Yenda he misamu

Yenda he misamu mia mikufi

 TIMOKO TIA NDONGOKOLO 32

Bâ wa kuluka mpe zabaka ndilu zaku

Bâ wa kuluka mpe zabaka ndilu zaku

“Diata tintwari na Nzambi bu kwe zabi ndilu zaku!”​—MIKA 6:8.

MUKUNGA 31 Diata tintwari na Nzambi!

BUKUFI BWA TIMOKO *

1. Ngano Davide bwe katâ mu bungu dia kuluka kwa Yehova?

NGANO tulendi tâ ti Yehova wa kuluka wena? Yee, tulendi watâ. Lumbu timosi, Davide watâ: “Mbo kunganaka tibabulu tiaku ngatu tiakunkengerela mpe kuluka kwaku mbo kukunzangulaka.” (2 Sam. 22:36; Mik. 18:35) Davide bu katâ musamu wo, kampe mbo keri bambukilaka moyo ntangu ya yiza Samwele kwe tata’andi mu mu tumba ngatu kabâ mutinu waketi landa, ku Israele. Mu bala nana (8) ba babakala ba tata’andi, Davide weri mwana-nsuka. Kâ, ni yandi wayingasa mutinu Sawule.​—1 Sam. 16:1, 10-13.

2. Nti tuzonzela mu timoko ti?

2 Kampe Davide mbo kaketi tambula mabanza ma titsoniki timosi tia Mikunga tiatâ mu bungu dia Yehova ti: “Yandi mbo kakondamaka mu tala zulu na mutoto, mpe mbo kabendaka muntu wulembolo mfunu mu mfumfuta. [. . .] Mbo katelamasaka mputu mu mu zakasa na bamfumu.” (Mik. 113:6-8) Mu timoko ti mbo tutoko longoka ndongosolo za mfunu zitariri tifu tia kuluka bu tuzonzela bwe Yehova kasongelaka tifu tia kuluka. Ha manima, mbo tutomo longoka mpe misamu miakaka mitariri tifu tia kuluka mu nzila ya tifwani tia mutinu Sawule, tia mbikuri Daniele na tia Yezu.

NTI TULENDI LONGOKA MU TIFWANI TIA YEHOVA?

3. Bwe Yehova katubongelaka mpe nti wuta songela?

3 Yehova mbo kasongelaka ti wa kuluka wena mu mpila yi kabongelaka bisambiri biandi bie na masumu. Mbo katambulaka nsambululu’eto, kâ mpe, mbo katubongelaka ntiana ndiku zandi. (Mik. 25:14) Ngatu tabâ na tindiku na Yandi, Yehova wahana mwana’andi mu mukayulu mu bungu dia masumu meto. Ntia mpila tiari tia lemvokela, mpe ntia mpila tiari tia mutima!

4. Ngano Yehova nti katuhana, mpe mu bungu dia nti?

 4 Banza’eti mpila yakaka Yehova yi kasongelaka ti wa kuluka wena. Mu bungu ti ni Yandi wasala bima biabiansoni, mbo kaketi tu sala na kondo kwa bweso bwa sola mio mi tukwizi yirikaka mu luzingu lweto. Kâ, ka sarila buna ko. Yehova watusala mu tifwani tiandi mpe watuhana lenda dia sola mio mi tuyirikaka. Nsololo zi tusaka mfunu zena kwe Yehova, ni bu sa ti beto na Yandi, beto ba fioti twena mpe ka twena ngolo zimosi ko. Yandi zololo ti tasola mu mu sarila mu mutima’eto, mu bungu ti Yandi tuzololo mpe mbo tuzabaka ti ndandu ze kô bu tumutumamanaka. (Lub. 10:12; Iza. 48:17, 18) Mbo tutondaka Yehova mu bungu ti ni Yandi yôkele mu tifu tia kuluka!

