Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama  |  October 2015

 UMUTWI WA INO MAKASHINI | Ni BWISA BUNE UBULI MU KUTEMBELA?

Cindo Cilengesha Abantu Ukutembela?

Cindo Cilengesha Abantu Ukutembela?

“Nalukuteya ifyakwangala fya kushitikapo. Nalukutembela ati nkawine indalama ishingi. Pano ifyo tafyacitikilepo.”—Ba Samuel, * aba ku Kenya.

“Ku sukuulu balitusambishe amatembelo, kabili ayo enka eo twalukutembela ni pakuti twaliasungiile lukoso ku mutwi.”—Teresa, uwa ku Philippines.

“Ndatembela kani ndi ne makatasho. Ndalomba ukumfiitulukila ifyakubifya ne kuba umuKlistu umuweme.”—Ba Magdalene, aba ku Ghana.

Ifyalabiile ba Samuel, Teresa, na ba Magdalene filukubuulisha ati fingi ifilengesha abantu ukutembela. Bambi balatembela pa fintu ifyelelwe, pano bambi pa fintu ifitafyelelwepo. Bambi nabo balatembela ukufuma panshi ya mutima, pano bambi balatembela ukwa kubula ne kulangulukapo. Ukuba, abantu balatembela pakweba ati bakacite bwino mu fya ku sukuulu, neli ati ibumba lya bafyakwangala ili batemenwe likawine. Kabili bambi balatembela ati baLesa babatangilile, neli pakuti pa milandu imbi lukoso. Pano, nangaba ne fibalengesha ukutembela, abantu balisumiine ati ukutembela kucindeme. Na cine, ukufwailisha kulisangile ati na babalya abatabakwetepo uku bapempela, nabo balatembela lyonse.

Kani na mwebo mulatembela? Kani mulatembela, findo mutembelelapo? Nangaba ati mulatembela neli tamutembelapo, cipale mungalanguluka ati: ‘Kani ndabwenamo mu kutembela? Kani kuli abomfwa amatembelo angi?’ Umbi umulembeshi alilabiile ati itembelo lili lukoso koti “cintu icitulengesha ukumfwako bwino.” Bambi abasambilile ifya mu cipatela nabo efi balanguluka, ati itembelo lili koti “muyanda.” Kani abantu balatembela ni pakuti efi belelwe lukoso ukucita, neli balatembela pakweba ati bomfweko bwino?

Ukupusanako, Baibolo ilibuulishishe ati itembelo lilicilile na pa nshila iya kulisangalashishamo. Ilatubuula ati kuli abomfwa amatembelo esu ao tutembela mu nshila iyelelwe kabili pa fintu ifyelelwe. Kani ifi fya cine? Nga tubone.

^ par. 3 Bambi talipo e mashina abo.