Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Mulakonsha Kusangalala Mumukwashi Wanu

 Lubasu 4

Mbweenga Mwasebensesha Maali

Mbweenga Mwasebensesha Maali

‘Kwiipusha kulayandika, kwaamba ayi miyeeyo ikumanishikwe.’—Tushimpi 20:18

Soonse tulisuniki maali akusebensesha kushintu shiyandika kumikwashi yesu. (Tushimpi 30:8) Ncancine ‘maali alafuna.’ (Shikushimikila 7:12) Mbuli beebene, inga tacibi cuubu kubandika sha maali, sombi tamweelete kuleka makani amaali kuleta mapensho mucikwati. (Bene Efeso 4:32) Beebene balyeelete kushomeka ku umwi amubye alimwi akubandikishanya mbweenga basebensesha maali.

 1 AMUYEEYE KABOTU

BAIBO ILAAMBA AYI: “Ngani mulikoto lyanu, na utooyanda kuyaka ŋanda ilaamfu ya maanda peculu, weenga wabula kwikala panshi akubona na ulicite maali aanji akwaamba ayi amanishe ŋanda iyo?” (Luka 14:28) Cilayandika abuumbi kukala panshi akubandika mbweenga mwasebensesha maali. (Amosi 3:3) Amusale shintu shitoyandika kuulwa amaali eenga asebenseshekwa kushintu isho. (Tushimpi 31:16) Teshi kwaamba ayi na kamucite maali nkuulabo cili coonse ncomusuni. Amweeleshe kutaba ankongole. Amusebenseshebo maali ngomucite. —Tushimpi 21:5; 22:7

NSHEENGA MWACITA:

  • Pakumana kwa mweenshi na maali acalaawo, amubandike mbweshi mwaasebenseshe

  • Na mwabona ayi maali ngomucite nganiini, amuceyesheko shakuula. Mucakubonenaako, inga mwalitelekela nobeene shakulya kwiinda kuula shakatelekelwa limwi

 2 AMWAAMBE MBOMULINYUMFWA AKUBONA SHINTU MBOSHIBETE

BAIBO ILAAMBA AYI: “Tulisuni kucita shiluleme, kuteshibo pameenso aMwaami peenka, sombi akubantu.” (2 Bene Kolinto 8:21) Amushomeke ku mbomweebenaabo akubalwita maali ngomucana alimwi akusebensesha.

Amubeepushe mbomweebenaabo lyoonse na maali ngomusuni kusebensesha ngaanji. (Tushimpi 13:10) Na kamubandikishanya bwakusebensesha maali, mucikwati canu mulaakuba luumuno. Mulyeelete kushiba ayi maali ngomucana teshibo anu nweenkabo, sombi nga mukwashi woonse.—1 Timoti 5:8.

NSHEENGA MWACITA:

  • Amusuminishanye ambomweebenaabo pa maali ngeenga mwasebensesha kwakubula kubeepusha

  • Tamweelete kulindila kushikila mwaba amapensho nkokubandikishanya pa maali