Bona mwanike musankwa uyu uli papikica. Utooboneka kuungumana akuloonda, sa tabushi? Sa wakalinyumfwawo ubo?— Cimwi ciindi soonse tulanyumfwa ubo. Baibo ilaambawo pa bashicibusa bakwe Yehova abo bakoongumana akuloonda. Womwi wa babo wakalinga ngu Elija. Atwiiye pali nguwe.

Jesebelo wakalinga kusuni kucaya Elija

Elija wakalinga kukala mu Isilaeli, Yesu katana kushalwa. Aabu mwaami wa bene Isilaeli, taakalinga kulambila Lesa wancine Yehova. Lakwe amukaakwe, Jesebelo, bakalinga kulambila lesa wakubeca Baali. Aboobo bantu baanji mu Isilaeli bakatalika kulambila Baali. Mwaami mwanakashi Jesebelo wakalinga mubibiibi moyo alimwi wakalinga kusuni kucaya boonse bakalinga kulambila Yehova, kubikawo aElija! Sa ulicishi Elija ncakacita?—

Elija wakacica! Wakaya kulaale muluyanga akuyuba mucimfwengo. Ino utooyeeya ayi ngumulandunshi ncakacitila boobo?— Ee,  wakaloonda. Ono Elija taakalinga kweelete kuloonda. Ngumulandunshi? Mukwiinga wakalinga kucishi ayi Yehova inga wamucafwa. Yehova wakalinga watondeshawo kale nkusu shakwe kuli Elija. Wakakumbula mupailo wakwe Elija kwiinda mukuleta mulilo kuswa kwiculu. Aboobo inga taalilwi kumucafwa!

Ino Yehova wakamucafwa buyani Elija?

Elija ndyaakalinga mucimfwengo, Yehova wakamwiipusha ayi: ‘Ino utoocita nshi kuno?’ Lakwe wakakumbula ayi: ‘Nebo ndacalabo neenka nentoomulambila. Ndibo neenka, alimwi ntooloonda kucaikwa.’ Elija wakalinga kuyeeya ayi basebenshi bakwe Yehova bamwi boonse bacaikwa. Sombi Yehova wakamwaambila Elija ayi: ‘Sobwe, teshi boonse. Kuli abamwi bali 7,000 bacinambila. Utaloondi. Ndicite milimo iinji njoweelete kucita!’ Sa utooyeeya ayi Elija wakasangalala kunyumfwa makani ayo?—

Ino inga weeya nshi kucakacitikila Elija?— Toeelete kuungumana nabi kuloonda. Ulicite babyo basuni Yehova alimwi bakusuni. Alimwi Yehova ulicite nkusu shiinji, aboobo ananookucafwa! Sa ulisangalalite kushiba kwaamba ayi tobete weenka?—

BELENGA MUBAIBO YAKO

  • 1 Baami 19:3-18

  • Kulumbaisha 145:18

  • 1 Pita 5:9