Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama  |  October 2015

Mba Nindo BaLesa Bafwaila ati Tulukutembela Kuli Bo?

Mba Nindo BaLesa Bafwaila ati Tulukutembela Kuli Bo?

BaLesa balafwaya tube ifibusa fyabo.

Ifibusa filambaala pakweba ati fikoshe bucibusa. BaLesa nabo balafwaya ati tulukutembela kuli bo pakweba ati tube ifibusa fyabo ifipalamishe. Balalabila ati: “Mukanjita nebo, ne kuya ne kuntembela, eli nkamukutikeni.” (Jelemiya 29:12) Ili mulukulabila na baLesa, ‘mukapalamina kuli bo, eli nabo bakapalamina kuli mwebo.’ (Jakobo 4:8) Baibolo ilatubuula ati: “BaYawe bali apepi pali babo bonse abalukubeta.” (Amasamo 145:18) Kani tulukutembela inshiku shonse, bucibusa bwesu na baLesa bukakoselako.

BaYawe bali apepi pali babo bonse abalukubeta.”—Amasamo 145:18

BaLesa balafwaya ukutofwako.

BaYesu balilabiile ati: “Pali mwebo, mba ni nani uli ne mwana, kani umwano’yo akamulombe shinkwa, akamupele’bwe? Neli kani akalombe isabi, akamupele’nsoka? Ifyo kani mwebo . . . muliishi ukubapele’mpese ishiweme abana benu, tanje cine baWishinwe aba kwiulu bakabapele’fiweme abo abalukubalomba.” (Matayo 7:9-11) Icine, baLesa balafwaya ati mulukutembela kuli bo ni pakuti “balamulameni” kabili balafwaya ukumofweniko. (1 Petilo 5:7) Nakabili, balafwaya mwebo ati mulukubabuulako amakatasho enu. Baibolo ilatubuula ati: “Tekubamba mu mitima neli fya cintu cimo; sombi mu fintu fyonse ku kutembela ne kukombetela ne kutota pamo, nga kukeshibwe kuli baLesa ukulomba kwenu.”AbaFilipoi 4:6.

Abantunshi balafwaisha ukutangililwa na baLesa.

Abasambilile makosa ifya mekalilo abantushi balilabiile ati abantu abakuti ubwingi balafwaisha ukutembela. Na babalya abasumiine ati takulipo baLesa ne bakanika ati baLesa eko bali, nabo balafwaya ukutembela. * Fyonse’fi filukubuulishisha ati abantunshi baalilengelwe na kuku ukufwaisha ukwa kutangililwa na baLesa. BaYesu balilabiile ati: “Umuntu tekalapo ne mweo ku fimpwampwa fya shinkwa fyenka, sombi ni ku mashiwi onse afuma mu kanwa ka baLesa.” (Matayo 4:4) Ukulukulabila na baLesa lyonse ni nshila imo yeyo tungekushishamo uku ukufwaisha.

Pano, findo tukabwenamo kani tulukutembela kuli baLesa inshiku shonse?

^ par. 7 Mu 2012, abafwaya-fwaya pa fintu aba pa Pew Research Center balilabiile ati pa bantu aba mu United States abalabila ati takulipo baLesa ne bakanika ati baLesa eko bali, amapesenti 11 pali bo balatembela limo pa mwenshi.