Tolokeleni

Tolokeleni muye pa filukusangwamo

 ABAFWILE BAKABUUKA

Abafwile Bakabuuka—Ifingalenga Mucetekele’fyo

Abafwile Bakabuuka—Ifingalenga Mucetekele’fyo

Kani muli akalango mu kucetekela ati abafwile bakabuuka? Intangishi Paulu yalibuulishishe ati mu kucite’fyo muli akalango. BaLesa balimubuulile ukulemba ati: “Kani fwebo twalukupemamo muli baKlistu ifya mu mweo uno wenka, fwebo tungashama ukucila na pa bantu bonse lukoso. Sombi baKlistu lomba balibucile pa bafwile; balibele ba mutulu wa babo abali mu tulo twamfwa.” (1 AbaKolinto 15:19, 20) Paulu aalicetekele ati abafwile bakabuuka. Ukubuushiwa kwa baYesu kwalimulengeshe ukucetekele’fyo. * (Ifyacitilwe 17:31) E mulandu Paulu alabiliile ati baYesu baali “ba mutulu,” neli ati icisepo ca kutanga, pakuti e bali aba kutanga ukubuushiwa ne kupokelela umweo wa muyayaya. Kani baYesu baali ba kutanga, ninshi kuli na bambi abali ne kubuushiwa panuma.

Jobo aalilabiile kuli baLesa ati: “Mungafwaisha imicitilo ya ku minwe yenu.”—Jobo 14:14, 15

Kuli na umbi umulandu mungacetekela ati abafwile bakabuuka. BaYawe ni baLesa ba bucine. ‘BaLesa tababepapo.’ (Tito 1:2) BaYawe tabangabepapo, kabili tabakabepapo. Kani mulukulanguluka ati bangalaya ukubuusha abafwile, ne kulangisha ati bangababuusha, eli panuma bafilwa ukukonsha ukulaya kwabo? Koku!

Nindo baYawe bafwaila ukubuusha abafwile? Ni pakuti pa butemwe bwabo. Jobo alipwishe ati: “Kani umuntu afwe, akaba ne mweo libili?” Nakabili alilabiile ati: “Mwebo mungeta, na nebo ningamwasukeni; mungafwaisha imicitilo ya ku minwe yenu.” (Jobo 14:14, 15) Jobo aalicetekele ati baYawe baalukufwaisha ukumubuusha. Kani baLesa balyalukile? “Nebo ne baYawe nshalukapo.” (Malaci 3:6) Na ino mpindi, baLesa bacifwaisho’kubona abantu abawaminine kabili abasangalele, babuushiwa. Fyopele’fi efifwaisha ne mufyashi uuli onse lukoso woyo umwana wakwe afwile. Nangabe’fyo, baLesa balipuseneko ni pakuti  bali ne makosa aakucita ifi balukufwaya.—Amasamo 135:6.

Imfwa cintu icibipile ukwakuti, pano baLesa bakaifumyapo

BaYawe bakapeela Abana babo amakosa akusangalasha abantu bonse abafwililwepo abakwabo. Kani baYesu balomfwa shani ukubuusha abafwile? Ili baYesu tabangabuusha Lasalo, baalibwene ifi inkashi shakwe ne babyakwe baalukulila, kabili nabo ‘balililile.’ (Yoane 11:35) Kambi kasuba, baYesu baalikumenye mukamfwilwe wa ku Naini, uwalukulila pakuti umwana wakwe aalifwile. BaYesu ‘balibele ne nkumbu pali ye, ne kulabila kuli ye ati: Wilukulila.’ Penka apo baalibuushishe umwana wakwe. (Luku 7:13) Kanshi baYesu balomfwo’bubi kani umuntu afwa. BaYesu bakasangalala makosa pa kofwako abantu ukutatiko’kusemba pa mupunda wa kulukulila.

Kani umukwabenu alifwile? Cipale mungomfwa ati takulipo icili conse icingashilishe’mfwa. Pano bucine bwa kweba’ti eko cili, e kweba’ti ukubuusha uku baLesa bakacita ukupyungisha Abana babo. Mulukwanuka ati baLesa balafwaya ati mukaboneko ili ici cikalukucitika. Balafwaya mukabeko pakweba’ti mukasekele abakwabenu abafwile. Alakanyeni ifi cikaba ukulukwanshikila pamo ne bakwabenu ifi mukalukucita umuyayaya, ili takukabapo ukufwa!

Ba Lionel, abalabilwapo pa kutanga, baalilabile ati: “Nalisambilile pa bucetekelo bwa kubuuka. Pa kutanga, calinkateshe ukusumina ati ubu ni bucine, kabili nshacetekelepo ne muntu uwambuulileko pa kubuuka kwa bafwile. Pano ili nabwene fililembelwe mu Baibolo, nalisangile ati ni bucine! Ndafwaisha ukubonako ili bakaapa banji bakabuuka.”

Kani mungatemwa ukumfwilapo ifyebo na fimbi? Bamboni sha BaYawe bakasangalala ukumulangisheni mu Baibolo umulandu bacetekele ati abafwile bakabuuka. *

^ par. 3 Kani mulukufwaya ukubone’filangisha ati baYesu baalibuukile, boneni ibuuku lya Baibolo—Cebo ca kwa Lesa Nelyo ca Muntu? amabuula 78-86, ilitulishiwe na Bamboni sha BaYawe.

^ par. 9 Mwane boneni icapitala 7 mwi buuku lya Kani Findo Baibolo Muli Bucine Isambisha? ilitulishiwe na Bamboni sha BaYawe.