Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Mulakonsha Kusangalala Mumukwashi Wanu

 Lubasu 6

Cikwati Mbociba na Mwaba Amwaana

Cikwati Mbociba na Mwaba Amwaana

“Baana ncipo kuswa kuMwaami Lesa.” —Kulumbaisha 127:3

Kushalwa kwa mwaana kulaleta lusangalalo, alimwi amilimo iinji mucikwati. Ndimwaba bashali ano, ciindi cilaamfu cinanomanina kukulama mwaana. Kutoona alimwi akulisukama inga shaleta mapensho mucikwati. Noonse nobilo mulyeelete kwaalula mbomucita shintu kwaamba ayi mubikile maano mwanaanu alimwi akuyumya cikwati canu. Ino Baibo inga yamucafwa buyani pa mapensho mbuli aya?

 1 MULYEELETE KUSHIBA MWAANA MBWAALULA BUUMI

BAIBO ILAAMBA AYI: “Lusuno lulakalika moyo akulengesha nkumbu.” Alimwi, lusuno “talupi kuliyanda nabi kukalala bwangu.” (1 Bene Kolinto 13:4, 5) Mbuli mutumbu, inga kamubikila maano abuumbi ku mwaana. Nacibi boobo, ici inga capa beebanu kulinyumfwa anga tabatoobikilwa maano, aboobo mutalubiko kwaamba ayi abalo balisuni kubikilwa maano. Na mwakomenya moyo ankuumbu, inga mwabacafwa beebanu kulinyumfwa ayi balayandika alimwi balicite lubasu mukulama mwaana.

“Amwebo nobasankwa mulyeelete kukala calushibo lwa pacikwati abamakaanu.” (1 Pita 3:7) Mulyeelete kushiba ayi bakaanu bananootola ciindi cilaamfu kulama mwaana. Balicite milimo ipya ono, aboobo inga balisukama, kulema nabi kuba abuumba. Cimwi ciindi, inga bakalala, sombi mwebo tamweelete kukalala mukwiinga “ncibotu kuba muntu ulicata na wakalala kwiinda wooyo wakoma ndabala inene yoonse.” (Tushimpi 16:32) Munoyeyaawo pashintu bakaanu nshebasuni, alimwi munoobacafwa. —Tushimpi 14:29.

NSHEENGA MWACITA:

  • Bashali basankwa: Munoocafwa bakaanu kulama mwaana, nabi mashiku. Amuceyesheko shakucita kwaamba ayi munooba aciindi cilaamfu cakuba abakaanu alimwi amwanaanu

  • Bashali banakashi: Na beebanu kabasuni kumucafwa kulama mwaana, amubasuminishe. Na baalilwa kucita kabotu, mutabakalalili sobwe, sombi calusuno amubatondeshe mbobeelete kucita

 2 AMUYUMYE CIKWATI CANU

BAIBO ILAAMBA AYI: “Balaakuba mubili womwi.” (Mateyo 19:6) Nabi kwaamba ayi mwaba amwaana, mulyeelete kushiba ayi mwebo ambomwebenaabo ngu “mubili womwi.” Munokweelesha cankusu kuyumya cikwati canu.

Nobanakashi, munoolumba na beebaanu bamucafwa. Na kamubalumba bananoonyumfwa kabotu. (Tushimpi 12:18) Nobasankwa, munoobambila bakaanu ayi mulibasuni alimwi balicindeme kuli ndimwe. Munoobalumba mbobalama kabotu mukwashi.—Tushimpi 31:10, 28.

“Taaku muntu weelete kuyandoolabo shimukondelesha, sombi shikondelesha babye.” (1 Bene Kolinto 10:24) Lyoonse munoocita shibotu kubabo mbomweebenaabo. Amucane ciindi cakubandika, kulumba, alimwi akukutika na umwi kaamba. Mutanoolisuna na cesa kumakani akoonana. Amubikile maano kushintu nshebayanda mbomweebenaabo. Baibo ilaamba ayi: “Tamweelete kukakilana, sombibo na mwasuminishanya.” (1 Bene Kolinto 7:3-5) Aboobo makani aya amwaabandike ca moyo woonse ambomwebenaabo. Kukalika moyo kwanu alimwi akunyumfwishisha kulaakuyumya cikwati canu.

NSHEENGA MWACITA:

  • Munookwelesha kuba aciindi cakuba pomwi ambomwebenaabo

  • Munocitila mbomweebenaabo tuntu tuniininini twakubalengesha kushiba ayi mulibasuni, mbuli kubalembela ka kadi nabi kubapa cipo naciceyi

 3 KWIISHA MWANAANU KATETA

BAIBO ILAAMBA AYI: “Kuswa kubwanike ulishi malembo akwe Lesa asalalite, ayo akonsha kukupa busongo bweenga bwakuletela lupulusho.” (2 Timoti 3:15) Amulibambile mbweenga mwacita kwaamba ayi mwiishe mwanaanu. Alicite nkusu sha kwiiya, nabi katana kushalwa. Kaacili mumala ulashiba liswi lyanu akushiba na mwakondwa nabi mwakalala. Munoomubelengela kaacili kateta. Nacibi kwaamba ayi inga kaatanyumfwishishi nshemutoomubelengela, ici cilaakumucafwa kusunishisha kubelenga na akakomene.

Mwanaanu nabi aceye buyani, ulanyumfwa na kamumwiisha pali Lesa. Mwanaanu ulyeelete kumunyumfwa na kamupaila kuli Yehova. (Dutolonomi 11:19) Ciindi ndyemutoosekanaakwe amwaambe pashintu Lesa nshaakalenga. (Kulumbaisha 78:3, 4) Mwanaanu ndyaatoya cikula, ulanoobona mbomusuni Yehova alimwi alakwe ulaakumusuna.

NSHEENGA MWACITA:

  • Amupaile kuli Yehova kwaamba ayi amupe maano akulela kabotu mwanaanu

  • Kwaamba ayi mwanaanu atalike kwiiya kacili muniini, munoboshaawo maswi alimwi amiyeeyo iyandika ndyemutomwiisha