Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Shikumbulo Kumiipusho ili 10 Bacanike Njobepusha

 MWIIPUSHO 7

Ino Inga Ndacita Buyani Na Kabayunga Koonana?

Ino Inga Ndacita Buyani Na Kabayunga Koonana?

MULANDU MWIIPUSHO UYU NCOSUNIKI

Shintu nsheenga wasala kucita pamakani akoonana, shilakuma buumi bwako bwakunembo.

INO INGA WACITA BUYANI?

Yeeya bukalo ubu: Peendabo myeenshi yobilo, kuswa ciindi Heather ndyaakatalika kweenda a Mike, sombi utolinyumfwa anga bakashibana ndikale. Shiindi shiinji balatuminana makani pafooni, kubandika maola aanji, alimwi balakonsha kushiba mubye ncasuni kwaamba nabi kaatana kumanisha! Ono Mike ulisuni ayi ishi shiteelibo mukwaamboshanya, kuli cintu cimwi ncaasuni.

Myeenshi yobilo yainda, Mike a Heather baleelabo mukucatana mumaansa alimwi akufyontana paniinibo. Heather tasuni ayi bacite cintu cimwi kwiinda pasheeshi. Sombi taasuniwo Mike ayi amukake. Taakuwo muntu umusangalasha mbuli bucita Mike. Kwilika pasheeshi ulalyaambila mwiine ayi, ‘Nebo a Mike tulisunene abuumbi . . . ’

Na wakashika kale ciimo cakweebwa alimwi uli mubukalo bwake Heather, ino inga wacita buyani?

IMIKANA AKUYEEYA!

Koonana ncipo kuswa kuli Lesa kubantu beebenebo beenka. Koonana kwabantu bateebene nkusebensesha cipo ici munshila iteelete. Kulibo anga nkubwesa cakufwala cibotu ncowakapekwa akutalika kukolopela muŋanda

Na wapwaya mulawo weendelesha shilengwa, mbuli mulawo wankusu shikwelela panshi, inga walicisa. Mbocibete na watyola milawo yambotweelete kulilemeka mbuli mulawo waamba ayi: ‘Mulyeelete kutalamuka kubufuule.’—1 Bene Tesalonika 4:3.

Ino ngamapensho ali eenga acitika pamulandu wakutakonkela mulawo uyu? Baibo ilaamba ayi: ‘Uyo ucita bufuule ulabisha mubili wakwe.’ (1 Bene Kolinto 6:18 NWT) Ino nciinshi citotondesha ayi makani aya ngancine?

 Bashikulangoola makani bakacana ayi bacanike baanji bakoonana kabatana kweebana balacana mapenshi mbuli:

  • KULISUKAMA. Bacanike baanji bakatalika koonana kacitana kushikila ciindi cakweebwa nabi kweeba, balaamba ayi nicakaba kabotu nakwiinga tabana kucita boobo.

  • KUTASHOMEKA. Pesule lya koonana, uli woonse ulatalika kuyeeya ayi, ‘Ino ngaani umwi ngwakoonanakwe?’

  • KUTYOMPWA. Kuswa panshi lyamoyo, banakashi baanji balisuni muntu weenga wabashitilisha kuteshi wooyo ubasekanyabo akubashiya. Abalo basankwa baanji tabasuni kuba amwanakashi usumina na bamulwita makani akoonana.

  • Cancine ncakwaamba ayi: Na wasumina koonana amuntu ngotana kweebanakwe nkokwaamba ayi, walisampula alimwi wasowa cintu ciyandika abuumbi. (Bene Loma 1:24) Mubili wako ncintu cicindeme abuumbi alimwi toeelete kuunyonyoola!

Tondesha ayi ulicite nkusu shakulyeendelesha kwiinda ‘mukutalamuka bufuule.’ (1 Bene Tesalonika 4:3) Lyalo na ciindi cakweebwa na kweeba cikashike, ulaakuba acoolwe cakoonana. Alimwi ulaakusangalala cakubula kulisukama, kuba abuumba, alimwi akulinyumfwa kutashitilishikwa uko nkobanyumfwa abo boonana kabatana kweebana.—Tushimpi 7:22, 23; 1 Bene Kolinto 7:3.

 INO UTOYEEYA BUYANI?

  • Sa muntu ukusuni cancinencine inga wabika buumi bwako mumapensho akulengesha ayi upenshekwe mumiyeeyo?

  • Sa muntu ukubikila maano inga wasuna kubika bushicibusa bwako a Lesa mumapensho?—Bene Ebulu 13:4.