Tolokeleni

Tolokeleni muye pa filukusangwamo

 AMEKALILO ABUKLISTU

Ifyakupyungisha Ibuuku lya Kani Findo Baibolo Itusambisha?

Ifyakupyungisha Ibuuku lya Kani Findo Baibolo Itusambisha?

Ibuuku lya Ifi Baibolo Itusambisha lilipalene ne buuku lya Ifi Baibolo Isambisha. Onse abili alasambisha bucine buntu bumo kabili mu nshila intu imo. Nangabe’fyo, ibuuku lya Ifi Baibolo Itusambisha lililembelwe mu nshila iipubile. Lililembeelwe babo abalukukatashiwi ukumfwisha ifyali mwi buuku lya Ifi Baibolo Isambisha. Mu ciputusha ca ifyebo na fimbi mwi buuku lya Ifi Baibolo Isambisha mwalukuba ifyebo ifingi. Pano, mu ciputusha ca ifyebo na fimbi mwi buuku lya Ifi Baibolo Itusambisha muli lukoso ifyebo ifinini ifibuulishisha mu nshila iipubile amashiwi aalukusangwa mwi buuku. Ifyapitala tafikwetepo ifyakwipusha fya kutatikilapo neli akabokoshi ka kupitulukamo . Sombi, icapitala cimo cimo cilukushila ne kubuulishisha kwa bucine bwa mu Baibolo ubulabilwepo muli ceco icapitala. Koti ni fyenka filya calukuba kwi buuku lya Ifi Baibolo Isambisha, ibuuku lya Ifi Baibolo Itusambisha nalyo lingapeelwa pa mpindi iili yonse nangaba ati talilipo pali fyefyo tulukupeela abantu uyo mwenshi. Tungapyungisha shani ifiputusha fya bukumo ifili mwi buuku lya Ifi Baibolo Itusambisha?

UKUBUULISHISHA: Inshila tupyungisha pa kutangilila isambililo lya Baibolo mwi buuku lya Ifi Baibolo Isambisha iya kupenda palakalafu ne kwipusha icakwipusha panuma, ilapyunga cabe bwino ku bantu abengi. Pano, nga kani umusambile teshipo bwino umulaka neli teshipo bwino ukupenda? Ili cabe’fyo, mungasalululapo ukusambisha umusambile ukupyungisha iciputusha ca Ukubuulishisha, eli panuma cipale mungamukoselesha ukupenda icapitala conse ili ashala enka. Impindi ishingi, mungasambisha umusambile bucine bumo lukoso mu mamineti 15. Pakuti mu ciputusha ca Ukubulishisha tabalabiilepo pa fyebo fyonse ifili mu capitala, uwakutulisha alyelelwe ukwanshika bwino, ne kwishiba ifi umusambile alukupengela. Kani uwakutulisha atangilila isambililo ukupyungisha icapitala, ukubuulishisha kungapyungishiwa koti kupitulukamo.

IFYEBO NA FIMBI: Amashiwi aali mu ciputusha ca fyebo na fimbi, alilondene ukwelelwa na fyefyo alukusanganwa mwi buuku. Uwakutulisha angasalululapo kani bangambaala ifili mu ciputusha ca ifyebo na fimbi ili balukusambilila neli koku.