Tolokeleni

Tolokeleni muye pa fyebo fya bubili

Tolokeleni muye pa filukusangwamo

Bamboni sha BaYawe

IciLamba

Akatambo ka Wakulama  |  August 2015

Mulukwalakanya pa Butemwe bwa BaYawe

Mulukwalakanya pa Butemwe bwa BaYawe

“Nakulukwalakanya kabili imilimo yenu.”—AMASA. 77:12.

INYIMBO: 18, 61

1, 2. (a) Findo ifimulengesheni ukucetekela ati baYawe balitemenwe abantu babo? (b) Kani abantunshi balilengelwe ne kufwaisha kwa kucite’ndo?

KANI muliishi shani ati baYawe balitemenwe abantu babo? Ili tamungaasuka ico icakwipusha, langulukeni pa fyakubwenako fyakonkapo: Pa myake’ingi, ba Taylene balukubakoselesha ku baKlistu babyabo ukubulo’kwesha ukucite’fintu koti bawaminine. Baalilabile ati: “BaYawe kani tabantemenwepo, nga tabalukumpeelapo ukufunda shonse ishi impindi.” Ba Brigitte, abakushishe abana babili benka panuma ili abalume babo bafwile, baalilabile ati: “Pa fintu ifikateshe muli cicino icalo cakwe Satana, pali ne kukusha abana wenka. Pano ndicetekele ati baYawe balintemenwe pakuti baalingofweleko mu mpindi sha makatasho, kabili tabandekelepo ukupita mu makatasho aacilile pa makosa angi.” (1 Koli. 10:13) Ba Sandra bali ne bulwashi ubutabupolapo. Ili baali pe bungano lye besa, baalibalangishe ubutemwe ku bakashi ba mukwabesu uwishibikilwe makosa. Abalume ba ba Sandra baalilabile ati: “Nangaba’ti aba bankashi tatwabeshipo bwino, ifi batulangishe ubutemwe fyalitusangaleshe ukwakuti. Ubutemwe bwa baYawe bulabwenekela na mu fintu ifinini ifi abakwabesu bacita kuli fwebo.”

 2 Abantunshi baalilengelwe ne kufwaisha kwa kutemwa bambi eli ne kutemiwa. Pano, kani tuli ne makatasho, tulukulwala, tatukwetepo indalama, neli tapalipo ifiweme ifilukufumamo mu kutulisha kwesu, cipubile ukutatiko’kulanguluka ati baYawe tabatutemenwepo. Kani twatatika ukulanguluke’fyo, tulyelelwe ukwanuka ati tulicindeme kuli baYawe kabili ati ‘balekata ukuboko kwesu ukwalwine’ ne kutofwako. Kani twapitilisha ukuba aba bucine kuli bo, tabakatushapo.—Yisa. 41:13; 49:15.

3. Findo ifikatofwako ukucetekela ati baYawe balitutemenwe?

3 Abantu abalabilwapo pa kutanga baalicetekele ati baYawe baali nabo mu mpindi sha makatasho. Na fwebo tungacetekela ati baYawe bali na fwebo. (Amasa. 118:6, 7) Lino isambililo lilukulabila pali fyefyo ubutemwe bwa baYawe bubwenekela (1) mu bulengeshi bwabo, (2) mu Mashiwi abo, (3) mwi tembelo, na (4) mu mulubulo. Ukwalakanya pa fintu ifiweme ifi baYawe batucitiile kukatulengesha ukulukutoota pa butemwe ubu baYawe batulangisha.—Pendeni Amasamo 77: 11, 12.

MULUKWALAKANYA PA BULENGESHI BWA BAYAWE

4. Kani ukwalakanya pa bulengeshi bwa baYawe kulatofwako ukwishibe’ndo pali bo?

4 Kani tulabubona ubutemwe bwa baYawe mu bulengeshi bwabo? Inya, ni pakuti ifintu ifi balengele filatulangisha ati balitutemenwe. (Loma 1:20) Ili baYawe baalengele icalo, baalibikilemo ifintu ifi tupengela pakweba ati tulukulitemwesha ukwikala pa calo. Nangabe’fyo, tabafwayapo fwebo ukulukwikala lukoso pa calo. Tulapengela ukulya pakweba’ti tulukuli abalabi. BaYawe baalilengele icalo mu nshila ya kweba’ti cilukumeshe’fintu ifingi ifi tungalya. Nakabili baalitulengele mu nshila ya kweba’ti tulukulitemwesha ukulya. (Uwaku. 9:7) Ba Catherine balalitemwesha ukubono’bulengeshi mu mpindi ili mu Canada mukabako panini. Baalilabile ati: “Cakukankamika ukubona ifi ifintu fiboneka bwino, ukubona ifi tufimenwa tufumya umusongo ukufuma mu mushili, ukubona ifi ifyuni filukubwela uku fyaile, ukubona ifi kasoosa kesa mu kulya ifyakulya fya tuuni ifi mbikile pa windo lya ku cicini. Mu cinenene, baYawe balitutemenwe pa kutupeela ifi ifintu ifiweme ukwakuti.” BaWishifwe aba kwiulu balitemenwe ubulengeshi bwabo, kabili balafwaya na fwebo ukulitemwesha ifi balengele.—Ifyacit. 14:16, 17.

