Buuka ogende ku bubaka obulimu

Buuka ogende awali menu entono

Buuka ogende awalagibwa ebirimu

Abajulirwa ba Yakuwa

Luganda

Bayibuli Eri ku Mukutu Gwaffe | ENKYUSA EY'ENSI EMPYA EY'EBYAWANDIIKIBWA EBITUKUVU

1 Bassekabaka 14:1-31

EBIRIMU

  • Obunnabbi bwa Akiya obukwata ku Yerobowaamu (1-20)

  • Lekobowaamu afuga Yuda (21-31)

    • Sisaki alumba Yerusaalemi (25, 26)

14  Mu biro ebyo, Abiya mutabani wa Yerobowaamu yalwala.  Awo Yerobowaamu n’agamba mukazi we nti: “Weefuule ng’omuntu omulala baleme kutegeera nti oli muka Yerobowaamu, ogende e Siiro. Eyo we wali nnabbi Akiya eyagamba nti ndiba kabaka w’abantu bano.+  Twala emigaati kkumi n’obugaati n’eccupa y’omubisi gw’enjuki, ogende gy’ali. Ajja kukubuulira ekinaatuuka ku mwana.”  Mukazi wa Yerobowaamu n’akola kye yamugamba. Yayimuka n’agenda e Siiro+ n’atuuka ku nnyumba ya Akiya. Amaaso ga Akiya gaali gatunudde butereevu mu maaso naye nga tasobola kulaba olw’obukadde.  Naye Yakuwa yali amaze okugamba Akiya nti: “Laba, mukazi wa Yerobowaamu ajja okukwebuuzaako ebikwata ku mwana we, olw’okuba mulwadde. Nja kukubuulira ky’onoomugamba.* Bw’anaatuuka ajja kwefuula ng’omuntu omulala.”  Akiya olwamuwulira ng’ayingira mu mulyango, n’amugamba nti: “Yingira ggwe muka Yerobowaamu. Lwaki weefudde ng’omuntu omulala? Ntumiddwa okukutegeeza amawulire amabi.  Genda ogambe Yerobowaamu nti, ‘Bw’ati Yakuwa Katonda wa Isirayiri bw’agamba: “Nnakulonda mu bantu bo, ne nkufuula omukulembeze w’abantu bange Abayisirayiri.+  Oluvannyuma nnaggya obwakabaka ku nnyumba ya Dawudi ne mbukuwa.+ Naye tobadde ng’omuweereza wange Dawudi, eyakwata ebiragiro byange n’angoberera n’omutima gwe gwonna, ng’akola ebyo byokka ebyali ebirungi mu maaso gange.+  Naye ggwe weeyisizza bubi nnyo n’okusinga bonna abaakusooka, era weekoledde katonda omulala, n’ekifaananyi eky’ekyuma,* okunnyiiza,+ era nze gw’okubye amabega.+ 10  Olw’ensonga eyo ŋŋenda kuleeta emitawaana ku nnyumba ya Yerobowaamu, era nja kuzikiriza abasajja* bonna ab’omu nnyumba ya Yerobowaamu, nga mw’otwalidde abateesobola era abatalina maanyi mu Isirayiri, era nja kwerera ddala ab’ennyumba ya Yerobowaamu,+ ng’omuntu bw’ayera obusa okutuusa lwe buggwerawo ddala! 11  Oyo yenna ku b’omu nnyumba ya Yerobowaamu alifiira mu kibuga, embwa zirimulya; n’oyo alifiira ku ttale, ebinyonyi eby’omu bbanga birimulya, kubanga Yakuwa y’akyogedde.”’ 12  “Kaakano situka oddeyo mu nnyumba yo. Bw’onootuuka bw’oti mu kibuga, omwana ajja kufa. 13  Abayisirayiri bonna bajja kumukungubagira bamuziike, kubanga ye yekka mu b’omu nnyumba ya Yerobowaamu ajja okuziikibwa mu ntaana, kubanga mu bantu bonna ab’ennyumba ya Yerobowaamu Yakuwa Katonda wa Isirayiri gw’alabyemu ekirungi. 14  Yakuwa ajja kweteerawo kabaka anaafuga Isirayiri, era ajja kuzikiriza ab’ennyumba ya Yerobowaamu+ okuva ku lunaku olwo n’okweyongerayo, ne kaakati. 