Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Shikumbulo Kumiipusho ili 10 Bacanike Njobepusha

 MWIIPUSHO 3

Ino Ndyeelete Kwaamboshanya Buyani Abashali Bangu?

Ino Ndyeelete Kwaamboshanya Buyani Abashali Bangu?

MULANDU MWIIPUSHO UYU NCOSUNIKI

Kunyumfwana abashali bako inga kwalengesha ayi shintu shinokweendela kabotu mubuumi.

INO INGA WACITA BUYANI?

Yeeya bukalo ubo: Mbushiku bwacitatu mashiku. Geoff ucite myaaka 17, wamanisha kusebensa ncito shoonse nshalinga kucite, ono cashika ciindi cakwaamba ayi alyookeshe! Wanyasha TV akukala pacuuna ncaasuni abuumbi.

Ayi akalebo, abalo baishi mbaaba bashika, alimwi batoboneka ayi tabakondetwe.

Cabukali baamba ayi: “Geoff! Utokweebela TV muciindi cakwaamba ayi ucafwe mwanike wako kulemba homuweki? Tonyumfwiwo na ndakutuma webo ayi!”

Cakutakondwa Geoff waamba ayi: “Aba abalo, mwatalika kale.”

Baishi beemikana akumulanga. Lyalo baamba ayi: “Ayi nshi webo mwanike?”

Geoff wakumbula akwaamba ayi: “Taakuwo ncendaamba,” kumwi uku kaabisha kumeenso.

Lyalo Baishi bakalala abuumbi akwaamba ayi. “Utakeeleshi lyobilo kunkumbula mushobo uyo wanyumfwa!”

Na ndiwe Geoff, inga wacita buyani kwaamba ayi shamushobo uyu shitacitiki?

IMIKANA AKUYEEYA!

Kubandika abashali bako kulibo anga nkweensha motoka. Na wacana nshila njosebensesha yacalwa, inga walangoola imwi.

 KUCAKUBONENAAKO:

Mwanakashi wacanike waliina lya Leah wakaamba ayi: “Cilanshuupa kubandika abata. Cimwi ciindi inga kambandika ambabo balo kabomwiitebo, lyalo pesule ndyeshi banjiipushe ayi, ‘sa utokwaamba andime?’”

KULI SHINTU SHOTATWE LEAH NSHEENGA WASALA KUCITA.

  1. Kubakalookela baishi.

    Leah inga wabakalookela baishi akwaamba ayi, “Amunyumfwe, makani ngontoyanda kumulwita! Alisuniki abuumbi!”

  2. Kucileka kwaamba abaishi.

    Leah ulakonsha kutakata akutabalwita baishi lipensho ndyaacite.

  3. Kulindila ciindi cimwi cibotu, akwaatalika alimwi makani.

    Leah inga wekala panshi ciindi cimwi akubandika abaishi, na kubalembela nkalata kubalwita lipensho lyakwe.

Ino ncili nceenga wayuminisha Leah kwaamba ayi acite?

NCOWEELETE KUSHIBA NCAKWAAMBA AYI: Kuli makani amwi ngobatoyeeya baishi Leah—tabacishiwo ayi Leah camucima. Aboobo na Leah wasala kusebensesha Nshila ya A, baishi inga tabashibiwo ncaatokalookila. Nshila iyi inga tailengeshi ayi baishi Leah bakutike nshaatokwaamba, alimwi kucita boobo inga takutondeshi bulemu. (Bene Efeso 6:2) Ncakwiila, nshila iyi taikoonshi kucafwa uliwoonse.

Bweenka mbweenga walangoola nshila imwi na wacana ayi njosebensesha yacalwa, inga walangoola nshila yeenga yakucafwa ayi unonyumfwana abashali bako

Nabi kwaamba ayi Nshila ya B inga yaba yuubu kukonkela, sombi teshi yabusongo. Ino ngumulandunshi? Mukwiinga, kwaamba ayi Leah acane lucafwo palipensho ndyaacite, ulyeelete kubandika abaishi—alimwi kwaamba ayi bamucafwe, balyeelete kushiba lipensho ndyaacite. Aboobo kuumuna inga takucafwi.

Na wasebensesha Nshila ya C, Leah inga taalinyumfwi ayi taaku nceenga wacita mukwiinga waalilwa kwaamba abaishi ciindi cakutaanguna. Sombi utokweelesha kwaabandika makani aya ciindi cimwi. Alimwi na Leah wasala kulembela baishi nkalata, inga wanyumfwa kabotu peenka apo.

Kulemba nkalata inga kwamucafwa kubamba kabotu nshatoyanda kubalwita. Bamana kubelenga nkalata, baishi Leah balakonsha kushiba shoonse nshaalinga kusuni ayi abalwite, ici inga cabacafwa kushiba lipensho ndyaacite. Aboobo nshila ya C inga yacafwa boonse bobilo, Leah alimwi abaishi. Kulemba nkalata na kukala panshi kubandika, nshila iyi ilacatana anjiisho yamu Baibo ituyuminisha “kucita shintu shileta luumuno.”—Bene Loma 14:19.

Ino nshiinshi shimwi Leah nsheenga wacita?

Yeeyako nshila yomwi, akwilemba panshi apa. Lyalo ulembe asheenga shacitika.

 AAMBA SHINYUMFWIKA KABOTU KABOTU

Utalubi kwaamba ayi nsheenga waamba alimwi abashali bako nsheenga bayeeya ayi nshewaamba, cimwi ciindi shilapusana.

KUCAKUBONENAAKO:

Atwaambe ayi bashali bako bakwiipusha mulandu ncotooboneka kukalala. Mpeeke webo nkubakumbula ayi, “Nshisuniwo kwaamba pamakani aya.”

Ono kubashali bako ici inga caamba ayi: “Nebo nshimushomiwo, aboobo inga nshimulwiitiwo shili mumoyo wangu. Ntooya mukulwiita babyangu lipenshi ndyeencite kuteshi mwebo.”

Yeeya kwaamba ayi ulicite lipenshi alimwi bashali bako bakulwiita ayi batokucafwa. Ono webo nkubakumbula ayi: “Mutapengi. Ntoshiba shakucita nemwiine.”

  • Kubashali ici inga caamba ayi:

  • Inga wakumbula kabotu na waamba ayi: