Buuka ogende ku bubaka obulimu

Buuka ogende awali menu entono

Buuka ogende awalagibwa ebirimu

Abajulirwa ba Yakuwa

Luganda

Bayibuli Eri ku Mukutu Gwaffe | ENKYUSA EY'ENSI EMPYA EY'EBYAWANDIIKIBWA EBITUKUVU

1 Ebyomumirembe Ekisooka 21:1-30

EBIRIMU

  • Dawudi yeetulinkiriza okubala abantu (1-6)

  • Ekibonerezo okuva eri Yakuwa (7-17)

  • Dawudi azimba ekyoto (18-30)

21  Awo Sitaani* n’asalawo okulumba Isirayiri era n’asendasenda Dawudi okubala Abayisirayiri.+  Dawudi n’agamba Yowaabu+ n’abaami b’abantu nti: “Mugende mubale Abayisirayiri okuva e Beeru-seba okutuuka e Ddaani,+ oluvannyuma muntegeeze omuwendo gwabwe ngumanye.”  Naye Yowaabu n’agamba nti: “Yakuwa k’ayongere ku bungi bw’abantu be emirundi 100! Mukama wange kabaka, bonna si baweereza ba mukama wange? Lwaki mukama wange ayagala okukola kino? Lwaki aleetera Isirayiri okubaako omusango?”  Kyokka ekigambo kya kabaka ne kisinza ekya Yowaabu amaanyi. Bw’atyo Yowaabu n’agenda n’atalaaga Isirayiri yonna, oluvannyuma n’ajja e Yerusaalemi.+  Yowaabu n’awa Dawudi omuwendo gw’abantu abaali babaliddwa. Abayisirayiri bonna baali abasajja 1,100,000 abaali bakwata ebitala, ate mu Yuda baali abasajja 470,000 abaali bakwata ebitala.+  Naye Yowaabu teyawandiika ba mu kika kya Leevi+ n’ekya Benyamini olw’okuba ekigambo kya kabaka teyakyagala.+  Ekintu kino kyanyiiza nnyo Katonda ow’amazima, bw’atyo n’abonereza Isirayiri.  Awo Dawudi n’agamba Katonda ow’amazima nti: “Nnyonoonye+ nnyo olw’okukola ekintu kino. Kaakano nkwegayiridde, sonyiwa omuweereza wo ensobi gy’akoze,+ kubanga kye nkoze kya busirusiru nnyo.”+  Awo Yakuwa n’ayogera ne Gaadi,+ eyategeezanga Dawudi okwolesebwa okwavanga eri Katonda, n’amugamba nti: 10  “Genda ogambe Dawudi nti, ‘Bw’ati Yakuwa bw’agamba: “Nkuteereddewo ebibonerezo bisatu. Londako kimu kye mba nkuwa.”’” 11  Awo Gaadi n’agenda eri Dawudi n’amugamba nti: “Bw’ati Yakuwa bw’agamba: ‘Londako kimu ku bino: 12  emyaka esatu egy’enjala,+ oba emyezi esatu ng’abalabe bo bakumalawo, ng’ekitala kyabwe kikutuukako,+ oba wabeewo ekitala kya Yakuwa okumala ennaku ssatu—endwadde ey’amaanyi mu nsi+—nga malayika wa Yakuwa aleeta okuzikirira+ mu nsi ya Isirayiri yonna.’ Kaakano salawo kye mba nziramu Oyo antumye.” 13  Dawudi n’agamba Gaadi nti: “Kino kinzitooweredde nnyo. Ka ngwe mu mukono gwa Yakuwa, kubanga musaasizi nnyo;+ naye tondeka kugwa mu mukono gwa muntu.”+ 14  Awo Yakuwa n’aleeta endwadde ey’amaanyi+ mu Isirayiri, ne mufaamu abantu 70,000.+ 15  Ate era Katonda ow’amazima n’atuma malayika e Yerusaalemi okukizikiriza. Naye Yakuwa bwe yalaba ng’anaatera okukizikiriza, n’akwatirwa abantu be ekisa olw’endwadde gye yali aleese,+ n’agamba malayika eyali azikiriza nti: “Ekyo kimala!