Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Shikumbulo Kumiipusho ili 10 Bacanike Njobepusha

 MWIIPUSHO 2

Ino Ngumulandunshi Ndalisukama Ambomboneka?

Ino Ngumulandunshi Ndalisukama Ambomboneka?

MULANDU MWIIPUSHO UYU NCOSUNIKI

Kuli shintu shimwi shiyandika abuumbi kwiinda sheesho nshobona na walilanga muligilasi.

INO INGA WACITA BUYANI?

Yeeya bukalo ubu: Julia na walilanga muligilasi ulalibona kwiina abuumbi. Nacibi kwaamba ayi bashali bakwe alimwi ababye balamulwiita ayi “ulikokete anga nkasamu,” lakwe ulalyaambila ayi, “ndisuniki kukokako paniinibo.”

Julia wayeeya mbweshi acite kwaamba ayi akoke. Wayeeya ayi ulyeelete kucileka kulya kwanshiku shiniini . . .

Ino inga wacita buyani na walinyumfwa bweenka mbuli Julia?

IMIKANA AKUYEEYA!

Mboolibona inga twakoshanisha akulilanga muligilasi itabete kabotu

Cilibo kabotu kubikila maano mboboneka. Alimwi Baibo ilaambawo pakuboneka kabotu kwabanakashi mbuli Saala, Lakelo, Abigelo alimwi abasankwa mbuli Josefu, aDefedi. Baibo ilaamba ayi mwanakashi wa liina lya Abishagi wakalinga “mubotu abuumbi.”—1 Baami 1:4.

Nacibi boobo, bacanike baanji balaciindilisha kubikila maano mbobaboneka. Kucita boobo inga kwaleta mapensho anene abuumbi. Boona mbocibete boobo:

  • Kweelana abeshikwiiya sha buumi, bakacana kwaamba ayi 58 pesenti yabanakashi bacanike balalyaamba ayi baliinite abuumbi, nacibi boobo banakashi bashika ku 17 pesentibo, mbobakalinga kwiinite abuumbi.

  • Kweelana abeshikwiiya bamwi, 45 pesenti yabanakashi bakokete abuumbi bakalinga kuyeeya ayi baliinite abuumbi!

  • Mukweelesha kwaamba ayi bakoke, bacanike bamwi bacanika kwaamba ayi balicite bulwashi bwansala bwiitwa ayi anorexia—bulwashi bucaya bweshi kusa pamulandu wakulicaya ansala.

 Na ulicite shitondesho sha bulwashi bwa anorexia, nabi bulwashi bumwibo bwisa pamulandu wakutalya, langoola lucafwo. Cakutaanguna lwiita bashali bako na muntu umwi munene ngoshoma. Baibo ilaamba ayi: “Shicibusa wancinencine ulatondesha lusuno ciindi coonse, alimwi ngomukwanu wakashalilwa kukucafwa mumapensho.”—Tushimpi 17:17. NWT

KUCINJA KUBOTU NKWEENGA WACITA!

Kwaamba cakwiila, buntu bwamukati mbobupa muntu kuboneka kabotu na sobwe. Yeeya Abusalomu mwaana wa Mwaami Defedi. Baibo ilaamba ayi:

‘Takwakalingawo musankwa wakalinga kulumbaishikwa pakuboneka kabotu mbuli Abusalomu. . . . Taakalinga kucitewo kampenda kuswabo kumutwi kushika akumyeendo.’—2 Samwelo 14:25.

Nacibi boobo, munyamata uyu wakalinga kulibonesha abuumbi, kusunishisha kuba ampuwo, alimwi akutashomeka! Aboobo Baibo tayaambi shibotu pali Abusalomu; ilatondesha ayi wakalinga muntu wa miibo ibiibi abuumbi; muntu utalisendi, alimwi ucite moyo ubiibi wakucaya.

Nceceeco Baibo ncoiitululikila ayi:

‘Amulifwalike buntu bupya.’—Bene Kolose 3:10. NWT

“Kulibotesha kwanu kutabibo kwapansengwe . . . , sombi akube kwamukati mumoyo.”—1 Pita 3:3, 4.

Nabi kwaamba ayi cilibo kabotu kuyanda kulibotesha, cintu cisuniki abuumbi kwiinda mboolibona, njimibo njoocite. Mukuya kwaciindi, miibo ibotu ilakucafwa kuba muntu uboneka kabotu kwiinda mbonekelo yamubili wako! Mwanakashi wacanike wa liina lya Phylicia wakaamba ayi: “Na uli mubotu, bantu balakonsha kufwambaana kukubona, sombi buntu bwamukati alimwi amiibo ibotu njeenga bantu bebaluka pali ndiwe.”

ATUBONE PAMAKANI AMBOOLIBONA

Sa liinji ulalinyumfwa cibiibi amboboneka?

Sa wakayeeyawo kale shakunana mafuta asalalisha na kuciindilisha kuliima kulya kwaamba ayi ucinje mboboneka?

Na kacikonsheka, nciinshi nceenga wasuna kucinja pamubili wako kwaamba ayi unolibona kabotu? (Congaawo sheesho shoonse nsheenga wacinja.)

  • KULAAMPA

  • KWIINA

  • MISUSU

  • MUBILI WAKO

  • KUMEENSO

  • KUSALALA NA KUSHIIYA

Na wakumbula ayi ee kumiipusho yobilo yakutaanguna, alimwi na wacongaawo shintu shotatwe nabi kwiindaawo pamwiipusho watatu, yeeya makani aya: Inga walangila kwaamba ayi bamwi tabakuboni mbuli mboolibona. Ncintu cuubu abuumbi kuciindilisha kucita shintu alimwi akulisukama amboolibona.—1 Samwelo 16:7.