Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Amuboolele Kuli Yehova

 LUBASU 5

“Amubolele kuMweembeshi Utanjilila Buumi Bwanu”

“Amubolele kuMweembeshi Utanjilila Buumi Bwanu”

Sa amwebo mwakakumanawo amapensho ali mbuli aya ambwa mubuloshuwa iyi? Na mboboobo, mulyeelete kushiba ayi tamubete nweenka. Basebenshi bakwe Lesa baanji bashomeka—bakalekale abamunshiku shino—bakumanawo amapensho mbuli aya. Bweenka mbobakatambula lucafwo kuli Yehova kwaamba ayi bakome masunko ayo, andimwe inga wamucafwa.

Yehova ulaakumutambula camaansa obilo na mukaboolele kuli nguwe

 Amushibe kwaamba ayi Yehova unanooli andimwe ndyemutoboolela kuli nguwe. Ulaakumucafwa kwaamba ayi mucileke kulisukama, kutakalashikwa ashakacitika, alimwi akuba aluumuno lwa mumiyeeyo ndotubaalo na katucite njelacaamba isalalite. Na caba boobo inga mwatalika alimwi kusebensela Yehova pomwi ambomupailaabo. Mulaakuba anga mbeneklistu bakutaanguna abo mutumwi Pita mbaakalembela ayi: “Mwakalinga anga nimbelele shakasoweka, sombi bulya mwaboola kuMweembeshi uyo utanjilila buumi bwanu.”1 Pita 2:25.

Kubolela kuli Yehova ncintu cibotu abuumbi nceenga mwacita. Ino ngumulandunshi? Mulakusangalasha moyo wakwe Yehova. (Tushimpi 27:11) Mulyeelete kushiba kwaamba ayi Yehova ulakonsha kusangalala nabi kukalala ashintu nshetucita. Ncakwiila, Yehova taatukakatishiwo kumusuna akumusebensela. (Dutolonomi 30:19, 20) Muntu umwi wakeeya shamu Baibo wakaamba ayi: “Moyo wamuntu inga tookonshi kuucalula na kooli pansengwe. Ulacalwitwa mukati.” Na katusebensela Yehova calusuno cili anga twacalula moyo wesu. Na twacita boobo, tulapa Yehova cipo cibotu abuumbi—alimwi tulasangalasha moyo wakwe abuumbi. Mukwiinga Yehova ngoweelete kulambilwa aboobo taaku ceenga catusangalasha kwiinda kumupa shintu nshaelete kutambula.—Milimo ya Batumwi 20:35; Ciyubululo 4:11.

Kwilikawo pasheeshi, na mwatalika alimwi kulambila kwa Bwineklistu, bukandu bwanu bwakumushimu bulaakumana. (Mateyo 5:3) Munshila nshi? Mucishi coonse capanshi bantu baleepusha ayi, ‘ino ngumulandunshi tuli papano pacishi?’ Bantu balisuni abuumbi kushiba shikumbulo sha miipusho njobabaayo mu buumi. Bantu balasunishisha kucana shikumbulo mukwiinga Yehova mbwaakabalenga. Wakatulenga munshila yakwaamba ayi tunoocana lusangalalo na katumusebensela. Lusangalalo ndotucana kwiinda mukushiba ayi tutopaila Yehova talukoonshi kweelanishikwa alumwi luliloonse.Kulumbaisha 63:1-5.

Mulyeelete kushiba ayi Yehova ulisuni ayi muboolele kuli nguwe. Ino nga mwashiba buyani? Amuyeyebo: pakulemba buloshuwa iyi bakapaililawo. Mpashi wakamuletela ngumunene mulibungano na mushominyinaanu. Lyalo mwakaibelenga, akukonkela nshoyaamba. Ishi shoonse mbumboni butondesha ayi Yehova taakwe kumulubaako. Sombi ulamusenya pafwaafwi kuli nguwe.Joni 6:44.

Inga twayuminishikwa na twashiba ayi Yehova talubiiko basebenshi bakwe bakaboolela mwisule. Nankashi umwi, waliina ayi Donna, wakaashinisha makani aya. Wakaamba ayi: “paniini paniini ndakatalika kuboolela mwisule, sombi liinji ndakalinga kwiibaluka lilembo lya Kulumbaisha 139:23, 24, lyaamba ayi: ‘NobaLesa amunangenange kwaamba ayi mushibe moyo wangu. Amunsuunke kwaamba ayi mushibe miyeeyo yangu. Amubone na ndakonkela nshila shibiibi. Lyalo muntanjilile munshila yanu yamuyayaya.’ Ndakalinga kucishi ayi ndyeelete kuba mulibunga lyakwe Yehova kuteshi mucishi ici cibiibi. Ndakalinga anga ngumweensu mucishi ici. Lyalo ndakatalika kubona bumboni bwakwaamba ayi Yehova taakwe kunshiya. Cakalinga kusuniki nkuboolela kuli nguwe alimwi ntosangalala abuumbi kwaamba ayi ndakaboolela!”

“Lyalo ndakatalika kubona bumboni bwakwaamba ayi Yehova taakwe kunshiya; Cakalinga kusuniki nkuboolela kuli nguwe”

Tulapaila amoyo oonse kwaamba ayi amwebo mutalike alimwi “kusangalala uko kumupa Mwaami Lesa.” (Neyemiya 8:10) Mulakubona kwaamba ayi kubolela kuli Yehova teshi kusowabo ciindi sombi ncintu cibotu abuumbi.