15  Yakuwa ajja kukuba Isirayiri, ebe ng’olumuli oluyuuzibwayuuzibwa mu mazzi, era ajja kusiguukulula Isirayiri mu nsi eno ennungi gye yawa bajjajjaabwe,+ era ajja kubasaasaanyiza emitala w’Omugga,*+ kubanga baakola ebikondo ebisinzibwa,*+ ne banyiiza Yakuwa. 16  Ate era ajja kwabulira Isirayiri olw’ebibi Yerobowaamu by’akoze n’olw’ebyo by’aleetedde Isirayiri okukola.”+ 17  Awo muka Yerobowaamu n’ayimuka n’agenda, n’atuuka e Tiruza. Bwe yali nga yaakatuuka ku mulyango gw’ennyumba ye, omwana n’afa. 18  Ne bamuziika, Isirayiri yonna n’emukungubagira, nga Yakuwa bwe yali ayogedde okuyitira mu muweereza we nnabbi Akiya. 19  Ebyafaayo ebirala ebikwata ku Yerobowaamu, entalo ze yalwana+ n’engeri gye yafugamu, biwandiikiddwa mu kitabo ky’ebyafaayo by’ekiseera kya bakabaka ba Isirayiri. 20  Yerobowaamu yafugira emyaka 22, oluvannyuma n’agalamizibwa wamu ne bajjajjaabe,+ Nadabu mutabani we n’amusikira ku bwakabaka.+ 21  Mu kiseera ekyo Lekobowaamu mutabani wa Sulemaani yali afuuse kabaka mu Yuda. Yalina emyaka 41 we yatandikira okufuga era yafugira emyaka 17 mu Yerusaalemi, ekibuga Yakuwa kye yalonda+ mu bika bya Isirayiri byonna okuteeka omwo erinnya lye.+ Nnyina yali ayitibwa Naama, Omwamoni.+ 22  Abantu b’omu Yuda baali bakola ebintu ebibi mu maaso ga Yakuwa,+ era olw’ebibi bye baakola baamunyiiza okusinga bajjajjaabwe.+ 23  Nabo beezimbiranga ebifo ebigulumivu, n’empagi ezisinzibwa, n’ebikondo ebisinzibwa,*+ ku busozi bwonna obuwanvu+ ne wansi wa buli muti ogulina ebikoola ebingi.+ 24  Ate era mu nsi mwalimu bamalaaya abasajja ab’omu yeekaalu.+ Baakola eby’omuzizo byonna ebyakolebwanga amawanga Yakuwa ge yagoba mu maaso g’Abayisirayiri. 25  Mu mwaka ogw’okutaano ogw’obufuzi bwa Kabaka Lekobowaamu, Kabaka Sisaki+ owa Misiri yalumba Yerusaalemi.+ 26  Yatwala eby’obugagga eby’omu nnyumba ya Yakuwa n’eby’omu nnyumba ya* kabaka.+ Yatwala buli kintu, n’atwaliramu n’engabo zonna eza zzaabu Sulemaani ze yakola.+ 27  Awo Kabaka Lekobowaamu n’akola engabo ez’ekikomo okudda mu kifo kyazo, n’azikwasa abakulu b’abakuumi* abaakuumanga ku mulyango oguyingira mu nnyumba ya kabaka. 28  Buli kabaka lwe yajjanga mu nnyumba ya Yakuwa, abakuumi baazikwatanga, ate oluvannyuma ne bazizzaayo mu kisenge ky’abakuumi. 29  Ebyafaayo ebirala ebikwata ku Lekobowaamu, ebyo byonna bye yakola, biwandiikiddwa mu kitabo ky’ebyafaayo by’ekiseera kya bakabaka ba Yuda.+ 30  Buli kiseera waabangawo entalo wakati wa Lekobowaamu ne Yerobowaamu.+ 31  Awo Lekobowaamu n’agalamizibwa wamu ne bajjajjaabe, n’aziikibwa ne bajjajjaabe mu Kibuga kya Dawudi.+ Nnyina yali ayitibwa Naama, Omwamoni.+ Awo Abiyaamu*+ mutabani we n’amusikira ku bwakabaka.

Obugambo Obuli Wansi

Oba, “Ojja kumugamba bw’oti ne bw’oti.”
Oba, “ekisaanuuse.”
Laba obugambo obuli wansi ku 1Sa 25:22.
Omugga Fulaati.
Laba Awanny.
Laba Awanny.
Oba, “lubiri lwa.”
Obut., “abaddusi.”
Era ayitibwa Abiya.