Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama  |  September 2015

“Mwimakane Makosa mu Kucetekela”

“Mwimakane Makosa mu Kucetekela”

“Mwimakane makosa mu kucetekela, . . . mukose.”—1 ABAKOLINTO 16:13.

INYIMBO: 60, 64

1. (a) Findo fyacitikile kuli Petilo ili kwali icipuupu icikulu pa Cishiba ca Galili? (Boneni icikope icili peulu.) (b) Mba nindo Petilo atatikiile ukwibila?

BUMBI bushiku, Petilo ne basambile bambi baali mu bwato pa Cishiba ca Galili. Balikatashiwe ukwabuka ni pakuti kwali icipuupu icikulu. Ili ifi fyalukucitika, balibwene baYesu balukwenda peulu pa cishiba. Petilo alibilikishe kuli baYesu ati bamwite ukuya kuli bo ili enda pa menda. Ili baYesu bamubuulile ati aye kuli bo, Petilo alifuminemo mu bwato ne kutatiko’kuya kuli bo. Ili aendeleko lukoso panini pa menda, Petilo alitatikile ukwibila. Mba nindo? Ni pakuti alibwene icipuupu icikulu ne mankapa. Popele alitiinine. Petilo kaabilikisha ati baYesu bamofweko kabili penka’po balimwikete ne kulabila kuli ye ati: “We wa kucetekela kunini, mba nindo wakanicila?”—Matayo 14:24-32.

2. Findo ifi twakwambaalapo?

2 Pano nga twambaale pa fintu fitatu pa kucetekela ifi tungasambililako ku fyamucitikiile Petilo: (1) ifi pa kutanga acetekele ati baYawe bangamofwako, (2) ifyalengeshe ukucetekela kwakwe ukunaka, na (3) ifyamofweleko ukuba ne kucetekela nakabili. Ukwambaala pali fifi kulukutofwako ukwishiba ifi ‘tungemakana  abakosele mu kucetekela.’—1 AbaKolinto 16:13.

TUCETEKELE ATI BALESA BAKATOFWAKO

3. Mba nindo Petilo afumiinemo mu bwato, kabili na fwebo tulicitile shani ifipalileko?

3 Petilo aali ne kucetekela ukukosele. Mba nindo twalabilile’fyo? Ili baYesu bamwitile, Petilo alifuminemo mu bwato ne kutatiko’kwenda pa menda. Alicetekele ati baLesa bangamofwako koti ni fyopele’fyo baofweleko baYesu ukwenda pa menda. Mu kupalako, ili baYesu batwitile ukubalonda, na fwebo twalilituulile fwebene kuli baYawe ne kubatishiwa. Mba nindo? Ni pakuti twalicetekele muli baYawe na baYesu, kabili twalicetekele ne kweba ati bangatofwako.—Yoane 14:1; pendeni 1 Petilo 2:21.

4, 5. Mba nindo ukucetekela kucindamine?

4 Ukucetekela kucindeme. Ukucetekela kwakwe Petilo kwalimupeele amakosa akwenda pa menda, icintu icalukubonwa ku bantunshi ati tekuti cicitwepo. Ukucetekela kungatofwako na fwebo ukucite’fingabonwa ati tekuti ficitwepo. (Matayo 21:21, 22) Fwe bambi tulyalwile imibelo yesu ne kulanguluka kwesu ica kweba ati abantu abaatwishi akale kani batubona balakankamana. Tulyalukile muli fyonse’fi ni pakuti tulitemenwe baYawe, kabili nabo baalitofweleko. (Pendeni AbaKolosai 3:5-10.) Ukucetekela e kwalengeshe fwebo ukulituula kuli baYawe ne kube’fibusa fyabo. Tekuti tucitepo ifi ku makosa esu.—AbaEfesa 2:8.

5 Ukucetekela kwesu kulatukosha. Ku cakubwenako, kulatofwako ukuciicila ifyakwesha fya Musenseshi, umupate wesu uwa makosa. (AbaEfesa 6:16) Nakabili, pakuti tulicetekele muli baYawe, tatubombomanapo makosa kani tuli ne makatasho. BaYawe balitulaile ukutupeela ifi tupengela kani twabacetekela ne kutango’kupensela Ubufumu bwabo. (Matayo 6:30-34) Kabili ukulunda pali fyefyo, baYawe bakatupeelo’mweo wa muyayaya pakuti pa kucetekela kwesu.—Yoane 3:16.

IFI UKUCETEKELA KWESU KUNGANAKA

6, 7. (a) Ni kundo tungapalanya icipuupu ne mankapa ifyatiinishe Petilo? (b) Mba nindo tungalabilila ati umuntu angalufyo’kucetekela?

