Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuboolele Kuli Yehova

 LUBASU TWO

Kulisukama—‘Kupenshekwa Munshila Shiinji’

Kulisukama—‘Kupenshekwa Munshila Shiinji’

“Twakalekana abeebangu pesule lyakukala mucikwati kwa myaaka 25. Baana bangu bakacileka kuya kumabungano. Ndakatalika kuciswa ciswa. Lyalo ndakatyompwa abuumbi. Ndakabula cakucita alimwi ankusu shakaamanina. Ndakaboolela mwisule akucileka kuya kumabungano.”—BaJune.

BANTU baanji balalisukama—kubikawo abantu bakwe Lesa abalo. Shikulumbaisha wakaamba ayi ‘Kulisukama kwakalinga kwancata’. (Kulumbaisha 94:19) Yesu alakwe wakaamba ayi munshiku shakweelaako, ‘kulisukama ashintu sha buumi’ kulaakulengesha ayi kusebensela Yehova cibe cintu ciyumu. (Luka 21:34) Ino mwebo? Sa mulicite mapensho amaali, mukwashi, na kuciswa? Ino Yehova inga wamucafwa buyani kwaamba ayi muyume?

“Nkusu Shiindaawo Nshetucite”

Inga tatucikonshi kulwana mapensho akulisukama munkusu shesu sobeene. Mutumwi Paulo wakaamba ayi “Tulapenshekwa munshila shiinji . . .  tulishingitwe . . .  tulaumputwa panshi.” Nakubi boobo, alimwi wakaamba ayi “tatutyongoli cakutakonsha kubuka alimwi sobwe,” “cakubulilla limwi akupolela,”akwaamba ayi “tatunyonyooki sobwe.” Ino nciinshi citucafwa kuliyumya? Nkusu shikankamanisha shiinda nshetucite, nkokwaamba ayi nkusu shiswa kuli Lesa wesu Shinkusu shoonse, Yehova.—2 Bene Kolinto 4:7-9.

Amuyeeyebo mbomwakalinga mwapekwa nkusu shikankamanisha shiindaawo nshetucite kwisule uku. Sa inga mwayeeya makani amwi ayuminisha mbwakamucafwa kulumba Yehova pamulandu wa lusuno lwakwe lwamuyayaya? Sa lushomo lwanu mushishomesho shakwe Yehova lwakuyuminishikwa ndyemwakalinga kwiishako bamwi sha bulindilishi bwakuba mu paladaiso? Ndyetucanika kumabungano aBwineklistu akwaambilaako bamwi lushomo shintu nshetushoma, tulacana nkusu shitucafwa kuliyumya mushintu shitusukamika mubuumi alimwi tulacana luumuno lwamu mumiyeeyo akusebensela Yehova calusangalalo.

“Amweeleshi, Mutoobona ayi Yehova Ngumubotu”

Kwaamba cancine, cimwi ciindi inga mwalinyumfwa anga mutokwelelwa uku akooku. Kucakubonenaako, Yehova ulatwaambila ayi tuyandoole Bwaami citaanshi alimwi akwiindilisha kusebensa ncito shimwi shakumushimu. (Mateyo 6:33; Luka 13:24) Ino inga mwacita buyani na kuli beshikumukasha kupaila Lesa, na kuciswa ciswa, nabi na mulicite mapensho mumukwashi atomusukamika abuumbi? Ino na incito njomusebensa njiyumu alimwi tamucaniwo aciindi cakucanika kumabungano? Mukwiinga mulicite shiinji shakucita, sombi nkusu alimwi aciindi nshiniini, inga mwamaninwa maano. Mpashi mwakashika mpomuyeeya ayi shintu Yehova nshalangila kuswa kulindimwe shiinji abuumbi kwiinda nsheenga mwakonsha.

Yehova ulanyumfwishisha. Talangili shiinji kulindiswe kwiinda nshotucikonsha kumupa. Yehova ulicishi kwaamba ayi tulisuniki ciindi cakookesha na twalema nabi na twasukamikwa.Kulumbaisha 103:13, 14.

