Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuboolele Kuli Yehova

 LUBASU 4

Kulinyumfwa Kuba Amulandu—“Amunsalashe Kuswa Kushibiibi Shangu”

Kulinyumfwa Kuba Amulandu—“Amunsalashe Kuswa Kushibiibi Shangu”

“Buumi bwamukwashi wesu bwakaya panembo ndyendakacana ncito ipya, sombi yakalengesha ayi ncanike mushintu shitabete kabotu. Ndakatalika kusekelela shisekano mbuli kilisimasi, kutola lubasu mu mapolitiki, kuswawaawo ndakatalika kuya akuceeci. Ndakacileka kuya kumabungano akushimikila mbuli Kamboni wakwe Yehova kwa myaaka 40. Ndipakeenda ciindi cilaamfu ndakatalika kulibona anga Yehova inga taakonshi kundekelelawo. Lyoonse ndakalinga kulinyumfwa kuba amulandu. Nabi cakaba boobo, ndakalinga kucishi cancine kantana kutalika kucita shintu shibiibi.”—baMalita.

KULINYUMFWA kuba amulandu inga kwalengesha ayi munolisukama abuumbi. Mwaami Defedi wakaamba ayi “milandu yangu yandemya mutwi cakuyanda kupila panshi. Ncakwiila yafula cakundemena anga ndayumuna shilemu.” (Kulumbaisha 38:4) Beneklistu bamwi baloongumana bunene, akulinyumfwa ayi Yehova teshi akabalekelelewo. (2 Bene Kolinto 2:7) Sa cili kabotu kulinyumfwa boobo? Nacibi kwaamba ayi mwakacita bubiibi bunene buyani, sa muli kulaale a Yehova cakwaamba ayi teshi akamulekelewo? Sobwe, tabushi ubo!

“Kamwisa Ono Twikale Panshi”

Yehova talekeleliiwo bantu balilekelela shibiibi shabo. Sombi, ulabalangoola! Mucikoshanyo ca mwaana musankwa wakasoweka, Yesu wakeelanisha Yehova amushali musankwa wakalingocite mwaana uyo wakashiya mukwashi wakwe akutalika kukala buumi butabete kabotu. Mukuya kwaciindi, mwaana ulya wakaboolela kuŋanda. “Kaacilibo palaale baishi bakamubona, mpeeke bakamunyumfwila nkumbu akumucicilila, bamukumbata, akumufyonta.” (Luka 15:11-20) Sa mulaalilwa kusena pafwaafwi aYehova mukwiinga mulalinyumfwa ayi ‘mucili palaale’ anguwe? Bweenka mbuli mushali wa mucikoshanyo cakwe Yesu, Yehova alakwe ulamunyunfwila nkumbu. Alimwi ulisunishishi kumutambula na mwaboola.

Ino na kamuyeeya ayi Yehova takoonshi kumulekelela shibiibi nshemwakacita mukwiinga shafulisha? Amuyeeye bwiite bwake Yehova palilembo lya Isaya 1:18: “‘Mwaami Lesa waamba ayi, kamwisa ono twikale panshi. Nabi shibiibi shanu shilasalala anga mbulowa, shilakuboolabo tuu anga ninkobokobo.’” Ncakwiila, nabi shibiibi shanu shibe anga mbulowa buli kucisani cituba, Yehova ulakonsha kumulekelela.

Yehova taasuniwo ayi mutolelele kupenshekwa anjelacaamba itasalalite. Ino inga mwacita buyani kwaamba ayi mube alusangalalo lucanika kwiinda mukulekelelwa aLesa alimwi akuba anjelacaamba isalalite? Amuyeeye pashintu shobilo nshaakacita Mwaami Defedi. Citaanshi, wakaamba ayi: “Ntoolyambilila shibiibi shangu kuli Yehova.” (Kulumbaisha 32:5) Mutalubi kwaamba ayi Yehova wakamwiita kale ayi inga mwaamba anguwe mumupailo alimwi akwaamba ayi “kamwisa ono twikale panshi”. Amubutambule bwiite ubo. Amulilekelele shibiibi shanu kuli Yehova akumwambila mbomutolinyumfwa. Defedi wakalinga kucishi ayi Yehova utomucafwa aboobo wakapaila ayi: ‘Amunsalashe kuswa kushibiibi shangu. . . . Mweebo tamukaki moyo wakulibombya, wasanduka kuswa kushibiibi.’Kulumbaisha 51:2,  17.

