Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Makani Abotu Kuswa Kuli Lesa!

 CIIYO 14

Ino Lesa Ulacatanishisha Nshi Bantu Bakwe?

Ino Lesa Ulacatanishisha Nshi Bantu Bakwe?

1. Ino Lesa wakacatanishisha nshi bene Isilaeli?

Lesa wakacatanya lusubo lwakwe Abulaamu kuba mushobo womwi alimwi wakabapa amilawo. Mushobo uyo wakautumba ayi “Isilaeli” alimwi wakausebensesha kuyubulula kulambila kwa lushinisho a maswi akwe. (Kulumbaisha 147:19, 20) Aboobo bantu bamishobo yoonse niinga baba acoolwe kwiinda muli Isilaeli.—Amubelenge Matalikilo 22:18.

Lesa wakasala bene Isilaeli kuba bakamboni bakwe. Shakacitika ku bene Isilaeli shilatondesha mbwenga bantu baba acoolwe na batonyumfwila milawo yakwe Lesa. (Dutolonomi 4:6) Aboobo ba mu mishobo imwi, niinga bashiba Lesa wancinencine kwiinda mu bene Isilaeli.—Amubelenge Isaya 43:10, 12.

2. Ino bene Klistu balushinisho balacatanina nshi?

Ndi pakeenda ciindi, bene Isilaeli bakanyaikwa coolwe cakuba bantu bakwe Lesa, aboobo Yehova wakatalika kusebensesha coonde ca bene Klistu. (Mateyo 21:43; 23:37, 38) Bene Klistu balushinisho mbo bakamboni kuli Yehova cino ciindi mbuli bwakalinga bene Isilaeli kalekale.—Amubelenge Milimo ya Batumwi 15:14, 17.

Yesu wakacatanya bashikwiiya bakwe kwaamba ayi bakashimikile a kucafwa bantu ba mishobo yoonse kuba bashikwiiya bakwe. (Mateyo 10:7, 11; 24:14; 28:19, 20) Kushimikila kwaya panembo maningi mucecino ciindi ca mamanino acishi. Kuswabo kalekale Yehova taana kucatanyo bantu baanji maningi ba mishobo yoonse mu kulambila kwa lushinisho mbuli mbocibete cino ciindi. (Ciyubululo 7:9, 10) Bene Klistu balushinisho balicatene kwaamba ayi banoyuminishanya a kucafwana. Mu cishi coonse, na babungana mu misena ishiyeneshiyene nshobeeya mu Baibo nshintu shomwi, tashipusani sobwe.—Amubelenge Bene Ebulu 10:24, 25.

 3. Bakamboni bakwe Yehova bacecino ciindi bakatalika buyani kucatana?

Mu ma 1870 mbungano ya bantu baniini bakalinga kwiitwa ayi bashikwiiya Baibo bakatalika kulangoola lushinisho lwakaloba lwa shiiyo sha mu Baibo. Bakalinga kushi ayi Yesu wakacatanya coonde ca bene Klistu kwaamba ayi banoshimikila, aboobo bakatalika kampeeni ya kushimikila Bweene bwakwe Lesa mu cishi coonse. Mu 1931 bakatalika kwiitwa ayi Bakamboni bakwe Yehova.—Amubelenge Milimo ya Batumwi 1:8; 2:1, 4; 5:42.

4. Ino nciinshi cilengesha ayi Bakamboni bakwe Yehova banocatana?

Mu ciindi ca batumwi, shoonde sha bene Klistu mu misena iinji shakalinga kucafwikwa kwiinda mu likoto litangilila lyakalinga kushi ayi Yesu ngoocite nkusu pa coonde ca bene Klistu. (Milimo ya Batumwi 16:4, 5) Mbocibete acecino ciindi, Bakamboni bakwe Yehova mu cishi coonse balacafwikwa a Likoto Litangilila mucanika bamanene ba coonde bacinkitwemo manungo. Ili Likoto lilatangilila milimo mu ma ofesi amisampi a Bakamboni bakwe Yehova iyo isansulula a kulemba mabuku akusebensesha pa kwiiya Baibo mu mishobo kwiinda 600. Aboobo, Likoto Litangilila lilasebensesha Malembo kuyuminisha shoonde kwiinda 100,000 sha mu cishi coonse. Coonde comwi acomwi, cilicite basankwa beelete, bamanene ba coonde nabi beshikutangilila coonde. Basankwa abo balalama litanga lyakwe Lesa mu lusuno.—Amubelenge 1 Pita 5:2, 3.

Bakamboni bakwe Yehova balacatana kwaamba ayi banoshimikila makani abotu akwaamba ayi mbo batokwiisha babe bashikwiiya bakwe Yesu. Bweenka mbuli bwakalinga kucita batumwi, tulaya mu kushimikila bantu mu maanda. (Milimo ya Batumwi 20:20) Alimwi, bantu bayanda kushiba lushinisho, tulabeisha Baibo. Ono so Bakamboni bakwe Yehova tatucatenebo sombi tuli beshikamukowa bacite Ishi wesu utusuni. Soonse tulasuna a kulama bamakwesu a benankashi. (2 Bene Tesalonika 1:3) Mukwiinga bantu bakwe Yehova balicatene kwaamba ayi banosangalasha Lesa a kucafwa bamwi, balicite coolwe cakuba beshikamukowa basangalete abuumbi pa cishi.—Amubelenge Kulumbaisha 33:12; Milimo ya Batumwi 20:35.