Yezu bamunomekese ku mazulu. Ha lweka lwandi na bantu bakaka ba bata yâla tintwari. Tintwari mbo bata tala bambazi. Bambazi bakaka bata kwenda ha mutoto mu kwe sala bisalu biawu. Yehova heni lutumu kwe babansoni bê mu tifwani ti (Tala paragrafe 5)

5. Bwe Yehova katulongeselaka mu bâ ba kuluka? (Tala tifwani tia tinima tia ntete.)

5 Yehova mbo katulongesaka mu bâ ba kuluka mu mpila yi katubongelaka. Yehova ni Yandi yôkele ndwenga mu nza. Ni bu sa ti Yehova kena na nsatu malongi ko, mbo katambulaka mabanza ma bakaka. Mu tifwani, Yehova wahana nzila kwe mwana’andi mu mu bakisa mu sala bima biabiansoni. (Bin. 8:27-30; Kol. 1:15, 16) Mpe, ni bu sa ti Yehova ni Nkwa-Ngolo-Zazansoni, mbo kahanaka timfumu kwe bakaka. Mu tifwani, wayizi tûla Yezu Mutinu wa Timfumu, mpe mbo kakwizi hana mwa timfumu kwe bantu 144 000 bakwizi yâla tintwari na Yezu. (Like 12:32) Diangana, Yehova wakubika Yezu mu kwizi bâ Mutinu na Mfumu-Nganga-Nzambi. (Ebr. 5:8, 9) Mbo kakubikaka mpe bô bakwizi yâla na Yezu mu lungisa dema diawu, kâ Yehova ka tomo’â taluzulaka mpila yi basarilaka tisalu tiawu ko. Mbo kabâka na vuvu ti mbo bakwizi sarila luzolo lwandi.​—Nza. 5:10.

Tifwani tia Yehova tulandaka bu tukubikaka bantu bakaka na bu tubahanaka bisalu (Tala paragrafe 6-7) *

6-7. Nti tulendi longoka mu Tata’eto die ku mazulu bu tuhanaka bisalu kwe bantu bakaka?

6 Tala ti Tata’eto die ku mazulu dilembolo na nsatu ya lubakusu lwa muntu, mbo kahanaka timfumu kwe bakaka, ngano beto ka tufweti’â tasilaka bo ko! Mu tifwani, ngano nge mfumu-kanda peleko mukuluntu wa timvuka wena?  Landa tifwani tia Yehova mu hanaka bisalu kwe bantu bakaka, mpe kuyêlakandi mu tomo taluzula mpila yi basarilaka. Mu ntangu yi landaka tifwani tia Yehova, tisalu mbo tisalama mpe mbo kwizi kubika bantu bakaka, mbo ba bakisa mu bâ na lukwikulu mu bawu beni. (Iza. 41:10) Ngano bantu bê na mwa timfumu nti balendi longoka mu Yehova?

7 Bibila mbo disongelaka ti Yehova mbo kakipaka mabanza ma bala bandi bambazi. (1 Mit. 22:19-22) Bibuti, ngano bwe lulendi landila tifwani tia Yehova? Bu wufwanakanaka, yulaka mabanza ma bala baku mu mpila yi fweti yilamana tisalu; mabanza bu madelakana, sarila mo.

8. Bwe Yehova kabongela Abrahame na Sara na luvivululu lwalwansoni?

8 Kuluka kwa Yehova mbo kumonekaka mu luvivululu lwandi. Mu tifwani, Yehova luvivululu lu bâka nandi mu ntangu bisari biandi bisilaka nzengolo zandi ntembe na buzitu bwabwansoni. Yehova wawirikila Abrahame bu katâ ti, ka banza ko ti weri musamu wa mbote kwe Yehova mu fukisa hata dia Sodome na Gomore. (Mba. 18:22-33) Bambukaka mpe mpila Yehova yi kabongela mukento wa Abrahame, Sara; Yehova kabaka nkesi ko mu ntangu Sara kayizi seka mu kani dia sa Nzambi ti mbo kaketi kwizi baka zimi mu bununu bwandi. (Mba. 18:10-14) Yehova ka mu bakila nkesi ko, kâ wamubongela na buzitu bwabwansoni.