+ Omukono gwo gusse.” Malayika wa Yakuwa yali ayimiridde kumpi n’egguuliro lya Olunaani+ Omuyebusi.+ 16  Dawudi bwe yayimusa amaaso ge, n’alaba malayika wa Yakuwa ng’ayimiridde wakati w’ensi n’eggulu ng’akutte mu ngalo ze ekitala ekisowoddwa+ era ng’akyolekezza Yerusaalemi. Amangu ago Dawudi n’abakadde ne bavunnama, era baali bambadde ebibukutu.+ 17  Awo Dawudi n’agamba Katonda ow’amazima nti: “Si nze nnalagira okubala abantu? Nze nnayonoona+ era ne nkola ekibi; naye endiga zino zikoze ki? Ai Yakuwa Katonda wange, nkwegayiridde, omukono gwo ka gube ku nze ne ku nnyumba ya kitange; naye toleeta ku bantu bo kirwadde kino.”+ 18  Awo malayika wa Yakuwa n’agamba Gaadi+ okugamba Dawudi agende azimbire Yakuwa ekyoto ku gguuliro lya Olunaani Omuyebusi.+ 19  Dawudi n’agenda, nga Gaadi bwe yamugamba mu linnya lya Yakuwa. 20  Mu kiseera ekyo Olunaani yakyuka n’alaba malayika, era batabani be abana abaali naye ne beekweka. Olunaani yali awuula ŋŋaano. 21  Awo Dawudi n’agenda eri Olunaani. Olunaani bwe yamulaba, amangu ago n’ava mu gguuliro n’avunnamira Dawudi. 22  Dawudi n’agamba Olunaani nti: “Nguza* ekifo ekyo awali egguuliro, nzimbirewo Yakuwa ekyoto. Kinguze ssente zennyini ezikigyaamu, ekirwadde kisobole okuggibwa ku bantu.”+ 23  Naye Olunaani n’agamba Dawudi nti: “Kitwale, era mukama wange kabaka akole ekyo ky’alaba nga kirungi gy’ali. Laba, nkuwadde ente ez’ebiweebwayo ebyokebwa, n’ebibaawo ebiwuula+ bibe enku, n’eŋŋaano okuba ekiweebwayo eky’emmere ey’empeke. Byonna mbikuwadde.” 24  Kyokka Kabaka Dawudi n’agamba Olunaani nti: “Nedda, nja kubigula ssente ezibigyaamu, kubanga sijja kutwala bibyo mbiwe Yakuwa oba mbiweeyo nga ssaddaaka ezookebwa nga sirina kye nsasudde.”+ 25  Awo Dawudi n’awa Olunaani sekeri* za zzaabu 600 okusasulira ekifo. 26  Dawudi n’azimbira Yakuwa ekyoto+ mu kifo ekyo, era n’awaayo ssaddaaka ezookebwa ne ssaddaaka ez’emirembe, n’akoowoola Yakuwa, era n’amuddamu ng’asindika omuliro+ okuva mu ggulu ne gukka ku kyoto eky’ebiweebwayo ebyokebwa. 27  Awo Yakuwa n’alagira malayika+ okuzza ekitala kye mu kiraato kyakyo. 28  Dawudi bwe yalaba nga Yakuwa amuzzeemu ku gguuliro lya Olunaani Omuyebusi, Dawudi ne yeeyongera okuweeranga eyo ssaddaaka. 29  Naye mu kiseera ekyo weema ya Yakuwa Musa gye yakolera mu ddungu n’ekyoto eky’ebiweebwayo ebyokebwa byali mu kifo ekigulumivu e Gibiyoni.+ 30  Kyokka Dawudi teyasobola kugendayo kwebuuza ku Katonda kubanga yali atidde nnyo olw’ekitala kya malayika wa Yakuwa.

Obugambo Obuli Wansi

Era kiyinza okuvvuunulwa, “omuziyiza.”
Obut., “Mpa.”
Sekeri yali yenkana gramu 11.4. Laba Ebyong. B14.