye bbaluwa ey’okubiri gye mbawandiikira. Era okufaananako eyasooka, ne mu eno nzuukusa obusobozi bwammwe obw’okulowooza obulungi nga mbajjukiza+  nti musaanidde okujjukira ebigambo ebyayogerwa edda bannabbi abatukuvu n’ekiragiro Mukama waffe era Omulokozi kye yawa okuyitira mu batume bammwe.  Okusookera ddala, mukimanye nti mu nnaku ez’enkomerero walijjawo abasekerezi n’okusekerera kwabwe nga bagoberera okwegomba kwabwe+  era nga bagamba nti: “Okubeerawo kwe okwasuubizibwa kuliwa?+ Laba, kasookedde bajjajjaffe bafa,* ebintu byonna biri ddala nga bwe bibadde okuviira ddala ku ntandikwa y’okutonda.”+  Kubanga mu bugenderevu kino bakibuusa amaaso, nti edda waaliwo eggulu n’ensi eyava mu mazzi era n’eba wakati mu mazzi olw’ekigambo kya Katonda;+  era nti ensi ey’omu kiseera ekyo yazikirizibwa bwe yabuutikirwa amazzi.+  Era olw’ekigambo kye kimu, eggulu n’ensi ebiriwo kati biterekeddwa omuliro era bikuumibwa okutuusa ku lunaku olw’omusango era olw’okuzikiririzaako abantu abatatya Katonda.+  Kyokka kino temukibuusa maaso abaagalwa, nti eri Yakuwa* olunaku lumu lulinga emyaka lukumi, n’emyaka lukumi giringa olunaku lumu.+  Yakuwa* talwisa kye yasuubiza+ ng’abamu bwe balowooza, naye abagumiikiriza mmwe, kubanga tayagala muntu yenna kuzikirizibwa wabula bonna beenenye.+ 10  Naye olunaku lwa Yakuwa*+ lulijja ng’omubbi,+ eggulu lwe lirivaawo amangu+ n’okuwuuma okw’amaanyi, ebintu byonna lwe birisaanuuka olw’ebbugumu eringi, ensi ne byonna ebikolebwamu ne byanikibwa.+ 11  Okuva ebintu ebyo byonna bwe bigenda okusaanuusibwa bwe bityo, mulowooze ku ekyo kye musaanidde okubeera. Musaanidde okubeera abantu abalina empisa entukuvu era abakola ebikolwa eby’okwemalira ku Katonda, 12  nga mulindirira era nga mukuumira mu birowoozo byammwe okujja* kw’olunaku lwa Yakuwa,*+ eggulu lwe ligenda okwokebwa omuliro lisaanewo+ era n’ebintu byonna bisaanuuke olw’ebbugumu eringi! 13  Naye nga bwe yasuubiza, tulindirira eggulu eriggya n’ensi empya,+ era nga muno obutuukirivu mwe bulibeera.+ 14  N’olwekyo abaagalwa, okuva bwe mulindirira ebintu ebyo, mufube nnyo okusangibwa nga temuliiko bbala wadde akamogo era nga muli mu mirembe.+ 15  Ate era, obugumiikiriza bwa Mukama waffe mubutwale ng’obulokozi, era nga muganda waffe Pawulo omwagalwa bwe yabawandiikira okusinziira ku magezi agaamuweebwa,+ 16  ng’ayogera ku bintu bino ng’era bw’abyogerako mu bbaluwa ze zonna. Kyokka mu zo mulimu ebintu ebimu ebizibu okutegeera, abatamanyi n’abatali banywevu bye banyoolanyoola, era nga bwe banyoolanyoola Ebyawandiikibwa ebirala, ne beereetako okuzikirira. 17  N’olwekyo abaagalwa, okuva bwe mutegedde ebintu ebyo nga bukyali, mwekuume muleme kutwalirizibwa kwonoona kw’abantu abo abajeemu ne muva we munyweredde.+ 18  Naye mweyongerenga okufuna ekisa eky’ensusso n’okumanya okukwata ku Mukama waffe era Omulokozi, Yesu Kristo. Aweebwe ekitiibwa kaakano n’emirembe n’emirembe. Amiina.

Obugambo Obuli Wansi

Obut., “beebaka mu kufa.”
Obut., “okubeerawo.”