Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Makani Abotu Kuswa Kuli Lesa!

 CIIYO 8

Ino Lesa Ulasuminishisha Nshi Bubiibi A Mapenshi?

Ino Lesa Ulasuminishisha Nshi Bubiibi A Mapenshi?

1. Ino bubiibi bwakatalika buyani?

Lesa wakasuminisha bantu kweendelesha pa ciindi ceelete kwaamba ayi babone ayi inga tabakwe bamane mapenshi abantu

Bubiibi bwakatalika pa cishi, Sataana ndyakaamba bubeshi bwakutanguna. Sataana ndyakalengwa wakalinga mungelo umaninite, ono ‘taana kucitawo shalushinisho.’ (Joni 8:44) Wakatalika kuyandisha kulambila kweelela Lesa eenkabo ayi kunoya kuli nguwe. Sataana wakabeca mwanakashi wakutanguna, Efa, a kumuyungoola kwaamba ayi anyumfwile nguwe muciindi cakunyumfwila Lesa. Adamu alakwe wakaba ku lubasu lwakwe Efa mukutanyumfwila Lesa. Kutanyumfwila kwakwe Adamu kwakaleta mapenshi a lufu.—Amubelenge Matalikilo 3:1-6, 19.

Sataana ndyaakayungoola Efa mukutanyumfwila Lesa, wakatalika kupikisha ayi Lesa taelete kweendelesha. Bantu baanji bakalibika ku lubasu lwakwe Sataana mukukaka bweendeleshi bwakwe Lesa. Aboobo, Sataana ngo “mwaami wa mucishi.”—Amubelenge Joni 14:30; 1 Joni 5:19.

2. Sa Lesa nshaakalenga shakalinga kucite kampenda?

Yoonse milimo yakwe Lesa ilimaninite. Bantu a bangelo mbaakalenga Lesa bakalinga ankusu sha kucikonsha kumunyumfwila mukumaninina. (Dutolonomi 32:4, 5) Lesa wakatulenga ankusu sha kulisalila kucita shibotu nabi shibiibi. Inga twatondesha lusuno kuli Lesa kwiinda mu cipo ca kulisalila.—Amubelenge Jemusi 1:13-15; 1 Joni 5:3.

3. Ino Lesa ulasuminishisha nshi mapenshi kushika acecino ciindi?

Kuswabo kupikisha bweendeleshi bwakwe Lesa ndi kwakatalika mu Edeni, Yehova ulakusuminisha kushika acecino ciindi. Ulaasuminishisha nshi? Ulayanda kushinisha ayi taakuwo ucite nkusu sha kweendelesha kabotu kwakubula kucafwikwa a Lesa. (Shikushimikila 7:29; 8:9) Shicitika  mu myaaka yendaawo 6,000, shilashinisha bwenka ubo. Bantu beendelesha balaalilwa kukushaawo nkondo, milandu, kulyatililana, nabi malwashi.—Amubelenge Jelemiya 10:23; Bene Loma 9:17.

Kushiyana abweendeleshi bwa bantu, bweendeleshi bwakwe Lesa bulacafwa basumina kweendeleshekwa anguwe. (Isaya 48:17, 18) Onoono, Yehova ulaakunyonyoola bweendeleshi bwa bantu. Beenkabo basala kweendeleshekwa a Lesa mbeshi bakakale pa cishi.—Isaya 11:9.—Amubelenge Danyelo 2:44.

4. Ciindi Lesa ncasuminisha bantu kweendelesha cilatupa coolwe ca kucita nshi?

Sataana wakaamba ayi bantu tabasebenseli Yehova kwakubula mpindu. Sa inga mwayanda kushinisha ayi ubo mbubeshi? Inga mwashinisha! Mukwiinga Lesa wakakalika moyo, soonse tulicite coolwe ca kusala kweendeleshekwa anguwe nabi bantu. Nshotucita nsheshitondesha bweendeleshi mbotwasala.—Amubelenge Jobo 1:8-12; Tushimpi 27:11.

5. Ino inga twatondesha buyani ayi twasala Lesa kuba Mwaami wesu?

Nsho tusala shilayubulula na tulisuni Lesa kuba Mwaami wesu

Inga twasala Lesa kuba Mwaami wesu na tutokwiiya a kucita nshotwiiya mu Maswi akwe Lesa, Baibo. (Joni 4:23) Inga twakaka Sataana kuba mwaami wesu na tatutoba mu mapolitiki a munkondo, mbuli mbwaakacita Yesu.—Amubelenge Joni 17:14.

Sataana ulasebensesha nkusu shakwe kulenga ayi shintu shibiibi shinoboneka anga nshibotu. Na twakaka sha mushobo uyo, bamwi babyesu a beshikamukowa inga batuseka nabi kutukasha. (1 Pita 4:3, 4) Aboobo, tulyeelete kusalaawo. Sa tulaakunocanika abantu basuni Lesa? Sa tulaakunonyumfwila milawo yakwe muli maano a lusuno? Na twacita boobo, tulaakushinisha ayi Sataana wakabeca ndyakaamba ayi muntu na wapenshekwa inga tasebenseli Lesa.—Amubelenge 1 Bene Kolinto 6:9, 10; 15:33.

Lesa wakatondesha lusuno ku bantu, aboobo inga twashoma ayi bubiibi a mapenshi shilaakumana. Abo bashoma ayi Lesa ngo weelete kweendelesha a kumusala kuba Mwaami wabo, balaakukala pa cishi muyayaya.—Amubelenge Joni 3:16.