Amuye ku shebo

Amuye ku shebo shimwi shiliimo

Amuye pa mitwi iliimo

Bakamboni Bakwe Yehova

Cilenje

Buumi bwa Bwineklistu Alimwi Anciito Yesu  |  June 2017

 BUUMI BWA BWINEKLISTU

Amukonkele Njiisho Shakwe Yehova Shakulilemeka

Amukonkele Njiisho Shakwe Yehova Shakulilemeka

Yehova Lesa ngowakabika njiisho bantu boonse nshobeelete kukonkela kumakani akulilemeka. Kucakubonenaako, wakapa mulawo ayi cikwati cilyeelete kuba camuyayaya pabantu bobilo musankwa alimwi amwanakashi. (Mt. 19:4-6, 9) Ulakasha mishobo yoonse yabufuule. (1 Koli. 6:9, 10) Wakabika anjiisho nshotweelete kukonkela pamakani ashakufwala alimwi akulibotesha shitondesha kwaamba ayi tuli bantu bakwe.—Dt. 22:5; 1 Ti. 2:9, 10.

Munshiku shino, bantu baanji balakaka kukonkela njiisho shakwe Yehova. (Loma. 1:18-32) Balakonkela mfwalilo, kulibotesha, alimwi amicito ipukite mucishi. Baanji balalibonesha amiibo yabo ibiibi abuumbi alimwi akuseka baabo bacite miibo ipuseneeko.—1 Pita. 4:3, 4.

Mbuli Bakamboni Bakwe Yehova, tulyeelete kukonkela njiisho shakwe Lesa pamakani akulilemeka cakutaloonda. (Loma. 12:9) Munshila nshi? Camaano tulyeelete kulwiita bamwi Yehova nshaasuminisha. Nacibi boobo swebo sobeene tulyeelete kuba cakubonenaako cibotu kumakani akulilemeka. Kucakubonenaako, ndyetutosala shakufwala alimwi akulibotesha, inga twalipusha ayi: ‘Sa nshonsala shilatondesha ayi ndakonkela njiisho shakwe Yehova shakulilemeka na ndakonkela cishi? Sa shakufwala shangu alimwi akulibotesha shilatondesha ayi ndi Mwineklistu uloonda Lesa?’ Ndyetutosala pulogilamu na filimu yakweebela, inga twalipusha ayi: ‘Sa Yehova inga wasuminisha pulogilamu iyi? Ino ilayuminisha njiisho shakulilemeka shakwe aani? Sa shakulikondelesha nshonsala inga shancafwa kulilemeka na sobwe? (In. 101:3) Sa inga shakalalisha bamumukwashi wangu na bamwi?’—1 Koli. 10:31-33.

Ino nceebonshi tulisuniki kukonkela njiisho shakwe Yehova shakulilemeka? Conoono Klistu Yesu ulaakunyonyoola shishi alimwi ashibiibi shoonse. (Ese. 9:4-7) Sombibo abo batoocita kuyanda kwakwe Lesa mbeshi bakabe abuumi. (1 Jo. 2:15-17) Aboobo, anu atwiindilishe kukonkela njiisho shakwe Yehova shakulilemeka kwaamba ayi abo beshibakabone miibo yesu ibotu bakalemeke Lesa.—1 Pe. 2:11, 12.

Ino nshomfwala alimwi ambondibotesha shilatondesha nshi pamakani akulilemeka?

AMWEEBELE VIDYO YA AMUBE SHICIBUSA WAKWE YEHOVA—MUSANKWA WOMWI, MWANAKASHI WOMWI, LYALO AMUBANDIKE MIIPUSHO ITOKONKAAWO:

  • Ino nceebonshi ncintu cabusongo kukonkela njiisho shakwe Yehova?

  • Ino ngumulandunshi bashali balyeelete kutalika kwiisha bana babo njiisho shakwe Yehova shakulilemeka ndyebacili baniini?

  • Ino banike alimwi abamanene inga bacafwa buyani bantu kucana mpindu kuswa kububotu bwakwe Lesa?