5. Kani ubutemwe bwa baYawe bulabwenekela shani muli fyefyo balengele abantunshi?

5 BaYawe baalitulengele ne makosa akupyunge’milimo iiweme iitulengesha ukusangalala mu mweo wesu. (Uwaku. 2:24) Baalukufwaya ati abantu bakumane mu calo conse, bacikomeke, ne kuba ne bukulu pe sabi, ifyuni, ne fintu fimbi ifya mweo. (Ifyakuta. 1:26-28) Kabili, ifi baYawe batupeeleko imibelo iitofwako ukubatuntulula filalangisha ati balitutemenwe.—Efesa 5:1.

MULUKWALAKANYA PA MASHIWI ABALESA

6. Mba nindo twelelwe ukulukwalakanya pa Mashiwi abaLesa?

6 BaLesa balilangishe ati balitutemenwe pa kutupeela Amashiwi abo. Ici cilalangisha ati tulyelelwe ukubeshiba bwino ne kwishiba ifi bacita ku bantunshi. Ku cakubwenako, Amalembo alatubuula ifi baYawe baalukucita ku baIshilaeli, abaalukubifya impindi ne mpindi. Pa Amasamo 78:38 palalabila ati: “Sombi bo baliiswile inkumbu, ne kufitulucila ku kubifya kwabo, ne kubulo’kubonala: Icine, libili libili balialwile ubukali bwabo, tabakoseshe ukufitwa kwabo konse.” Ukwalakanya pali lili ilembo  kungamofweniko ukwishiba ati baYawe balimutemenweni kabili ati balimubikileniko akalango. Ishibeni ati mulicindeme kuli baYawe.—Pendeni 1 Petilo 5:6, 7.

7. Mba nindo twelelwe ukucindikila makosa Baibolo?

7 Tulyelelwe ukucindika makosa Baibolo ni pakuti eyi baLesa bapyungisha pa kwambaala na fwebo. Abafyashi ne bana balyelelwe ukulukwambaala bwino pakweba’ti balicetekele ne kumfwa ati balitemiwe. Fyopele’fyo efi cili na kuli fwebo na baYawe. Nangaba’ti tatungababonapo neli ukumfwe’shiwi lyabo, balalabila kuli fwebo ukupyungisha Amashiwi abo. Penka, tulyelelwe ukumfwa ifi balukulabila. (Yisa. 30:20, 21) BaYawe balafwaya ukututangilila fwe balituulile kuli bo, kabili balatulama na ku fintu ifingatusoomesha. Nakabili, balafwaya ati tubeshibe ne kubacetekela.—Pendeni Amasamo 19:7-11; Ifisimpi 1:33.

Nangaba’ti Jeosafati balimupaatiile kuli Jiyu, baYawe balisangilemo “ifintu ifiweme” mu mfumu (Boneni palakalafu 8 na 9)

8, 9. Kani findo baYawe bafwaya fwebo ukwishiba? Pyungisheni ne cakubwenako ca mu Baibolo pa kwasuka.

8 BaYawe balafwaya fwebo ukwishiba’ti balitutemenwe kabili ati tababikapo makosa akalango ku kubifya kwesu. Balafwaya-fwayamo ifiweme muli fwebo. (2 Ifye. 16:9) Ifi fyenka efi baacitile ku Mfumu Jeosafati iya baJuda. Pa mpindi imo, Jeosafati aalibifye pa kusumino’kuya ne Mfumu Eyabi iya baIshilaeli mu kupoka umushi wa Lamoti-gilyadi ku baAshilya. Nangaba’ti abakushimika aba bufi 400 baalibuulile Eyabi ati ali ne kucimfya, Mikaya uwakushimika wa cine uwa baYawe aalishimikile ati Eyabi baali ne kumucimfya. Eyabi aalifwilile mu nkondo, kabili kwalishele lukoso panini Jeosafati na ye nga balimwipeye. Ili aabwelele ku Jelusalemi, baalimupaatiile  pa kuya na Eyabi mu kulwisha abaAshilya. Nangabe’fyo, Jiyu, umwana wakwe Yanani uwakubona, aalibuulile Jeosafati ati: “Mulibwenwe muli mwebo ifintu ifiweme.”—2 Ifye. 18:4, 5, 18-22, 33, 34; 19:1-3.