Kucakubonenaako, amuyeeye Yehova mbwakalama mushinshimi wakwe Elija. Elija ndyakatyompwa akuba aboowa abuumbi cakwaamba ayi wakacicila muluyanga, sa Yehova wakamukalalila mushinshimi uyu akumwaambila cabukali ayi aboolele kuncito yakwe? Sobwe. Mankanda obilo Yehova wakatuma munjelo kumubusha akumupa cakulya. Nabi kwaamba ayi munjelo wakamupa shakulya, ndipakeenda nshiku shili 40, Elija wakeendilishabo kulisukama akuloonda. Ino Yehova wakacita anshi kwaamba ayi amucafwe alimwi? Cakutaanguna Yehova wakatondesha ayi inga wamushitilisha. Wakamuyuminsha a “liswi lyankumbu, alimwi lyamunshi.” Kumamanino, Yehova wakaambila Elija ayi kwakalinga bantu abamwi baanji bashomeka, bakalinga kusebensela Lesa. Elija wakatalika alimwi kusebensa ncito yabushinshimi. (1 Baami 19:1-19) Ino inga kuswa kumakani aya? Elija ndyakalisukama, Yehova wakamukalikila moyo akumunyumfwila nkumbu. Yehova taaluke sobwe. Aswebo ulatubikila maano abuumbi bweenka mbwakalama Elija.

Tamweelete kulisukama ancito njemusebensela Yehova alimwi tamweelete kunokwelanya mbomwakalinga kusebensa kale kale ambomutosebensa pacecino ciindi. Kucakubonenaako: Na muntu ucica lubilo weendishawo myeenshi iinji na myaaka kubula kucica, na watalika alimwi inga tacici kweelana ambwakalinga kucica kale kale. Ulacita sheenga shamucafwa kuba ankusu kwaamba ayi atanolema maningi ndyatocica. Beneklistu bali anga mbantu bacica lubilo. Balasebensa cankusu mukwiinga balicishi kwaamba balakupekwa cilambu. (1 Bene Kolinto 9:24-27) Sa inga tamuseliwo comwi nceenga mwacita muncito yakwe Lesa nceenga mwacikonsha kucita pacecino ciindi? Mpashi inga mwasala kutalika kucanika kumabungano lyoonse. Munopaila kuli Yehova kwaamba ayi amucafwe kucikonsha kucita nshemwasala. Na mwaba bayumu kupaila, ndyeshi ‘mukabone ayi Yehova ngumubotu.’ (Kulumbaisha 34:8) Mulyeelete kwiibaluka kwaamba ayi cili coonse nceenga mwacita kutondesha ayi muli musuni Yehova—nabi ciceeye buyani—cili cindeme kuli nguwe.Luka 21:1-4.

Yehova tatulangili kucita nsheenga tatucikonshi

“Ndakalinga Kusuni Abuumbi Muntu Weenga Wanjumya”

Ino Yehova wakabacafwa buyani baJune kwaamba ayi batalike alimwi kucanika kumabungano? Ba June bakaamba ayi: “Ndakalinga kupaila lyoonse kuli Yehova kwaamba ayi ancafwe. Bushiku bomwi mulokashi wangu wakaŋambila ayi kulaakuba kubungana kunene kumusena nkondakalinga kukala. Ndasala ayi ndakuyaako bushiku bomwi. Ndakasangalala abuumbi kuba pantu pomwi abantu bakwe Lesa alimwi! Kubungana uku kwakancafwa abuumbi. Pacecino ciindi, ndasebensela Yehova calusangalalo alimwi ndicite lusangalalo lwiine lwiine! Ndishi kwaamba ayi ndyeelete kunocanika pomwi abamakwesu kwaamba ayi banonjuyuminisha. Ndalumba Yehova mukwiinga wakancafwa kutalika kucanika kupaila alimwi ciindi kacitana kumana.”