9. Bibuti na bakuluntu nti balendi longoka mu tifwani tia Yehova?

9 Bibuti na bakuluntu, ngano nti lulendi longoka mu tifwani tia Yehova? Banza’eti, ngano nti saka mu ntangu mwana’aku peleko bantu bakaka balembo tambulaka nzengolo zaku. Ngano mbo nwaninaka nzengolo zaku mu ntinu? Peleko mbo yêlaka mu bakula mabanza mawu? Kampe makanda na bimvuka mbo bibakaka ndandu mu ntangu bantu bê na timfumu balandaka tifwani tia Yehova. Ha titini ti, tuzonzele mio miamiansoni mi tulendi longoka mu musamu wutariri tifu tia kuluka mu nzila ya tifwani tia Yehova. Bwawu bu, mbo tulongoka mu nzila ya bifwani biakaka bie mu Bibila bwe tulendi songela tifu tia kuluka.

BIFWANI BIA BANTU BAKAKA NTI BILENDI TU LONGESA?

10. Bwe Yehova kasarilaka bifwani bia bantu bakaka mu tu longesa?

10 ‘Mulongi’eto wa Wunene,’ Yehova, mbo katuhanaka bifwani mu zu diandi mu tu longesa. (Iza. 30:20, 21) Malongi tubakaka mu bifwani bie mu Bibila bia bantu beri na bifu bitâka Nzambi nsayi, ntiana tifu tia zabaka ndilu zeto. Malongi mpe tubakaka bu tutaluzulaka misamu miaturila bantu balembana mu sarila bifu bia mbote.​—Mik. 37:37; 1 Kor. 10:11.

11. Nti tulendi longoka mu tifwani tia mbi tia Sawule?

11 Banza’eti misamu miaturila mutinu Sawule. Bu kabâ ntwenia, Sawule wazaba ndilu zandi, mpe bunkuta bweri nandi bwa tambula madema. (1 Sam. 9:21; 10:20-22) Kâ, ha manima Sawule wayizi bâ na lulendo mpe wayizi yirika misamu mi kalembo bêla na mio nswa mu yirika. Sawule wayizi batika mu diatila bo, ha manima ma ntangu yi kayizi bâ mutinu. Tilumbu timosi, Sawule wayizi lembana mu sarila luvivululu bu keri kêlaka mbikuri Samwele. Kani kakwikila mu Yehova mu sala mu bungu dia kanda dia Israele, Sawule wayizi hana mukayulu ni bu sa ti ka bâ na nswa ko wa hana mukayulu. Ha manima, Yehova wamulosa mpe Sawule wahombesa bweso bwa tatamana mu bâ mutinu. (1 Sam. 13:8-14) Mbo tusongelaka ti ndwenga ze neto tala ti tusariri malongi ma tifwani ti mu lembo yirikaka misamu mi tu lembolo na mio nswa.

12. Mu bungu dia nti Daniele keri tifwani tia mbote?

12 Mu sa luswaswanu na Sawule weri tifwani tia mbi, tataluzula tifwani tia mbote tia mbikuri Daniele. Mu luzingu lwandi, Daniele watatamana  mu bâ muntu wa kuluka mpe malongi ma Yehova keri dingaka ntangu zazansoni. Mu tifwani, Yehova bu kamusarila mu bangula ndozi ya mutinu Nebukadenezare, Daniele ka yizi’â tâ ko ti ni yandi beni wahana mbangululu yango. Kâ, mu bungu ti ndilu zandi za kazaba, wahana mukembo wawansoni kwe Yehova. (Dan. 2:26-28) Ngano ntia malongi tulendi baka? Tala ti bampangi mbo bayangalalaka mu binzonzi bi tusaka peleko ndandu zazingi tubakaka mu tisalu tia samuna, tuzololo tabambukaka ti tufweti hanaka mukembo wawansoni kwe Yehova. Tufweti zabaka ti, tala ti lubakusu lwa Yehova kâni, ka tulendi’â tasa bima bio ko. (Flp. 4:13) Bu tusilaka bo, mbo tulandaka mpe tifwani tia mbote tia Yezu. Ngano bwe?