6 Ili Petilo alukwenda pa Cishiba ca Galili, alitiinine. Mba nindo? Ni pakuti pa cipuupu ne mankapa. Ifi tungafipalanya ku fyakweshe’fingi ifi fwe baKlistu tupitamo shino nshiku. Ukuba, ifi ifyakwesha fingabe’fikulu. Pano kani baYawe batofwako, tungaba abakosele. Nakabili, mulukwanuka ifyacitikile kuli Petilo. Taibilepo pakuti icipuupu ne mankapa fyalukumupama. Sombi, Baibolo ilalabila ati: ‘Pa kubone’cipuupu icikulu, alitiinine.’ (Matayo 14:30) Petilo alilekele ukutontomeka pali baYesu kabili alitatikile ukutontomeka pa cipuupu. Ici calilengeshe ukucetekela kwakwe ukutatiko’kunaka. Na fwebo, kani tulukutontomeka makosa pa makatasho esu, tungatatika ukukanika ati baYawe bakatofwako.

7 Tulyelelwe ukwishiba ati umuntu angalufyo’kucetekela. Mba nindo? Ni pakuti Baibolo ilalabila ati ukubulo’kuba ne kucetekela e ‘kubifya ukutusakatila bwangu.’ (AbaEbeya 12:1) Na fwebo kani tulukutontomeka makosa pa fibipile koti ni fyefyo Petilo acitile, ukucetekela kwesu kunganaka bwangu. Pano tungeshiba shani kani ukucetekela kwesu kwaya ili kunaka? Ifyakwipusha fyakonkapo fyakutofwako ukulisalaala fwebene.

8. Findo fingatulengesha ukutatika ukubono’kulaya kwa baLesa koti takulipo kwa cinenene?

8 Kani ndabone’milayi ya baLesa koti ni fyefyo nalukuibona pa kutanga? Ku cakubwenako, baLesa balilaile ukonala icalo cakwe Satana. Nangabe’fyo, kani tulatumpaikwa ku fyakulisangalashishamo ifya mu calo cakwe Satana? Kani ifyo efi cili, tungatatika ukulanguluka ati ukushila kuli ukutali. (Abakuci 2:3) Langulukeni pa cakubwenako na cimbi. BaYawe baalitupeele umulubulo, kabili balitulaile ukutufitulukila ifyakubifya fyesu. Pano kani tulukutontomeka pa fyakubifya fyesu ifya kale, tungatatiko’kulanguluka ati  baYawe tabatufitulukilepo. (Ifyacitilwe 3:19) Icingafumamo ca kweba ati tungaleka ukusangalalila mu kupyungila baLesa kabili tungaleka ne kutulisha kuli bambi.

9. Findo fingacitika kani twatatiko’kubika makosa akalango ku fyesu?

9 Kani ndapyungila baYawe apapelele amakosa anji? Ukupyungila makosa baYawe kulatofwako ukulukutontomeka pa milayi yabo iya kuntangiile. Pano, nga kani tulitatikile ukubika makosa akalango ku fyesu? Ku cakubwenako, tungasumina ukupyunge’ncito iya kweba ati tulukufole’ndalama ishingi pano iilukutulengesha ukubulo’kupyungisha mu milimo ya baYawe. Ici cinganasho’kucetekela kwesu, kabili tungaba “ne bufila,” e kweba ati ukubulo’kupyungila baYawe apapelele amakosa esu.—AbaEbeya 6:10-12.

10. Tulalangisha shani ati tulicetekele baYawe kani tulukufitulukila bambi?

10 Kani cilankatasho’kufitulukila? Ili bambi batubifya, kani tulafitwa ne kufwayo’kuleka ukulabila nabo? Kani efi mucita, ninshi mulabika lukoso akalango pali fyefyo mumfwa. Tulalangisha ati tuli ne kucetekela kani tulukufitulukila bambi. Muli isa nshila? Kani bambi batubifya, ninshi bapango’mulandu kuli fwebo. Ili twabifya kuli baYawe, tulapango’mulandu kuli bo. (Luku 11:4) Kanshi kani tulukufitulukila bambi, ninshi tulukulangisha ati tulicetekele muli baYawe. Tulacetekela ati baYawe bakatushukisha, kabili ukushukishiwa kuli bo kucindeme ukucila na pa kupanika uwatubifishe. Abasambile ba baYesu baalishi ati ukucetekela kucindeme pa kufitulukila bambi. Ili baYesu babuulile abasambile babo ukulukufitulukila na baabo abalukubabifya imiku iingi, baalilombele ati: “Mukukushe ukucetekela kwesu.”—Luku 17:1-5.

