Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Ino Mbaani Batoocita Kuyanda Kwakwe Yehova Munshiku Shino?

 CIIYO 28

Ino Nshiinshi Shicanika paWebu Saiti Yesu?

Ino Nshiinshi Shicanika paWebu Saiti Yesu?

France

Poland

Russia

Yesu Klistu wakalwiita bashikwiiya bakwe ayi: “Mbweeke ubo amwebo amuboneshe mumuni wanu kubantu, kwaamba ayi babone milimo yanu ibotu, akupa bulemu kuli Ishiwanu wa kwiculu.” (Mateyo 5:16) Kwaamba ayi tucite boobo, tulasebensesha shakupangapanga sha munshiku shino mbuli intaneti. Tulabika makani pa Intaneti kusebensesha Webu Saiti Yesu yakasuminishikwa ya www.jw.org yaamba sha makani Bakamboni Bakwe Yehova ngobashoma anciito yabo. Ino palacanikanshi?

Palaba shikumbulo sha muBaibo kumiipusho bantu njobepusha liinji. Inga mwacana shikumbulo kumiipusho iyandika abuumbi bantu njobepusha. Kucakubonenaako, matilakiti mbuli Ino kupenga kulaakumana? alimwi a Sa bafu ncancinecine balaakubuka? alacanika pawebusaiti iyi mumishobo iinda ku 600. Pali aBaibo ya New World Translation mumishobo iinda ku 130 alimwi amabuku acafwa kwiiya Baibo, mbuli Ino Ncinzi Cini Bbaibbele Ncoliyiisya? alimwi amagazini aNgazi Yamulindizi aSinsimuka! ipya. Inga mwabelenga na kukutika kumabuku akalekodwa na inga mwapulinta nabi kukopolola mu MP3, PDF, na EPUB kwaamba ayi munookutika. Na kamusuni inga mwapulintilaako bamwi beenga basuna kubelenga makani ayo mumushobo wabo! Palaba amabuku mumishobo iinji yabaabo bashinkite matwi mumavidyo. Inga mwakopolola anyiimbo shibotu nsheenga kamukutika ndyemutokookesha alimwi ashisekano sha muBaibo shakukutikabo.

Makani ancine aamba sha Bakamboni Bakwe Yehova. Mulaakucana makani amavidyo afwiifwi atondesha akusansulula mbotusebensa ncito yesu yapa cishi coonse, ashintu shimwi shitocitikila Bakamboni Bakwe Yehova alimwi ambotucafwa baabo bacana mapensho alicitikila. Balabikawo anshiiku ndyekuba kubungana kunene amusena alimwi amaadilesi amaofesi amusampi.

Kwiinda mukusebensesha nshila iyi, tulamunika mumuni walushinisho kumisena yoonse yapacishi. Bantu beshikuswa mumbasu shoonse sha cishi kubikawo abaabo baswa kulaale mbuli kuAntarctica, balacafwikwa. Mupailo wesu ngwakwaamba ayi ‘Maswi akwe Yehova amwaike cakufwambaana’ pacishi coonse kwaamba ayi bantu bape bulemu Yehova.—2 Bene Tesalonika 3:1.

  • Ino makani acanika paWebu Saiti ya www.jw.org alacafwa buyani bantu kwiiya cancine camu Baibo?

  • Ino ngamakani nshi ngweenga mwasuna kulangoola paWebu Saiti yesu?