Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama  |  November 2015

 UMUTWI WA INO MAKASHINI

Kani BaLesa Balabona Shani Inkondo?

Kani BaLesa Balabona Shani Inkondo?

Kani mungaasuka shani ici icakwipusha? Abengi balalanguluka ati baLesa balisuminishe nkondo. Balalabile’fyo ni pakuti Baibolo ilalabilapo ati baLesa baalukubuula abapyungishi babo ukulukulwe’nkondo. Nangabe’fyo, bambi balibwene ati Umwana wa baLesa, baYesu, baalibuulile abasambile babo ukulukutemwa abapate babo. (Matayo 5:43, 44) Popele balalanguluka ati pa mpindi imo baLesa baalilekele ukubona inkondo koti ni fyefyo balukuibona akale kabili ati pali ino mpindi tabasuminishapo inkondo.

Nga mwebo, findo mulangulukapo? Kani baLesa balisuminishe nkondo? Kani efi cili, ninshi ni kuli kesa kabeya baba muli shishi inkondo? Ukwishiba ifyasuko kuli fifi ifyakwipusha kungamofweniko ukwishiba ifi mubona inkondo. Ku cakubwenako, kani ukufuma ne kale mulishibile ati baLesa balisuminishe nkondo eli bali ku kabeya ka babo mulukufwaya ati bakacimfye, mungomfwa bwino ni pakuti mulicetekele ati abali ku kabeya kenu bakacimfya. Pano, mungomfwa shani kani mwaishiba ati baLesa bali ku kabeya ka bapate benu? Ukwakubula ne kukanika, mungafwaya ne kwalukila ku kabeya kambi.

Kanshi cicindeme makosa ukwishiba bucine pali lili ilyashi ni pakuti ukwishiba ifi baLesa babona inkondo kukambukila ifi mwebo mubabona baLesa. Kani na mwebo muli pa mamilyoni abantu abapenga pakuti pa nkondo, ninshi mulafwaisho’kwishiba icasuko kuli cici icakwipusha, Kani fya cine filya bambi basuminine ati baLesa ebasuminisha ati abantunshi balukupenga ku nkondo, neli ati cipale tababikileko lukoso akalango ku bantunshi?

Mungakankamana ukwishiba ati ifi Baibolo ilabilapo filipusene makosa na fifi abantunshi balanguluka. Bucine bwakweba’ti ukufuma lukoso ne kale, baLesa tabalukilepo muli fyefyo babona inkondo. Nga tulabile pali fyefyo Baibolo ilabilapo pali fyefyo baLesa baalukubona inkondo akale na mu mpindi ya basambile, ili baYesu baali pa calo. Ukucite’fi kuli ne kutofwako ukwishiba ifi baLesa babona inkondo pali buno bukumo ne kwishiba kani kuntangiile kukaba inkondo.