13. Nti tulongoka mu Yezu mu nzonzolo ye mu Za 5:19, 30?

13 Ni bu sa ti Mwana wa Nzambi weri wa lunga, Yezu wasikirila Yehova. (Tanga Za 5:19, 30.) Yezu ka yêla ko mu bonga timfumu tia Tata’andi die ku mazulu. Bisi-Filipe 2:6 mbo yitutêlaka ti Yezu “ka bâ na mabanza ko ma wuka tibuka [tia Nzambi], wuzololo tâ ti, kabâ nsinsa na Nzambi.” Yezu Tata’andi keri tomo tumamanaka, wazaba ndilu zandi mpe lutumu lwa Tata’andi keri zitisaka.

Yezu wazaba mpe wazitisa ndilu za lutumu lwandi (Tala paragrafe 14)

14. Bu bamulomba tima ti kalembo bêla na nswa mu ba hana, Yezu nti kasa?

14 Banza’eti musamu wayirika Yezu mu ntangu Zaki na Za, na nguri’awu yi bayizi mu lomba tima ti kalembo bêla na nswa mu ba hana. Ho nkatika bendo, Yezu wayizi tâ ti Tata’andi kwa die ku mazulu lendi bonga nzengolo ya zakasa muntu ha lweka lwa lubakala peleko lwa lukento lwa Yezu mu Timfumu. (Mat. 20:20-23) Yezu wasongela ti ndilu zandi za keri zitisaka. Yezu ndilu zandi za kazaba. Kani kabwe, Yezu ka sa na kani tima ko Yehova ti kalembo mu hanina nswa. (Za 12:49) Ngano bwe tulendi landila tifwani tia mbote tia Yezu?

Bwe tulendi landila tifwani tia Yezu mu musamu wutariri tifu tia zabaka ndilu zeto? (Tala paragrafe 15-16) *

15-16. Bwe tulendi sarila malongi me mu 1 Bisi-Korente 4:6?

15 Mbo tulandaka tifwani tia Yezu bu tusarilaka malongi me mu 1 Bisi-Korente 4:6. Verse yo mbo yitâka: ‘Fweti telamana kwa ha mina miatsonama.’ Dieka bo, bu batulombaka malongi, kani kabwe, ka tufweti’â tasaka tiya kwe bantu bakaka ko ngatu batambula mabanza meto peleko ka tufweti’â tatâka musamu ko ntete tabanza. Tufweti sarilaka malongi me mu Bibila na mu mikanda mieto. Buna mbo tukwizi songela ti ndilu zeto za tuzebi. Mbo tusongela ti ka  tuzebi’â misamu miamiansoni ko. Bu tusilaka bo, mbo tusongelaka ti ba kuluka twena, mu bungu ti mbo tubakulaka ti malongi ma Yehova ma mbote kwa mabâka ntangu zazansoni mu bungu dia beto.​—Nza. 15:3, 4.

16 Bu tubâka ba kuluka Yehova tukembelaka. Kâ misamu mie kô miakaka mitutumaka tabâ ba kuluka. Bwawu bu, mbo tumona bwe tifu tia kuluka na tifu tia zabaka ndilu zeto bilendi tu bakisila mu bâ mu nsayi na mu wisanaka na bantu bakaka.

MU BUNGU DIA NTI BWE BUBOTE MU BÂ BA KULUKA?

17. Mu bungu dia nti bantu ba kuluka mpe bazabaka ndilu zawu babâka mu nsayi?

17 Bu tubâka ba kuluka mpe bu tuzabaka ndilu zeto, tulendi tomo kwizi bâ mu nsayi. Ngano mu bungu dia nti? Bu tuzabaka ndilu zeto mbo tukwizi tondaka mu bungu dia lubakusu lu tu hanaka bantu bakaka. Mu tifwani, banza’eti Yezu bu kawasisa bantu 10 beri na bwazi (lèpre); wumosi kwa wayizi vutula matondo kwe Yezu mu bungu ti wamuwasisa mu timbevo tiandi tia ngolo​—tima ti kaketi lembo lenda yandi beni mu sa. Muntu wo wa kuluka wazaba ti ka keti’â wasa ko tala ti lubakusu lwa Yezu kâni, mpe watonda mu bungu dia lubakusu lu kabaka, mpe wakembela Nzambi.​—Like 17:11-19.