Cabili, Defedi wakatambula lucafwo kuswa ku usalitwe wakwe Lesa alimwi shikumwiimikaninaako, uyu wakalinga ngu Natani, mushinshimi.  (2 Samwelo 12:13) Munshiku shino, Yehova wabika bamanene mulibungano bakaishikwa kwaamba ayi bacafwe baabo balilekelela shibiibi shabo akuboosha bushicibusa mbobakalinga kucite aYehova. Na mukaye kubamanene, balakusebensesha Malembo amipailo yeshi ikamucaafwe kunyumfwa kabotu mumoyo, kuceeshako na kukusha miyeeyo yoonse itabete kabotu, akumucafwa kwaamba ayi moole lwakumushimu.—Jemusi 5:14-16.

Yehova ulisuni ayi musangalale anjelacaamba isalalite

“Balicite Coolwe Abo Lesa Mbwaalekelela Shibiibi Shabo”

Ncakwiila, cimwi ciindi mulakonsha kulinyumfwa ayi teshi cuubu kulyaambilila shibiibi nshemwakacita kuli Yehova alimwi akubamanene. Cakutatoonsha, Defedi alakwe mbwaakalinyumfwa. Pakeenda ciindi kaatana kulyaambilila shibiibi shakwe. (Kulumbaisha 32:3) Kuswawaawo Defedi wakabubona bubotu bwa kulyaambilila shibiibi akululika buumi bwakwe.

Mpindu inene Defedi njaakacana nkuba alusangalalo ndwaakalinga kucite. Wakalemba ayi: “Balicite coolwe abo Lesa mbwaalekelela shibiibi shabo, abo bacite shibiibi nshaakashiminganya!” (Kulumbaisha 32:1) Alimwi wakapaila ayi: “NoBaami baLesa, amuncafwe ayi ŋambe, lyalo mulomo wangu ulaakumulumbaisha.” (Kulumbaisha 51:15) Mukwiinga Yehova wakamulekelela shibiibi shakwe, Defedi wakalinyumfwa kwaanguluka, ici cakamuyuminisha kwaambila bamwi pali Yehova.

Yehova ulisuni ayi mube anjelacaamba isalalite. Ulisuni ayi munookwaambilako bamwi pali nguwe calusangalalo alimwi camoyo woonse kuteshi cakulinyumfwa bubiibi. (Kulumbaisha 65:1-4) Amwiibaluke kwaamba ayi utoomwiita ayi ‘musandukile kuli nguwe kwaamba ayi shibiibi shanu shikushikwe, akwaamba ayi shiindi shakookesha shimushikile kuswa kuli nguwe.’—Milimo ya Batumwi 3:19 NWT.

Ishi nsheshakacitikila baMalita. Bakaamba ayi: “Mwanaangu musankwa wakeendilisha kuntumina mamagazini aNgazi Yamulindizi alimwi aSinsimuka! Mukuya kwaciindi ndakatalika kwiiya pali Yehova alimwi. Cintu comwi cakalinga ciyumu abuumbi kwaamba ayi mboolele, nkusenga Yehova ayi andekelele shibiibi shoonse nshendakacita. Nacibi boobo, ndipakeenda ciindi ndakacikonsha kupaila kuli Yehova akusenga ayi andekelele. Na ndakala akuyeeya nshishomi ayi ndakatola myaaka 40 kutaboola kuli Yehova. Nshendakeendamo ncitondesho ayi nabi peenda myaaka iinji buyani, muntu inga watalika kusebensela Yehova akuboola mumaansaakwe alusuno.”