Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Makani Abotu Kuswa Kuli Lesa!

 CIIYO 5

Ino Lesa Ulayanda Cishi Kuba Buyani?

Ino Lesa Ulayanda Cishi Kuba Buyani?

1. Ino nceebo nshi Lesa wakalenga cishi?

Yehova wakapa cishi ku bantu. Mpotweelete kukala. Aboobo musankwa wakutanguna a mwanakashi, Adamu a Efa, tabana kulengwa ayi bakasushe liculu mukwiinga Lesa kaali walenga kale bangelo bakukala kwiculu. (Jobo 38:4, 7) Ono, Lesa wakabika musankwa wakutanguna mu paladaiso mu musena ubotu wakalinga kwiitwa ayi Edeni. (Matalikilo 2:15-17) Yehova wakalinga kusuni ayi Adamu abaana mbeshi akashale bakakale buumi butamaani pa cishi.—Amubelenge Kulumbaisha 37:29; 115:16.

Pakutanguna, musena wa Edeni ngo wakalingabo paladaiso. Musankwa wakutanguna a mwanakashi niinga baashala baana a kufula. Mukwiinda kwa ciindi niinga beendelesha coonse cishi a kucisandula kuba paladaiso. (Matalikilo 1:28) Cishi teshi cikanyonyoolwe. Cishi ncakukalaamo bantu muyayaya.—Amubelenge Kulumbaisha 104:5.

2. Nceebo nshi cishi tacibete paladaiso cino ciindi?

Adamu a Efa tabakwe kunyumfwila Lesa, aboobo Yehova wakabakushaamo mu Edeni. Paladaiso yakaloba, alimwi taakuwo muntu wakakonsha kuiboosha. Baibo ilaamba ayi: ‘Cishi cakapekwa mu maansa abantu babiibi.’—Jobo 9:24.—Amubelenge Matalikilo 3:23, 24.

Sa Lesa inga waalilwa kucitila bantu nshaakalinga kusuni pakutanguna? Taawu! Takonshi kwaalilwa, sobwe. Ngu Shinkusu shoonse. (Isaya 45:18) Ulaakulenga bantu kunokala mbwakalinga kusuni pakutanguna.—Amubelenge Kulumbaisha 37:11, 34.

3. Cilaakuba buyani kwaamba ayi Paladaiso ikaboole?

Paladaiso ilakubolabo pa cishi mu ciindi ca bweendeleshi bwakwe Yesu Mwaami wakwe Lesa. Mu nkondo ya Amagedoni, Yesu ulaakutangilila bangelo bakwe Lesa a kunyonyoola boonse  batanyumfwili Lesa. Lyalo Yesu ulaakwaanga Sataana myaaka ili 1,000. Banyumfwila Lesa balaakupuluka bunyonyooshi mukwiinga Yesu ulaakubatangilila a kubafuna. Balaakuba abuumi butamaani mu Paladaiso pa cishi.—Amubelenge Ciyubululo 20:1-3; 21:3, 4.

4. Ino mapenshi alaakumana lili?

Ino Lesa ulaakubumana lili bubiibi pa cishi? Yesu wakapa ca ‘kwishibilaako’ ca kutondesha ayi mamanino acishi ali pafwafwi. Shitocitika mu cishi na shatolelela inga shalenga bantu kucaikwa alimwi shitotondesha ayi cino ciindi tutokala ku ‘mamanino acishi.’—Amubelenge Mateyo 24:3, 7-14, 21, 22.

Yesu ndyeshi akanokweendelesha cishi kaali kwiculu myaka ili 1,000, ulaakumana mapenshi oonse. (Isaya 9:6, 7; 11:9) Yesu teshi akanoolibo Mwaami, ulaakuba Mupailishi Munene alimwi ulaakukushawo bubiibi bwa baabo banyumfwila Lesa. Aboobo, kwiinda muli Yesu, Lesa ulaakumana malwashi, kucembela, a lufu.—Amubelenge Isaya 25:8; 33:24.

5. Mbani beshi bakakale mu Paladaiso kunembo?

Ku Ng’anda ya Bwaami, mulakucana bantu basuni Lesa alimwi bayanda kwiiya mbwenga bamusangalasha

Bantu banyumfwila Lesa mbeshi bakakale mu Paladaiso. (1 Joni 2:17) Yesu wakatuma bashikwiya bakwe mu kuyandoola basuni kukutika a kubeisha mbwenga baba kulubasu lwakwe Lesa. Cino ciindi Yehova utocafwa bantu baanji kwaamba ayi bakakale mu Paladaiso pa cishi kunembo. (Sefaniya 2:3) Ku maanda a Bwaami a Bakamboni bakwe Yehova, bantu baleishikwa kuba bashali babotu. Basankwa baleishikwa kusunga kabotu bakaabo, banakashi abalo baleishikwa kunyumfwila bebaabo. Baana a bashali balaba pantu pomwi ndi batolambila alimwi baleeya mbwenga makani abotu abacafwa mu bukaalo.—Amubelenge Mika 4:1-4.