Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Makani Abotu Kuswa Kuli Lesa!

 CIIYO 13

Ino Nshiinshi Sheshi Shikacitike ku Bupailishi?

Ino Nshiinshi Sheshi Shikacitike ku Bupailishi?

1. Ino Bupailishi boonse mbubotu?

Mu bupailishi boonse mulacanika bayandisha kupaila Lesa. Makani abotu nga kwaamba ayi Lesa ulababona alimwi ulabalama. Ono cibiibi ncakwaamba ayi, bantu bamwi balayubila mu bupailishi ndi bacita shibiibi. (2 Bene Kolinto 4:3, 4; 11:13-15) Kweelana amakani anyumfwika mu misena ishiyeneshiyene, bamubupailishi bumwi balacafwilisha bacaya bantu baanji na kuli nshobasuni ayi batokweendelesha bacite. Balacafwilisha nkondo, alimwi balapensha akoona baana cakukakatisha. Maama ico mbocikalasha bayandisha kupaila Lesa!—Amubelenge Mateyo 24:3-5, 11, 12.

Bupailishi bwa lushinisho bulalemeka Lesa, ono bupailishi bwa bubeshi bwalo bulamukalasha. Buleisha shitacaniki mu Baibo, mbuli shiiyo sha bubeshi pali Lesa a bafu. Ono Yehova ulisuni ayi bantu bashibe lushinisho pali nguwe.—Amubelenge Esekelo 18:4; 1 Timoti 2:3-5.

2. Ino nshiinshi sheshi shikacitike ku bupailishi?

Cisangalasha ncakwaamba ayi Lesa taabecekwi abupailishi buboneka anga bulimusuni anu bulisuni cishi cakwe Sataana. (Jemusi 4:4) Maswi akwe Lesa aleeta bupailishi boonse bwa bubeshi ayi “Babiloni munene.” Babiloni wakalinga mushi ukulukulu uko kwakatalikila bupailishi bwa bubeshi bulobe ndi bwakamana mu ciindi cakwe Nowa. Onoono, cakuteengashila Lesa ulakuleta bunyoonyoshi ku bupailishi bubeca a kulyatilila bantu.—Amubelenge Ciyubululo 17:1, 2, 5, 16, 17; 18:8.

Kuli makani abotu aamwi. Yehova taana kulubaako ku bantu boonse bayandisha kwiiya pali nguwe bacanika mu bupailishi bwa bubeshi bushiyeneshiyene mu cishi coonse. Utocatanya bantu bamushobo uyo kwiinda mu kubeisha lushinisho.—Amubelenge Mika 4:2, 5.

 3. Bantu bayandisha kupaila Lesa balyeelete kucita nshi?

Bupailishi bwa lushinisho butocatanya bantu

Yehova ulalama bantu basuni shalushinisho a shibotu. Ulabayuminisha kwaamba ayi basweemo mu bupailishi bwa bubeshi. Bantu basuni Lesa balaswaamo a kutalika kucita shimusangalasha.—Amubelenge Ciyubululo 18:4.

Mu ciindi ca batumwi, bantu ndi bakanyumfwa makani abotu kuswa ku batumwi, bakasekelela. Bakeeya bukaalo bupya kuswa kuli Yehova, bukaalo busangalasha, bucite mpindu a lulangilo. Cino ciindi inga tweeyako ku shibotu nshobakacita, mukwiinga ndi bakanyumfwa makani abotu bakatalika kusebensela Lesa mu bukaalo bwabo.—Amubelenge 1 Bene Tesalonika 1:8, 9; 2:13.

Yehova ulatambula baabo baswa mu bupailishi bwa bubeshi na besa mukuba pantu pomwi abeshikamukowa balambila Lesa mu lushinisho. Na mukanyumfwile nshaatomwambila Yehova, mulaakuba bashicibusa bakwe, alimwi mulaakucana beshikamukowa balusuno balambila Yehova, alimwi mulaakukala muyayaya.—Amubelenge Maako 10:29, 30; 2 Bene Kolinto 6:17, 18.

4. Ino Lesa ulaakucita nshi kwaamba ayi bantu mu cishi coonse bakasangalale?

Bunyonyooshi bweshi bukese pa bupailishi bwa bubeshi nga makani abotu. Ico cilakulenga ayi mapenshi mu cishi coonse akamaane. Bupailishi bwa bubeshi teshi bukabece nabi kupansaanya bantu tubili. Boonse beshi bakanoliiko balakunocatene mu kulambila Lesa wa ncinencine eenkabo.—Amubelenge Ciyubululo 18:20, 21; 21:3, 4.