Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuyiishe bana banu

 CIIYO 5

Samwelo Wakatolelela Kucita Shintu Shibotu

Samwelo Wakatolelela Kucita Shintu Shibotu

Kuswa ciindi Samwelo kacili mwanike, wakalinga kukala akusebensa paŋanda yakwe Lesa, pamusena bantu mpobakalinga kulambilila Yehova. Sa ulicishi Samwelo mbwakesa mukukala paŋanda yakwe Lesa? Cakutaanguna atwiiye pali banyina Samwelo, ba Aana.

Kwaciindi cilaamfu, Aana taakalinga kuciteewo mwaana nabi kwaamba ayi wakalinga kusunishishi. Aboobo wakapaila kuli Yehova kusenga lucafwo. Wakashomesha ayi na akabe amwaana musankwa, ulaakumupa kuli Lesa kwaamba ayi akamusebensele kwa buumi bwakwe boonse. Yehova wakakumbula mupailo wakwe Aana, aboobo wakaba amwaana musankwa. Wakamutumba ayi Samwelo. Samwelo ndyakaba amyaaka yotatwe na yone, Aana wakamutola kuŋanda yakwe Lesa, Kweelana ambwakashomesha.

Eli ngowakalinga mupailishi munene paŋanda yakwe Lesa. Wakalinga kusebensa abana bakwe basankwa bobilo. Ŋanda yakwe Lesa wakalinga ngumusena bantu mpobakalinga kulambililawo Lesa, aboobo abo basebenselawo bakalinga kweelete kucita shintu shibotu. Sombi bana bakwe Eli bakalinga kucita shintu shibiibi. Samwelo wakalinga kubona nshebakalinga kucita. Sa alakwe Samwelo wakalinga kucita shintu shibiibi mbuli bana bakwe Eli?— Sobwe, wakatolelela kucita shintu shibotu kweelana ambobakamwiisha bashali bakwe.

Ino utooyeeya ayi Eli wakalinga kweelete kubacita buyani bana bakwe bobilo?— Wakalinga kweelete kubapa mulandu. Taakalinga kweelete kubasuminisha kusebensela paŋanda yakwe Lesa. Sombi taakwe kucita ubo, aboobo Yehova wakakalalila Eli abana bakwe. Yehova wakabapa mulandu.

Samwelo wakaambila Eli maswi akwe Yehova

Mashiku Samwelo kaalete, wakanyumfwa muntu kamwiita ayi, ‘Samwelo!’ Wakacicila kuli Eli, sombi Eli wakaamba ayi: ‘Nshikwe kukwiita sobwe.’ Ici cakacitika mankanda obilo. Ndyecakacitika  lyatatu, Eli wakaambila Samwelo ayi, na aite alimwi waambe ayi, ‘Amwaambe, noBaami baLesa, ntoonyumfwa.’ Aboobo Samwelo wakacita bweenkobo. Mpeeke Yehova wakaambila Samwelo ayi: ‘Ambila Eli ayi ndaakupa mulandu pamukwashi wakwe pashibiibi nshebatoocita.’ Sa utooyeeya ayi cakalinga cuubu kuli Samwelo kushisha maswi aya kuli Eli?— Sobwe, tacakalinga cuubu. Nabi Samwelo wakalinga kucite boowa, wakacita nshakamwaambila Yehova. Nshakaamba Yehova shakacitika. Bana bakwe Eli bobilo bakacaikwa, alakwe Eli wakafwa.

Samwelo ncakubonenaako cibotu kuli ndiswe. Wakacita shintu shibotu nabi wakalinga kubona bantu kabacita shibiibi. Ino webo? Sa ulaakuba mbuli Samwelo akutolelela kucita shintu shibotu? Na ukacite boobo, ulaakusangalasha Yehova alimwi abashali bako.

BELENGA MUBAIBO YAKO

  • 1 Samwelo 2:22-26; 3:1-21