Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuyiishe bana banu

 CIIYO 2

Labeka Wakalinga kusuni Kusangalasha Yehova

Labeka Wakalinga kusuni Kusangalasha Yehova

Labeka wakalinga mwanakashi wakalinga kusuni Yehova. Ibaye wakalinga ngu Isaki. Alakwe wakalinga kusuni Yehova. Ino Labeka a Isaki bakashibana buyani? Ino wakabonesha buyani ayi wakalinga kusuni kusangalasha Yehova? Atwiiye shiinji pali nguwe.

Bashali bakwe Isaki bakalinga ngu Abulaamu a Saala. Bakalinga kukala mucishi ca Kenani, umo bantu mobatakalinga kulambila Yehova. Sombi Abulaamu wakalinga kusuni ayi mwanaakwe eebe mwanakashi wakalinga kulambila Yehova. Aboobo wakatuma musebenshi wakwe Elyasa, ayi aye mukuyandweeta Isaki mwanakashi kumusena wakalinga kwiitwa ayi Alani, uko kwakalinga kukala beshikamukowa bakwe Abulaamu.

Labeka wakalinga kulibambite kusebensa cankusu kuteka maanshi akunwisha ngamela

Elyasa wakaya pantu pomwi abasebenshi bamwi bakwe Abulaamu. Wakalinga ngu mushinso ulaamfu abuumbi. Bakalinga kuyumwiite shakulya ashipo pa ngamela shili likumi. Ino Elyasa wakashiba buyani mwanakashi wakusalila Isaki? Elyasa abasebenshinyina ndyebakashika ku Alani, bakeemikana pamukalo mukwiinga Elyasa wakalinga kucishi ayi inga tapeendiwo ciindi cilaamfu bantu kusa mukuteka maanshi. Mpeeke wakapaila kuli Yehova ayi: ‘Na mwanakashi ngweshi nsenge maanshi ampe alimwi akupa ngamela  shangu ayi shinwe, ntoshiba ayi ngomwasala kweebwa kuli Isaki.’

Lyalo Labeka wakesa kumukalo. Baibo ilaamba ayi wakalinga mubotu abuumbi. Elyasa ndyaakamusenga maanshi akunwa, Labeka wakaamba ayi: ‘Anaaya nkambo. Ntomupa maanshi ayi munwe alimwi angamela shanu ayi shinwe.’ Ono uciyeeyelebo! Ngamela shifwite nyotwa shilanwa maanshi aanji, aboobo Labeka wakabolelako shiindi shiinji kumukalo mukuteka maanshi. Sa wamubona Labeka papikica ubo mbwakalinga kusebensa cankusu?— Elyasa wakakankamana ubo Yehova mbwakakumbula mupailo wakwe.

Elyasa wakapa Labeka shipo shiinji shibotu abuumbi. Lyalo Labeka wakabwesa Elyasa abasebenshi bamwi ayi baye anguwe kuŋanda. Ndyebakashika, Elyasa wakabaambila Abulaamu ncaakamutuma alimwi a Yehova mbwakakumbula mupailo wakwe. Beshikamukowa bakwe Labeka bakakondwa ayi eebwe kuli Isaki.

Labeka wakaya ku Kenani a Elyasa alimwi wakeebwa kuli Isakii

Ono sa utoyeeya ayi Labeka wakalinga kusuni kweebwa kuli Isaki?— Labeka wakashiba ayi Elyasa wakatumwa a Yehova. Ono beshikamukowa bakwe Labeka ndyebakamwiipusha na wakalinga kusuni kuya ku Kenani akweebwa kuli Isaki, Labeka wakakumbula ayi: ‘Ee, ndisuni kuya.’ Peenkapo, Labeka wakaya a Elyasa. Ndyebakashika ku Kenani, wakeebwa kuli Isaki.

Yehova wakapa coolwe Labeka, mukwiinga wakacita ncaakalinga kusuni Yehova. Ndyepakeenda myaaka iinji, Yesu wakashalilwa mumukowa wakwe Labeka! Bweenka mbuli Labeka, awebo Yehova ulaakukupa coolwe na koocita nshaasuni.

BELENGA MUBAIBO YAKO

  • Matalikilo 12:4, 5; 24:1-58, 67