11. Findo fingatulengesha ukubulo’kusambililako ku kufunda?

11 Kani ndafiitwa ili bamfunda? Mulukubone’nshila mungapyungishishamo uko ukufunda ukucilo’kubonamo ifibipile mu kufunda neli mu muntu uwamufundeni. (Ifisimpi 19:20) Tekweshapo ukupulushe’shuko ilingamofweniko ukutatiko’kulanguluka koti ni baYawe!

12. Kani umuntu alatamaakila abalukutangilila, cilalangisha ati ukucetekela kwakwe kuli shani?

12 Kani ndatamaakila abatangilila mwi kelesha? Ili abaIshilaeli baumfwile ilyashi ilibipile ukufuma ku baceteshi 10, balitamaakile Mose na Aloni. BaYawe balipwishe Mose ati: “Ni mpindi ya shani bakalukuleko’kuncetekela?” (Ifyakupenda 14:2-4, 11) BaYawe balishibile ati abaIshilaeli tababacetekelepo pakuti balitamaakile Mose na Aloni, abalalume baabo basalulwile. Na fwebo, kani tulukutamaakila baabo baYawe basalulwile ukulukutangilila abantu babo muli shishino inshiku, tulalangisha lukoso ati ukucetekela kwesu muli baYawe kwanaka.

13. Nindo tatwelelwepo ukubombomana kani twasangana ati ukucetekela kwesu kulukuya ili kunaka?

13 Mwibombomana kani mwasangana ati ukucetekela kwenu kulukuya ili kunaka panuma ya kulisalaala ne fyakwipusha twalabilapo. Mulyelelwe ukwanuka ati ne ntangishi Petilo yalitiinine kabili yalitatikilo’kukanika. Shimbi impindi, baYesu baalukupaatila abasambile babo pa kuba ne ‘kucetekela ukunini.’ (Matayo 16:8) Pano, tungasambililako ku fyacitile Petilo. Boneni ifi acitile panuma ili atatikile ukukanika ne kwibila pa cishiba.

TONTOMEKENI PALI BAYESU PA KUKOSHA UKUCETEKELA KWENU

14, 15. (a) Findo Petilo acitile ili atatikilo’kwibila? (b) Kani ‘tungatontomeka’ shani pali baYesu?

14 Findo Petilo acitile ili atatikilo’kwibila? Pakuti Petilo aalishi bwino ukusamba, cipale nga alisalulwilepo ukusamba ne kubwelela mu bwato. (Yoane 21:7) Pano, nindo tacitiilepo ifyo? Tacetekelepo ati angalipulusha umwine. Alitontomekele pali baYesu nakabili ne kulomba ukumofwako. Kani twabona ati ukucetekela kwesu kulukuya ili kunaka, tulyelelwe ukutuntulula Petilo. Tungacita shani ifyo?

 15 Fyenka filya Petilo atontomekele pali baYesu ne kulomba ukumofwako, na fwebo tulyelelwe ‘ukutontomeka’ pali baYesu. (Pendeni AbaEbeya 12:2, 3) Ukuba, tekuti tubabonepo ne menso esu koti ni fyefyo Petilo ababwene. Pano, ‘tungatontomeka’ shani pali baYesu? Ukupitila mu kusambilila ifi baalukusambisha na fyefyo baalukucita ne kwesha ukubatuntulula. Kani twacite’fyo, tukapokelela ukofwako tupengela pakweba ati tukoshe ukucetekela kwesu. Nga tulabile pali fyefyo tungatuntulula baYesu.

Tungakwata ukucetekela ukukosele kani tulukutontomeka pali baYesu ne kubatuntulula (Boneni palakalafu 15)

16. Kani Baibolo ingatofwako shani ukukosha ukucetekela kwesu?

16 Kosheni ukucetekela kwenu muli Baibolo. BaYesu baalicetekele ati Baibolo Mashiwi abaLesa kabili ati ilapeela ukufunda kwa mano. (Yoane 17:17) Pa kutuntulula baYesu, tulyelelwe ukulukupenda ne kusambilila Baibolo lyonse, ne kwalakanyapo pali fyefyo tulukusambilila. Tulyelelwe ne kufwaya-fwaya ifyasuko ku fyakwipusha tungakwata. Ku cakubwenako, kani mulicetekele ati tulukwikala mu nshiku sha kupelako? Kosheni ukucetekela kwenu ukupitila mu kupenda ukushimika kwa mu Baibolo ukulangisha ati icine tulukwikala mu nshiku sha kupelako. Kani mulukufwayo’kukosha ukucetekela kwenu mu milayi ya baLesa iya kuntangiile? Sambilileni pa kushimika kwa mu Baibolo ukukonshiwe. Kani mulicetekele ati Baibolo ilatofwako na bubuno bukumo? Mungapenda amalyashi abakwabesu ne nkashi baabo Baibolo yaofweleko ukwalula amekalilo abo. *1 AbaTesalonike 2:13.

