Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuyiishe bana banu

 CIIYO 11

Bakalemba Shakacitika Pali Yesu

Bakalemba Shakacitika Pali Yesu

Sa wababona basankwa aba bali papikica?— Meena abo ngu Mateyo, Maako, Luka, Joni, Pita, Jemusi, Judi, alimwi a Paulo. Basankwa boonse aba bakalingaako muciindi cakwe Yesu, alimwi bakalemba shakacitika pali Yesu. Atwiiye pali mbabo.

Sa ulibeshi basankwa aba?

Botatwe bakalinga batumwi bakalinga kushimikila a Yesu. Sa ulibeshi meena abo?— Mateyo, Joni, alimwi aPita. Mateyo aJoni bakalinga kumushi kabotu  Yesu alimwi bakalemba mabuku aamba pa buumi bwakwe Yesu. Mutumwi Joni alakwe wakalemba libuku lya Ciyubululo amakalata otatwe eetwa ayi 1 Joni, 2 Joni a 3 Joni. Mutumwi Pita wakalemba makalata obilo amuBaibo. Aleetwa ayi 1 Pita alimwi a 2 Pita. Munkalata yakwe yabili, Pita wakalemba shakaamba Yehova pali Yesu ayi: ‘Uyu ngomwanaangu. Ngoonsuni alimwi muli nguwe ndakondwa.’

Bamwi abalo babete pa pikica balatwiisha pali Yesu kwiinda mumabuku ngobakalemba. Umwi pali babo ngu Maako. Ulyeelete kuba wakalingaako ciindi Yesu ndibakamucata akubona shoonse shakacitika. Aumwi ngu Luka. Wakalinga ngu Dokota alimwi ulyeelete wakaba Mwineklistu Yesu ndyaakafwa.

Abamwi bobilo bakalemba Baibo bali papikica bakalinga banike bakwe Yesu. Sa ulibeshi meena abo?— Meena abo ngu Jemusi alimwi aJudi. Pakutaanguna, tabakwe kumushoma Yesu. Bakalinga kuyeeya ayi ulicinkukiteko. Mukuya kwaciindi bakamushoma Yesu akuba Beneklistu.

Aumwi mulembi wa Baibo uli papikica ngu Paulo. Katana kuba Mwineklistu, liina lyakwe wakalinga ngu Saulo. Wakalinga kupatite Beneklistu alimwi wakabapensha abuumbi. Sa ulicishi cakalengesha ayi Paulo abe Mwineklistu?— Bushiku bumwi Paulo ndyaakalinga palweendo, wakanyumfwa liswi lya muntu kuswa kwiculu. Muntu uyo wakalinga ngu Yesu! Wakeepusha Paulo ayi: ‘Ino nciinshi ncotoopenshesha bashomi bangu?’ Kuswawaawo Paulo wakaaluka akuba Mwineklistu. Paulo wakalemba mabuku amuBaibo ali 14 kuswa ku Bene Loma kushika aku Bene Ebulu.

Tulabelenga Baibo bushiku abushiku, sa tabushi?— Kubelenga Baibo, kulalengesha ayi twiiye shintu shiinji pali Yesu. Sa inga wasuna kwiiya shiinji pali Yesu?—

BELENGA MUBAIBO YAKO

  • 2 Pita 1:16-18

  • Maako 3:21; 14:51

  • Judi 1

  • Milimo ya Batumwi 9:1-18