Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Mulakonsha Kusangalala Mumukwashi Wanu

 Lubasu 8

Ciindi Ndyekucitika Mapensho

Ciindi Ndyekucitika Mapensho

“Aya mapensho oobu ngotutoobona teshi a ciindi cilaamfu, sombi alaakutuletela bulemu bwiindaawo abuumbi alimwi butamaani ubo buteelanishikwi amapensho oonse.”—2 Bene Kolinto 4:17

Nacibi kwaamba ayi mweelesha buyani kuba alusangalalo mucikwati nabi mumukwashi, mapensho akutayeeyela inga acitika eenga alengesha ayi mube abuumba. (Shikushimikila 9:11) Lesa wakabikako sheenga shatucafwa na twaba amapensho. Na mwakonkela njiisho shamu Baibo, mwebo amukwashi wanu inga mwacikonsha kuliyumya nabi mwaba amapensho anene abuumbi.

 1 AMUSHOME YEHOVA

BAIBO ILAAMBA AYI: “Amutole kulisukama kwanu koonse kuli nguwe ceebo ngoomulama.” (1 Pita 5:7) Munookwibaluka lyoonse kwaamba ayi Lesa teshi ngolengesha ayi tunoosunkwa. (Jemusi 1:13) Na mwasena pafwaafwi anguwe, ulaakumucafwa. (Isaya 41:10) “Amumulwiite mapensho anu oonse.”—Kulumbaisha 62:8.

Na kamubelenga akwiiya Baibo bushiku abushiku mulaakuyuminishikwa. Na mwacita boobo, mulaakubona Yehova “mbwatucafwa mumapensho esu oonse.” (2 Bene Kolinto 1:3, 4; Loma 15:4) Wakatulasha ayi “ulaakutupa luumuno lwakwe ulo lwiinda pabusongo bwa bantu boonse.”—Bene Filipi 4:6, 7, 13.

NSHEENGA MWACITA:

  • Munoopaila kwaamba ayi Yehova amucafwe kukalikana akuyeeya kabotu

  • Amuyeeye nsheenga mwacita kwaamba ayi mumane mapensho ngomucite akusala nshila yeenga yamucafwa abuumbi

2 AMUBIKILE MAANO MUKWASHI WANU ANOBENE

BAIBO ILAAMBA AYI: “Moyo wamusongo ulisuni kwishiba shintu, amatwi asongo alakutika ayi anyumfwishe.” (Tushimpi 18:15) Amushibe makani oonse. Amwipushe kwaamba ayi mushibe citoyandika ku umwi aumwi mumukwashi wanu. Amubandike ambabo. Amubakutike.—Tushimpi 20:5.

Ino na umwi mumukwashi wafwa? Mutaloondi kubonesha mbomutolinyumfwa. Amuyeeye kwaamba ayi nabi Yesu alakwe “wakalila.” (Joni 11:35; Shikushimikila 3:4) Kookesha akoona ciindi ceelete akwalo kulacafwa. (Shikushimikila 4:6) Ici cilakulengesha ayi muyume ndyemuli mumapensho.

NSHEENGA MWACITA:

  • Nabi kamutacite mapensho, munobandikishanya lyoonse amukwashi wanu. Na kamucita boobo, bamumukwashi wanu teshi banoloonda kubandika andimwe nabi ndyemuli amapensho

  • Amubandike abamwi bakeendako mumapensho mbuli anu

 3 AMUCANE LUCAFWO NDOMUYANDIKA

BAIBO ILAAMBA AYI: “Shicibusa ulasuna mubye ciindi coonse, mukwanu wakashalilwa kukucafwa mumapensho.” (Tushimpi 17:17) Babyanu inga bamucafwa na mwabaambila nshemutooyanda. Aboobo amubaambile nshemutooyanda. (Tushimpi 12:25) Alimwi, amwaambileko bamwi beshikunyumfwisha Baibo kwaamba ayi bamucaafwe lwakumushimu. Inga bamupa butanjilishi bwamu Baibo bweenga bwamucafwa.—Jemusi 5:14.

Na kamucanika ababo bacite lushomo muli Lesa amumilasho yakwe, mulaakucafwikwa. Na kamuyuminishako bamwi amwebo mulaakuumbulushikwa. Munokwaambilako bamwi nshemwiiya pali Yehova apamilasho yakwe. Amucane ciindi akucafwa bamwi bayandika lucafwo, alimwi mutanolipatulula kubabo bamusuni alimwi bamubikila maano.—Tushimpi 18:1; 1 Bene Kolinto 15:58.

NSHEENGA MWACITA:

  • Amubandike amubyanu kwaamba ayi amucafwe

  • Amwaambe nshemutoyanda kwakubula kwiinda mweela