18. Bwe tifu tia kuluka na tifu tia zabaka ndilu zeto bilendi tu bakisila mu wisana na bantu bakaka? (Bisi-Rome 12:10)

18 Bantu ba kuluka mpe bazabaka ndilu zawu, mbo bavulu wisanaka na bantu bakaka, mpe ndiku za mbote zi vulu bâka nawu. Mu bungu dia nti? Nsayi yayingi yi bâka nawu mu zaba ti bantu bakaka mpe bifu bia mbote bie nawu, mpe mbo basikirilaka bantu bango. Bantu ba kuluka mpe bazabaka ndilu zawu mu nsayi babâka bu bamonaka bantu bakaka bu basalaka bubote kuma ni kuma; mpe manzangu ma bâka nawu mu sîka na mu zitisa bantu bakaka.​—Tanga Bisi-Rome 12:10.

19. Mu bungu dia nti tufweti losela lulendo?

19 Bantu bê na lulendo ka bazololo’â ko basikaka bantu bakaka, bazololo ti basîka kwa  bawu. Bantu bê na lulendo mbo bavulu dingaka mu tifwanakasaka na bantu bakaka mpe mbo badingaka mu yôka bantu bakaka. Ka bazololo’â ko mu kubikaka bantu bakaka na mu ba hanaka bisalu, mu bungu ti mbo bazolo tâka ti: “Tala ti luzololo bisalu biasalama bubote, lufweti biasala beno beni.” Muntu we na lulendo mbo wuvulu zoloko mu tizangula mpe tibanda tibaka nandi mu ntangu bantu bakaka yi basalaka bubote yôka yandi. (Nga. 5:26) Bantu bango ka bavulu’â bâka na bindiku bizingilaka ko. Tala ti tubakuri ti lulendo lwe neto, tufweti lomba lubakusu kwe Yehova na bunsungu bwabwansoni mu ‘tomesa mbanzulu zeto’ ngatu lulendo lwalembo sobesa timuntu tieto.​—Rom. 12:2NWT.

20. Mu bungu dia nti tufweti bâ ba kuluka mpe tufweti zabaka ndiku zeto?

20 Matondo mamingi tuvutulaka mu bungu dia tifwani tia Yehova! Kuluka kwandi mbo kumonekaka mu mpila yi kabongelaka bisari biandi, tuzololo talanda tifwani tiandi. Tuzololo mpe talanda bifwani bia mbote bie mu Bibila bia bantu ba kuluka babâ na bweso bwa diata tintwari na Nzambi. Bika ntangu zazansoni tahanaka Yehova buzitu na nkembo wumufwanane. (Nza. 4:11) Tala ti tusiri bo, tulendi kwizi bâ ndiku za Yehova ntangu zazansoni, mu bungu ti Yandi, bantu ba kuluka mpe bazabaka ndilu zawu kazoloko.

MUKUNGA 123 Tazitisakeno lutwalusu lwa Nzambi

^ par. 5 Muntu wa kuluka tiari tia mutima ti bâka nandi mu bantu bakaka. Mu bungu ti Yehova mbo kasongelaka tifu tia kuluka kwe bantu bakaka, tuzebi ti Yandi wa kuluka wena. Mu timoko ti, mbo tulongoka tifwani tia Yehova, tilendi tu bakisa mu tomo bâ bantu ba kuluka. Mbo tutomo longoka mpe tifu tia kuluka mu nzila ya tifwani tia mutinu Sawule, tia mbikuri Daniele na tia Yezu.

^ par. 58 NSASA YA TIFWANI: Mukuluntu wumosi wuta bonga ntangu ya kubika mpangi ya yibakala ya ntwenia mu kipa teritware za timvuka. Ha manima, mukuluntu wo ka wuta tomo taluzula tisalu tia mpangi yo ya ntwenia ko, kâ mbo kata mu hana nzila ya sala tisalu tiandi yandi beni.

^ par. 62 NSASA YA TIFWANI: Mpangi ya yikento yita yula mukuluntu wumosi tala ti wufwanane mu kwenda ku malaki ma makwela makwizi bâ mu nzo ya nsambululu ya dibundu diakaka. Mukuluntu ka wuta mu hana mabanza ma yandi beni ko; kâ mbo bata taluzula mitieno mia Bibila.