Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Makani Abotu Kuswa Kuli Lesa!

 CIIYO 3

Sa Ncancinencine Makani Abotu Alaswa Kuli Lesa?

Sa Ncancinencine Makani Abotu Alaswa Kuli Lesa?

1. Ngani wakalemba Baibo?

Makani abotu akwaamba ayi bantu balaakukala buumi butamaani pa cishi alilembetwe mu Baibo. (Kulumbaisha 37:29) Mu Baibo muli mabuku 66. Lesa wakasebensesha bantu 40 kulemba Baibo. Peenda myaka 3,500 Mose ndyakalemba mabuku osanwe (5) akutalikilaako. Libuku lyakweelako lyalo peenda myaka 1,900 mutumwi Joni ndyakalilemba. Ino bakalemba Baibo bakalemba miyeeyo ya baani? Lesa wakasebensesha mushimu usalashi kutangilila bakalemba Baibo. (2 Samwelo 23:2) Tabakwe kulemba miyeeyo yabo, sombi miyeeyo yakwe Lesa. Aboobo Lesa ngo wakalemba Baibo.—Amubelenge 2 Timoti 3:16; 2 Pita 1:20, 21.

2. Inga twashinisha buyani ayi Baibo yakaswa kuli Lesa?

Tulishi ayi Baibo yakaswa kuli Lesa mukwiinga ilaamba sha lushinisho shoonse sheshi shikacitike kunembo. Taaku muntu wenga wacita ca mushobo uyo. (Joshuwa 23:14) Lesa Shinkusu shoonse eenkabo ngwenga wabona sheshi shikacitike kunembo ku bantu.—Amubelenge Isaya 42:9; 46:10.

Tulyeelete kushinisha ayi libuku lyakaswa kuli Lesa lilipusene amabuku amwi. Baibo yakalembwa mu mishobo iinji alimwi bantu baicite mbaanji. Nacibi ayi yakalembwa kalekale, Baibo ilanyumfwana ashaamba sayansi. Abalo beshikulemba bonsebo 40 nshobakalemba shilanyumfwana. * Aboobo, Baibo ilashinisha ayi Lesa ngu Lesa wa lusuno, alimwi ilicite nkusu sha kucafwa bantu bakalinga kucita shibiibi kunocita shibotu. Ishi shoonse nshetwaambawo peculu shilashinisha ayi Baibo nga Maswi akwe Lesa.—Amubelenge 1 Bene Tesalonika 2:13.

 3. Ino Baibo ilaamba nshi?

Cintu comwi cinene Baibo nco yaamba nga makani abotu akwaamba ayi Lesa ulisuni bantu kunokala kabotu. Malembo alaamba ayi kumatalikilo ebantu bakaalilwa kusebensesha coolwe ncobakabapa ca kukala mu paladaiso pa cishi. Alimwi Malembo alaamba mbweshi Lesa akabooshe paladaiso kunembo.—Amubelenge Ciyubululo 21:4, 5.

Mu Baibo mulacanika milawo ashimwi shakutucafwa nabi kututangilila. Alimwi, Baibo ilaamba pa lyashi lya kalekale litondesha shintu Lesa nshaakacita ku bantu, aboobo kuyubulula mibo yakwe Lesa. Pa ceebo ceeco, Baibo inga yamucafwa kwishiba Lesa. Ilaamba mbwenga mwaba bashicibusa bakwe Lesa.—Amubelenge Kulumbaisha 19:7, 11; Jemusi 2:23; 4:8.

4. Ino nciinshi ncenga camucafwa kunyumfwishisha Baibo?

Aka kabuku nga kamucafwa kunyumfwishisha Baibo mbuli Yesu mbwaakalinga kucita. Wakalinga kwaamba pa Malembo ashiyeneshiyene a kwaasansulula “kwaamba ayi banyumfwishishe Malembo.”—Amubelenge Luka 24:27, 45.

Taakuwo shintu shinyumfwika kabotu anga nga makani abotu aswa kuli Lesa. Nacibi boobo, bantu bamwi tabasuni kwaanyumfwa, bamwi abalo balakalala na mwabalwiita pa makani abotu. Ico taceelete kumubosha pesule, mukwiinga pa kwaamba ayi mukabe abuumi butamaani mulyeelete kushiba Lesa.—Amubelenge Joni 17:3.

 

^ par. 3 Amubone kabuku ka A Book for All People.