9 Ili Jeosafati atatikile lukoso ukwikalika, alifundile ifileme fyakwe, abena Lefai, ne bapapatilishi ukupitana monse mu Ishilaeli ukuya ili basambisha abantu amafunde abaYawe. Ici califuminemo ifintu ifiweme ica kweba’ti ne bantu abaali mu fyalo ifyali apepi baalitatikile ukutiina baYawe. (2 Ifye. 17:3-10) Nangaba’ti Jeosafati pa mpindi imo aalibifishe, baYawe baalukubone’fintu ifiweme ifi alukucita. Ili ilyashi lilatwanushako ati nangaba ne kubifya kwesu, baYawe balapitilisha ukulangisho’butemwe kuli fwebo kani na fwebo tulukucita ifyakubasangalasha.

MULUKUTOOTA PE SHUKO LYA KUTEMBELA KULI BAYAWE

10, 11. (a) Mba nindo itembelo libelele ni mpese icindeme iifumine kuli baYawe? (b) Kani baLesa bangasuka shani amatembelo esu? (Boneni icikope icili pe buula 9.)

10 Bawishi abatemenwe abana babo balakutika ili abana balukulabila kuli bo. Balafwayo’kwishiba ifilukubombomanika abana ni pakuti balabika akalango kuli fyefyo balukulangulukapo. Na baWishifwe aba kwiulu, baYawe, balakutika kuli fwebo ili tulukutembela kuli bo.

11 Tulikwete ishuko lya kutembela kuli baYawe impindi iili yonse lukoso. Tapalipo ifi babiikileko ifingatuciicila ukutembela kuli bo. Pakuti Cibusa cesu, balalitemenwa ukukutika kuli fwebo. Ba Taylene abalabilwapo pa kutanga, baalilabile ati: “Ungalabila icili conse kuli bo kabili pa mpindi iili yonse.” Lyonse ili twabuulako baLesa mwi tembelo ifilukutukatasha, bangatwasuka. Pa kwasuka bangapyungisha ifilembelwe mu Baibolo, muli makashini, neli amashiwi aakutukoselesha ku mukwabesu. Nangaba’ti abantu bafilwe ukumfwisha ifilukutubombomanika, baYawe bo balatumfwisha. Pakuti baYawe balalitemenwa ukwasuka amatembelo esu, cilalangisha ati balitutemenwe.

12. Mba nindo twelelwe ukulukwalakanya pa matembelo aalembelwe mu Baibolo? Peeleni icakubwenako.

12 Kuli ifingi ifi tungasambililako ku matembelo aalembelwe mu Mashiwi abaLesa. Shimbi impindi, tungasambilila pali aya amatembelo pa mapempelo acisoolo. Ukwalakanya pali fyefyo abapyungishi ba baYawe baalukutembela, kungatofwako ukuwamya amatembelo esu. Ku cakubwenako, mungalabila pe tembelo Jona atembeele ili ali munda ya cisabi. (Jona 1:17–2:10) Mungapituluka na mwi tembelo Solomoni atembeele ili itempuli lyalukupeelwa kuli baYawe. (1 Imf. 8:22-53) Nakabili, mungalakanya na pe tembelo lya Mwe baWishifwe ili baYesu balabiilepo. (Mat. 6:9-13) Ne cicindamishe, lyonse “nga kukeshibwe kuli baLesa ukulomba kwenu.” Icikafumamo ca kweba’ti “ubutende bwa baLesa, ubukango’kwishibwa konse, bukalame’mitima yenu ne malangulushi enu.” Ici cikalengesha tulukutoota makosa baYawe pa butemwe bwabo.—Filip. 4:6, 7.

MULUKUTOOTA PA MULUBULO

13. Kani ni lise’shuko abantu bakwete pakuti pa mulubulo?

13 BaYawe baalipeele baYesu ukuba umulubulo pakweba’ti “tukekale ne mweo.” (1 Yoa. 4:9) Ili intangishi Paulu yalukulabila pali yiyi inshila baLesa balangishishemo ubutemwe kuli fwebo, yalilembele ati: “BaKlistu balibafwilile abalukupufya baLesa. Pakuti kulikateshe ukubona ungamufwila umuntu ulungeme; sombi cipale umbi angakosho’mutima wakwe ukumufwilo’muntu uweme. Sombi baLesa balukulanjisha ubutemwe bwabo abene  ubwa kuli fwebo, pakuti ili tucili bumbifi, baKlistu balitufwilile.” (Loma 5:6-8) Iyi impese iyakuti ubune ukufuma kuli baLesa ilipeele abantunshi ishuko lya kukwata bucibusa ubuweme na baYawe.

