Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Shikumbulo Kumiipusho ili 10 Bacanike Njobepusha

 MWIIPUSHO 1

Ino Ndime Muntu Uli Buyani?

Ino Ndime Muntu Uli Buyani?

MULANDU MWIIPUSHO UYU NCOSUNIKI

Kulishiba mbobete alimwi akushiba shintu nshoshoma kulaakukucafwa kusala camaano na wacana masunko.

INO INGA WACITA BUYANI?

Yeeya bukalo ubu: Kweendabo mamineti ali 10 kuswa ciindi Karen ndyaashika ku paati, lyalo wanyumfwa liswi lya muntu ngweeshi kusule kwakwe.

“Ino ngumulandunshi uliimfwibo apa?”

Karen wacebuka ayi abone mubye Jessica uyo ucite mabotolo mumaansa ngwaswabo mukucalula. Karen ulicishi ayi mumabotolo umo muli bwalwa. Jessica watambika Karen libotolo lyomwi akwaamba ayi: “Webo uli munene ulyeelete kulikondelesha, sa tabushi ubo?”

Karen ulisuni kukaka, sombi utoyeeya ayi Jessica ngumubyaanji. Alimwi Karen tasuni kwaamba ayi mubye amubone anga ngumuntu unyumfwisha butolo. Jessica ngumuntu womwi uli kabotu. Na lakwe ulanwa, nkokwaamba ayi cilibo kabotu kunwa. Karen walyaambosha mumoyo ayi, ‘ncakunwabo. Cilipusene akusebensesha misamu ikola.’

Ino inga wacita buyani na walicana mubukalo mbuli bwakwe Karen?

IMIKANA AKUYEEYA!

Kwaamba ayi usale camaano mubukalo mbuli boobu, ulyeelete kulishiba kabotu omwiine. Kulishiba kabotu omwiine, cilaamba kushiba mboweelete kulilemeka, shintu nshobona kucindama mubuumi alimwi ashintu nshoshoma. Na waba alushibo ulu, ulaakuba ankusu shakweendelesha buumi bwako muciindi cakulekela bantu bamwi ayi bakweendeleshe.—1 Bene Kolinto 9:26, 27.

Ino inga wacita buyani kwaamba ayi ube ankusu shili bobulya? Nshila ibotu nkutaanguna kukumbula miipusho iyi itokonkaawo.

 1 INO NSHINTUNSHI NSHOONCITA KABOTU?

Kushiba shintu nshoocita kabotu alimwi amiibo ibotu njoocite kulaakukucafwa kuyuma.

CAKUBONENAAKO CAMU BAIBO: Mutumwi paulo wakalemba ayi: “Nshina kucishiba kwaamba kabotu, sombi lushibo ndicite.” (2 Bene Kolinto 11:6) Mukwiinga wakalinga kwaanyumfwishisha Malembo, wakeendilisha kuyuma ciindi bamwi ndyebakalinga kumukasha. Taakwe kuboolela mwisule pamulandu washintu nshebakalinga kwaamba.—2 Bene Kolinto 10:10; 11:5.

LIPUSHE OMWIINE. Panshi apa, lemba shintu nshoocita kabotu na lushibo ndoocite.

Ono sansulula muubo ubotu ngoocite. (Kucakubonenaako, sa uli muntu ubikila maano bamwi? shikwaaba? muntu ushomeka? Alimwi ulama ciindi?)

2 INO NSHINTUNSHI NSHOONTACITI KABOTU?

Bweenka mbuli ceeni mboitakonshi kuyuma na lubasu lomwi lwanjiyo kaluteshi luyumu, ayalo miibo yako ibotu ilakonsha kubica na kolekela shintu nshotaciti kabotu kweendelesha mbolinyumfwa alimwi anshoocita.

CAKUBONENAAKO CAMU BAIBO: Paulo wakalinga kucishi shintu nshatalinga kucita kabotu. Wakalemba ayi: “Ndakondwa amoyo wangu woonse ceebo ca Milawo iswa kuli Lesa sombi ndishi kwaamba ayi muli ndime muli mulawo uyo utasuni miyeeyo yangu mulawo umwi uyo ukonkela nshila ya bubi ngowalengesha ayi mbe musha wa bubi.”—Bene Loma 7:22, 23.

LIPUSHE OMWIINE. Ino nshili mbasu nshootaciti kabotu nshoweelete kwaalula?

 3 INO NSHINTUNSHI NSHONSUNI KUSA MUKUCITA KUNEMBO?

Sa inga watanta takisi akulwiita dilaiva ayi anoshingulukabo pamusena womwi kushikila mafuta amanemo mumotoka? Uko inga kwaba kutayeeya kabotu—alimwi akunyonyoola maali!

Ciiyo? Kubikila limwi shakusa mukucita kunembo cilacafwa kushiba nkotooya mubuumi akuleya kunoshingulukabo pomwi pomwi. Ulaba akwakuya alimwi uleshiba mbweshi ukeende.

CAKUBONENAAKO CAMU BAIBO: Paulo wakalemba ayi: “nshibete anga ngumuntu utoocicilabo ncaatabwene.” (1  Bene Kolinto 9:26) Muciindi cakunoshingulukabo akwaalilwa kucita shintu shisuniki abuumbi mubuumi, Paulo wakalibikila shakucita mubuumi alimwi akucita kweelana anshakalinga kusuni.—Bene Filipi 3:12-14.

LIPUSHE OMWIINE. Panshi apa, lemba shintu shotatwe nshoosuni kusa mukucita mumwaaka utoosa.

4 INO NSHINTUNSHI NSHONSHOMA?

Na wakakatila kushintu nsholemeka mubuumi alimwi anshoshoma, ulaakuba anga ncisamu ciyumu citakoonshi kuwa nabi kwesa cipuupu

Na koteshi shintu nshoshoma, cilaakukwaalila kusala ncoweelete kucita. Bweenka mbuli nantaambwe mbwaaluka, awebo unanokwaaluka aluka kwaamba ayi weelane ababyo—kucita boobo cilabonesha ayi tocishiwo nshoweelete kucita.

Mubupusano, na ulacita shintu kweelana anshoshoma, ulakwiindilisha kuba mbobete—nabi bamwi kabacita shaabo.

CAKUBONENAAKO CAMU BAIBO: Ciindi mpashi kaacili wacanike, mushinshimi Danyelo ‘wakasala mumoyo wakwe’ ayi ulaakukonkela milawo yakwe Lesa, nabi wakalinga kulaale amukwashi wakwe. (Danyelo 1:8) Kwiinda mukucita boobo, taakwe kwaluka alimwi wakakakatila shintu nshaakalinga kushoma. Danyelo wakeendilisha kukala buumi kweelana anshakalinga kushoma.

LIPUSHE OMWIINE. Ino nshiinshi nshoshoma? Kucakubonenaako: Sa ulashoma muli Lesa? Na ulashoma, ino ngumulandunshi? Ino mbumboni buli bukupa kushoma ayi Lesa nkwaali?

Sa ulashoma ayi njiisho shakwe Lesa shaamba pamakani akulilemeka inga shakucafwa? Na mboboobo, ino ngumulandunshi?

Mukumanisha, ino inga wasalaawo cili—kuba anga nditewu lili panshi lyeshikulukabo amuuwo nabi kuba anga ncisamu cishimpite citakoonshi kuwa nabi cipuupu cooma buyani? Na wakakatila kushintu nsholemeka akushoma mubuumi ulaakuba mbuli cisamu ici. Alimwi ici cilaakukucafwa kukumbula mwiipusho wa, Ino ndime muntu uli buyani?