Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuboolele Kuli Yehova

 LUBASU 1

“Ndaakulangoola Isowekete”

“Ndaakulangoola Isowekete”

Atuyeeye ayi mbelele yasoweka. Mpashi ndyeyalinga kulya mweemfu yaswa pashibiye. Taicishiwo nkweenga yacana shibiye amweembeshi. Lyalo kwatalika kushiya. Mubusena moyasowekela mulacanika shinyama shiyoosha alimwi taaku weenga waishitilisha. Sombi ndyeili mubusena ubu yanyumfwa liswi ndyolishi, lya mweembeshi, uyo waicicila akuibika mucisani akuinyamuna pacaamba akwitola kuŋanda.

Liinji muBaibo, Yehova ulalikoshanisha a mweembeshi. Mu maswi akwe, ulatushomesha ayi: ‘Nebo nemwiine ndaakulilangweeta mbelele shangu akusheembela.’—Esekelo 34:11, 12.

‘Mbelele Nshoombikilaako Maano’

Ino mbelele shakwe Yehova mbaani? Mbantu bamusuni alimwi bamulambila. Baibo ilaamba ayi: “Tumulambile cakushisha shiwa panshi. Atufukame pameenso a Mwaami Lesa uyo wakatulenga, mukwiinga lakwe nguLesa wesu. Swebo tuli bantu bakwe mbwaaembela anga nimbelele shili mumaansaakwe.” (Kulumbaisha 95:6, 7) Bweenka mbuli mbelele mboshikonkela mweembeshi, abalo bantu balambila Yehova balayandishisha kumukonkela mbuli mweembeshi wabo. Sa balisalalite? Sobwe. Basebenshi bakwe Yehova cimwi ciindi balaba anga “nimbelele shapalangana,” na “mbelele shisowekete,” nabi anga “nimbelele shakasoweka,” (Esekelo 34:12; Mateyo 15:24; 1 Pita 2:25) Bantu bakaboola mwiisule, Yehova taacileki kulangila kwaamba ayi balakuboolela.

 Sa mulayeeya ayi Yehova ucili mweembeshi wanu? Ino Yehova munshiku shino ulatondesha buyani kwaamba ayi ngu mweembeshi? Amubone nshila shotatwe:

Ulatupa Shintu Shitucafwa lwakumushimu. “Ndaakusheembelela mumafulo...acite mweemfu.” (Esekelo 34:14) Yehova taana kwaalilwawo kale kutupa shintu shitucafwa lwakumushimu. Sa inga mweengashila libuku, likani, na vidyo yakamuyuminisha na kumucafwa? Sa talina kumucafwa kushoma kwaamba ayi Yehova ulamubikila maan?

Ulatushitilisha Alimwi Akutulama. Yehova ulatushomesha ayi: “Ndaakuboosha shakaswa mulitanga. Ndaakwanga shilonda sha sheesho shakalicisa, kuyumya shilefukite.” (Esekelo 34:16) Yehova ulayumya baabo balefukite na abo balisukama. Ulaanga shilonda sha mbelele shakwe, kushicafwa kwaamba ayi shoole na shalicisa—cimwi ciindi kwiinda mu bashominyinesu. Ulaboosha baabo bakaboolela mwisule alimwi abaabo batopenshekwa amiyeeyo itabete kabotu.

Ulatulama. “Ndaakushifuna kuswa mumisena yoonse moshakalinga shapalanganina,” Yehova waamba. “Ndaakuyandoola shisowekete.”(Esekelo 34:12, 16) Yehova ulalangila mbelele shakasoweka ayi shilakuboola. Na mbelele yasoweka ulashiba, ulailangoola, alimwi ulakondwa na waicana. (Mateyo 18:12-14) Yehova ulaamba ayi basebenshi bakwe boonse bali anga ‘nimbelele isho nshaalama.’ (Esekelo 34:31) Amweebo muli pakati ka mbelele isho.

Kuli Yehova, abo bakaboolela mwisule ulababona ayi inga bakonsha kuboolela alimwi ulakondwa na baboolela

“Amulengeshe Nshiku Shesu Shibe Shabulemu Mbuli Shikulukulu”

Ino ngumulandunshi Yehova ncatomulangweta akumwiita ayi muboolele? Mukwiinga ulisuni ayi munoosangalala. Wakashomesha ayi “Ncakwiila ilaakuba mfula yatepetepe ya coolwe” ku mbelele shakwe. (Esekelo 34:26) Cishomesho ici cilaakukumanishikwa. Amwebo mpashi mwabona kale ubo Yehova mbwamucafwa kuba alusangalalo.

Amwiibaluke shakacitika ciindi ndyemwakatalika kwiiya pali Yehova. Mucakubonenaako, ino mwakanyumfwa buyani ciindi ndyemwakashiba liina lyakwe Lesa alimwi a nshaasuni kucitila bantu? Sa inga mwebaluka ciindi cakutaanguna ndyemwakabungana a bashominyinanu pa kubungana kwalubasu alimwi a pakubungana kunene? Ciindi ndyemwakaba acoolwe cakucana muntu usuni kwiiya makani abotu, sa tamuna kukondwa akulinyumfwa kabotu ndyemwakakotoka muncito yakushimikila?

Inga mwatalika alimwi kuba alusangalalo bweenka mbuli kalekale. Basebenshi bakwe Yehova bakalekale bakaamba ayi: “NoBaami baLesa amutubooshe kuli ndimwe,” Basebenshi bakwe Yehova bakalekale bakapaila, “atupilukile kuli ndimwe. Amulengeshe nshiku shesu shibe shabulemu mbuli shikulukulu.”(Malilo 5:21) Yehova wakakumbula mupailo uyu, alimwi bantu bakwe bakaboolela akutalika kumusebensela calusangalalo. (Neyemiya 8:17) Ubo mbweshi akacite Yehova akulindimwe.

Kuboolela kuli Yehova teshi cuubu. Aboobo mulyeelete kushiba mapenshi abaawo ayi muntu aboolele alimwi a nsheenga mwacita.