14, 15. Kani umulubulo ulicindeme shani (a) ku basufishiwe? (b) ku bacetekele ukwikala pa calo?

14 BaYawe balilangishe ubutemwe bwabo mu nshila iilibelele ku bantu abanini lukoso. (Yoa. 1:12, 13; 3:5-7) Abasufishiwe ne mupashi uswetelele, balibeele “bana ba baLesa.” (Loma 8:15, 16) Paulu alibuulishishe ati abaKlistu abasufishiwe ‘balibuushiwe pamo, ne kwikalikwa pamo mu maulu muli baKlistu Yesu.’ (Efesa 2:6) Balikwete ili ishuko ni pakuti ‘balibikilwepo ne keshibilo ka mupashi uswetelele uwa kulayana, uuli keshibilo ka bupyani,’ e kweba’ti, ‘ulucetekelo ulo ulwabikilwe mwiulu pakuti pali bo.’—Efesa 1:13, 14; Kolo. 1:5.

15 Abantu abakuti ubwingi bali ne shuko lya kuba ifibusa fya baYawe ne kwikala umuyayaya kuntangiile muli Paladaiso pa calo. Bangakwata ili ishuko kani balangisha ati balicetekele mu mulubulo woyo baLesa bapeele. Kanshi tungalabila ati, umulubulo ni nshila imo yeyo baLesa balangishishemo ati balitemenwe abantunshi bonse lukoso. (Yoa. 3:16) Kani fwe bacetekele ukwikala umuyayaya pa calo twapitilisha ukupyungila baYawe, tungacetekela ati tukalitemwesha ukwikala mu calo ca bukumo. Kanshi tulyelelwe ukubona ati umulubulo ni nshila iikulu yeyo baLesa balangishishemo ubutemwe kuli fwebo.

IFI MUNGALANGISHA ATI MULITEMENWE BAYAWE

16. Kani ukwalakanya pali fyefyo baYawe batulangishe ubutemwe kulatofwako shani?

16 Tungeshako lukoso ukulabilapo ifinini pa fintu ifilangisha ati baYawe balitutemenwe. Dafidi, umwimbishi wa masamo, aalimbile ati: “Ukwalakanya kwenu, mwe baLesa, kwa makwebo apatali kuli nebo! Ukupenda kwa kuko kukulu makosa! Nankakupenda kulicilile ubwinji na pa misenga: Pa kubuka nebo, lomba ncili nenu.” (Amasa. 139:17, 18) Ukwalakanya pa fya kube’fyo kukatofwako ukutemwa makosa baYawe pakuti pa butemwe ubu balangishe kuli fwebo. Popele, nga tweshe ne makosa esu onse ukulukubapyungila.

17, 18. Kani ni muli shisa nshila tungalangishishamo ati tulitemenwe baLesa?

17 Kuli inshila ishingi ishi tungalangishishamo ati tulitemenwe baYawe. Ku cakubwenako, tulalangisha ati tulitemenwe baLesa ne bantu bambi kani tulukupyungako makosa umulimo wa kutulisha icebo iciweme ica Bufumu. (Mat. 24:14; 28:19, 20) Nakabili, tulalangisha ati tulitemenwe baYawe kani twapitilisha ukuba aba bucine na mu mpindi ya makatasho. (Pendeni Amasamo 84:11; Jakobo 1:2-5.) Kani amakatasho esu akulo’kwakuti, tucetekele lukoso ati baLesa balukubono’kupenga kwesu kabili ati bakatofwako. Bakacite’fyo ni pakuti tulicindeme kuli bo.—Amasa. 56:8.

18 Kani tulitemenwe makosa baYawe, tukalukwalakanya pa bulengeshi bwabo ne fintu ifiweme ifi batucitila. Tulalangisha ati tulitemenwe baLesa ne kucindika Amashiwi abo kani tulukulisambisha Baibolo lyonse. Ukwishiba ati baYawe balitutemenwe kukatulengesha ukupalamina kuli bo ukupitila mwi tembelo. Kabili ubutemwe bwesu kuli baYawe bukalukukulilako kani tulukwalakanya pa mulubulo woyo batupeele pa kufitulukila ifyakubifya fyesu. (1 Yoa. 2:1, 2) Inshila twalabilapo shili pa nshila ishingi ishi tungalangishishamo ati tulatoota baLesa pa butemwe balangishe kuli fwebo.