17. Cindo caofweleko baYesu ukuba abakosele ili balukweshiwa, kabili tungabatuntulula shani?

17 Mulukutontomeka pa mashuko baYawe batulaile. BaYesu baalitontomekele pa mashuko babalaile, kabili ici calibofweleko ukuba abakosele ili balukweshiwa. (AbaEbeya 12:2) Tabatumpaikilwepo ku fintu fya  mu calo cakwe Satana. (Matayo 4:8-10) Tungatuntulula shani icakubwenako ca baYesu? Ukupitila mu kutontomeka pa mashuko baYawe batulaile. Alakanyeni ati muli mu calo ca bukumo. Esheni ukulemba ifi mufwaisho’kucita mu Paladaiso. Neli lembeni abantu abakabuuka baabo mufwaisho’kulabila nabo na fyefyo mufwaisho’kubabuulako. Mulukubona ati ni mwebo baLesa balaile iyi imilayi.

18. Kani itembelo lingatofwako shani ukukosha ukucetekala kwesu?

18 Mulukutembela ati baLesa bakoshe ukucetekela kwenu. BaYesu balibuulile abasambile babo ukulomba umupashi uswetelele kuli baYawe. (Luku 11:9, 13) Ili mulukulomba baYawe ukumupeeleni umupashi uswetelele, mulukubalomba ati bakosho’kucetekela kwenu. Ukucetekela cisepo ca mupashi uswetelele. Mulyelelwe ukushinkamika pa kutembela. Ku cakubwenako, kani mwasangana ati cilamukatasheni ukufitulukila bambi, lombeni baYawe ati bakosho’kucetekela kwenu ne kumofweniko ukulukufitulukila.

19. Tungasalulula shani ababyesu abaweme?

19 Mulukusalulula ababyenu abakwete ukucetekela ukukosele. BaYesu balisalulwile bwino ababyabo. Abasambile babo, abaali ifibusa fyabo ifipalamishe, baali aba bucine, kabili baalukubomfwila. (Pendeni Yoane 15:14, 15.) Mulukutuntulula baYesu pakweba ati mulukusalulula bwino ababyenu. Balyelelwe ukukwata ukucetekela ukukosele kabili abomfwila baYesu. Ifibusa ifiweme filaba na bucine, kabili filalangisha ubu bucine na lyelyo filukupeela neli ukupokelela ukufunda.—Ifisimpi 27:9.

20. Findo fingacitika kani twaofwako bambi ukukosha ukucetekela kwabo?

20 Mulukofwako bambi ukukosha ukucetekela kwabo. BaYesu balyofweleko abasambile babo ukukosho’kucetekela kwabo ukupitila muli fyefyo baalukulabila na fyefyo baalukucita. (Mako 11:20-24) Tulyelelwe ukutuntulula baYesu. Kani twacite’fyo, tukakosha ukucetekela kwesu ne kwa bantu bambi. (Ifisimpi 11:25) Kani mungofwako shani abantu mu mupunda mutulishamo? Ili mulukubasambisha Baibolo, mulukubalangisha ati icine baLesa eko bali, balatubikako akalango, kabili ati Baibolo Mashiwi abaLesa. Kani mungofwako shani abakwabesu ukukosho’kucetekela kwabo? Ili mwaishibako umo uulukulitamasha pakuti pa balukutangilila, endesheni ukumofwako. Ukwakubulo’kumusoomesha, mofweniko ukukwata ukucetekelo’kukosele nakabili. (Juda 22, 23) Kani mulasambilila kabili abasambishi benu balabila pa busambishi bwa kweba ati ifintu fyalisangukile lukoso, beni abakosele ne kubabuulako pa kucetekela kwenu ukwa kweba ati ifintu fyalilengelwe. Ifi abasambishi benu ne basambile babyenu bangacita fingamukankamikeni.

21. Kani findo baYawe batulaile?

21 BaYawe na baYesu balyofweleko Petilo ukuleko’kukanika ne kutiina. Mu kupita kwa mpindi, Petilo alibele cakubwenako ica kucetekela ukukosele. BaYawe balatofwako na fwebo ukwimakana abakosele mu kucetekela. (Pendeni 1 Petilo 5:9, 10.) Tulyelelwe ukupyungisha pa kukosho’kucetekela kwesu, kabili baYawe bakatushukisha ili tulukucita fyopele’fyo.

^ par. 16 Ku cakubwenako, boneni ifiputusha ifikwata umutwi wa kweba ati “Baibolo Ilaalula Abantu” ifisangwa mu Akatambo ka Wakulama aka Cibemba aka bantu bonse.